تحميل قصة الزواج التقليدي الرومانسية المغربية "دعي ثوبك الاحمر يشهد " لنسيم الصباح pdf

 

قصة خيالية بالدارجة : آلاء و لعنة تالا (الفصل الواحد والأربعون)

• الفصل الواحد و الأربعون :

صبح عليهم الصباح و هما في داك المكان ..

افل القمر و رجع دفء اليوم عوض برودة الليل ..

جلسو تما في صمت طويل و هدوء غلب هدوء الطبيعة ..

زوج من الارواح المحبطة التايهة .. مالقات لفين تهرب غير لبعضها ..

هي لاقية فيه الامان و هو لاقي فيها الرفقة ..

لا شيء اكثر من ذلك .. و ذلك اكبر و اكتر قيمة من اي شيء اخر ..

حسات بالعياء و نزلات احست بحدسها انه وراها رغم ان خطواتو صامتة مما يعطي القليل من الانطباع على خطورته ..

شعلات كاميرتها و تبسمات لعدستها .. ابتسامة مافيها لامتعة و لا فرح و لا حتى حاجة زوينة ..

ابتسمتها كانت يائسة ، بائسة ، عيانة ، ديال وحدة مانعساتش ليلة كاملة بالتفكير ..

"" صباح الخير ، كيف كاتشوفو حنا في يوم جديد ، ماشي الحياة زوينة ؟ ""

هزات الكاميرا و دوراتها حول محيط الغابة من الاعلى ..

اظهرت شمس صباحية باردة متسللة بين اوراق الشجر الجافة ..

بقات الكاميرا في السماء منين احست بدفعة براس انف الذئب في بطنها ..

دارت عندو ..

كان ذئب اضخم ب4 مرات من الذئب العادي .. كلما كان قريب رغما عنها كاتحس بالمهابة من هبتو و قوتو ..

كان مجرد كائن فخم و ملكي ..

ماشي الملكي الابيض ، نوع الملكية السوداء و الغامضة ..

شيء كالظلام ..

اصدر صوت من حنجرتو و لكن ماكانش مجعد وجهو تجاهها ..

باغي شي حاجة ..

"" اشنو ؟ ""

شافت من خلال عينيه و قرات شيء ..

عاود زمجر و اشار برأسو نحو الغابة ..

بعدت منو خطوة و هو يتحرك في مكانو بدون مايتقدم خطوة .. بحال كايقول ليها "" تماما داكشي الللي قصدت ""

ضحكت و احست بموجة من التشويق كهربات جسدها و عطاتها صعقة كهربائية رجعات النبض في مزاجها ..

دارت فجأة و جرات نحو الغابة ..

سمعات عواءو وراها و قلبها بدى يضرب بالجهد ..

جرات و جرات و لكن ماكانت غير لحظات و خرج قدامها نقز عليها غوتاات من المفاجئة و طاحت للارض ..

طاحت الكاميرا من يدها ..

اللحظة اللي فاتتها الصدمة بدات تضحك ..

كانت بايديها الصغيرة بالمقارنة بوجهو كاتحاول تقاومو .. و هو الاخر كان كايهاجمها .. ماشي مهاجمة جدية ..

كان مداعبة ، بحال كيف كايداعب الذئب صغارو ..

كتحط صباعها بين فكيه و تشد في نيابو الضخمة و تبعد فاهو عن وجهها ..

و هو كان ظاهر عليه انه مستمتع بمقاوماتها الصغار .. كان متمكن منها كليا و في نفس الوقت عاطيها فرصة فين تعبر عن مقاومتها .. حتى فكو كان حالة شوية و مفيكسيه و متبتو من الحركة .. حركة صغيرة غير مدروسة و صباعها الصغار غايتفصلو على يدها ..

كان هو من الداخل كايضحك على مقاومتها ، على ضحكها لمرة منين تمكن من ابعادو و ترجع تنزعج منين يسترجع سيطرتو على الوضع و مرة تزمجر بين سنانها بالغضب و ترجع تضحك تاني من الاول و جديد ..

هز راسو بعد صباعها من فكيه و رجع راسو لوجهها ..

قرب مزيان و نفر هواء سخون قوي في وجهها حتى بعد الشعر من عليها و هي تكمش وجهها دوراتو منزعجة .. حسات بتقلو بعد و ناضت كاتسب و تعاير فيه ..

كان يالله كايجري ببطء بين الاشجار منين نقزات على ظهرو و خشات اصابعها تاني بين فيكيه هاد المرة جرات خديه للور بحال اذا بغات توسع فمو ..

لاحها لور و طاح معاها في الارض ..

صاحت مع الطيحة ..

تقلو ماكانش مزحة دغيا ناض و دغيا فك نفسو منها ..

دار عندها و وقف كايشوف فيها ..

مرمية تما بدون حركة .. انفاسها متسارعة و اطرافها مرخية .. و عينيها مغمضين ..

من الاول كانت عيانة ..

كان دابا و هو كايشوف فيها ، شراستو و هيبتو المهيفة محطوطة على جنب .. كايبان دابا بحال شي كلب ضخم كايشوف بفضول و قلق على صاحبو او 'فرد من العائلة ديالو '

قرب انفو منها و دفع بطنها في حركة كايطلب منها تنوض ..

دفع كتفها بنفس الحركة و راسها و رجع لبطنها ..

قوتو في الدفيع خلاتها تنوض بالغعل .. كما انها فهمات لغة جسدو .. كان باغي يعرف واش لحق شي ضرر بيها ..

حكات عينيها و داعبت فروو من جهة العنق ..

لحس خدها و داز لسانو الضخم على شعرها و هي تمسح بانزعاج ..

دابا تطمن ..

تمشى تجاه طريق الرجوع و ناضت قلبات على كاميرتها فين طاحت حتى لقاتها ..

تاني كاتصور بدون ماتطفيها ..

طفات و خنزرات في تجاه الذئب اللي صغار قدو مع بعدو .. حتى البارح ازعجها وسط تصويرها و كايلاهيها و يخليها ناسية الكاميرا كاتصور بوحدها ..

ماعندها منين تشارجيها اذا طفات دابا في اي لحظة ..

ربطت حواجبها منزعجة للفكرة .. واش مازال غاتبقى هنا واش مازال غاتحتاج الكاميرا ؟

تمشات راجعة حتى هي وراه ، ماعارفة والو هاد الساعة ..

خاصها تنفذ وعدها لاسلام ، باي ثمن خاصها تنفذ وعدها ليه ..

هو كايتسناهى .. ماخاصهاش تنسى هادشي ..

منين وقفات قدام الكهف لقاتو جالس على برى .. في هيئته الذئبية ..

استغربت و لكن دغيا بعد الاستغراب منين شافت ملابسو مقطعة و مرمية عل الارض .. و تفكرت البارح فاش تحول فجأة و هو وسط حوايجو ..

جلسات قدامو و ربطات حواجبها و هزاتهم كاتوريهم ليه بحال شي أم مؤنبة "" شفتي اشنو درتي ؟ واش كايسحاب لك كانطبعهم كل مرة غادية نخسر فيهم عليك انت ؟ ""

نفر الهواء تجاهها منزعج .. و دور وجهو متجاهلها ..

"" ااه راه معاك كانهضر ، اوى تجاهلني ، و بقى هكاك ماترجعش بنادم تاني مرة اخرى باش نعلمك ..  ""

دار شاف في عينيها و تحولو العيون النارية لعيون ايدر الخضرة .. عدستي ايدر البشرية و سمعات صوتو في وذنيها "" ماعنديش مشكل ندور عريان ، الصهد و جلدي مامتحملوش ماشي غير الحوايج ""

عرفات ايدر كاين في السطح .. معناه ممكن يتحول قدامها في اي لحظة ..

غمضات عينيها و بسطت يديها قدامو "" هادشي ماشي عدل انت عارف رأيي في هاد الخصوص.. يا غاتحترمني اولا غانخلي ليك هادشي و نفرقو طريفنا ""

ماجاوبش ..

حلت نصف عين و شافت فيه .. لقات عيون الذئب رجعو .. و لكن على وجهو تعبير غريب .. جعدت وجهها بتشوش كاتحاول تفهم ..

كان كايصدر حتى صوت و حتى هو غريب ..

كايضحك ؟

خرجو عينيها و هي فيها الضحكة من شكلو ..

كانت ضحكتو قبيحة .. بل مخيفة .. بحال شي وجه شيطاني ..

"" جمعها جمعها و ماتعاودش ديرها "" قالتها مجعدة وجهها باشمئزاز ..

جمعها كيف قالت و دفع راسها بانفو حتى فقدت توازنها و تسرحت في الارض ..

خنزرات فيه بجانب عينيها و زمجر و هي تدخل للكهف كاتنكر و تشتم ..

شربات اخر قطرات الماء اللي بقاو .. كانت كاتحس بالجوع و مالقات ماتاكل ..

شافت في الارنبين اللي صيدت البارح و تكات تما و تنهدت ..

غايخصها تنزل تاني و تضرب الطريق للفيلاج ..

ماشي ثواني حتى خطفها النوم و داها معاه ..

حتما ، ماشي دابا ..

حلات الاء عينيها وسط فراشها .. تكسلت و تفوهت و ناضت جلست متسندة على السرير ..

ماكنش زين العابدين في فراشو .. حسات بيه فاش ناض لبس و خرج يجري ..

كانت باغية تمشي معاه ماشي لحبها في الجري و لكن بغات وقت معاه بينها و بينو غير يهضرو مع بعضهم و لكن ماقدراتش ..

بعدما قال ليها باللي "مامستعدش" مابقاتش عارفة اشنو دير ، واش تعطيه وقتو حتى يرضى و يبغي راسو او تزيد في اصرارها ..

مابغاتش تضغط عليه ، بغات غير علاقتهم ترجع لاستقرارها ..

سهرات حداه و حسات بيه سهران بدورو رغم انه كان عاطيها بالظهر ..

ظلات كاتفكر فيه و سهرات كاتفكر فيه و مازاد الطين بلة هو موضوع اسلام و بنت عمو ..

ماقدرتش تحيد من بالها صورتو و هو كايدق في الباب و هي ساداه عليه ، عمرها سدات الباب في وجه شي احد .. ماشي فعايلها ..

و لكن هاد المرة كاينة عائلتها في الصورة ، ماشي غير هي ..

حست بدمعة كاتجري على خدها ، من الاحباط و من كره نفسها لنفسها ..

شافت الضرر اللي تلحق في علاقتهم بسبب 'حقيقتها'

و شافت الشر اللي كامن في داخل ديك البنت ، شافت حتى براءتها و عدم علمها باللي كانت هازاه ..

ماعمرها ماحسات بنفسها مفصولة بين زوج اختيارات ..

ماعمرها تخيلات واحد من الاطراف كان غايكون ضميرها ..

ماعمرها حطات ضميرها في واحد من الاختيارات لانها ديما كانت كاتسبقو ..

ناضت تتحرك تشغل نفسها باي شيء غير التفكير ..

غير غاتمرض راسها ..

مسحات دموعها و بدات تجمع الغرفة ..

بدات بالنافذة حلاتها و خلات نسيم الصيف يدخل ..

طوات الفراش و جمعات الاغراض المبعترة و المرمية حول الغرفة ..

و مشات للحمام .. بعدما قضات اغراضها كاملة ، سهات كاتشوف فيعينيها عبر المراة ، بحال الى باغية تغلب صورة الضمير ديالها في المراة بحال بغات تواجهو و تسكتو ..

' اسلام ماعرفش بنت عمو اشنو واقع ليها ، ماعارفش اشمن قوة مالكاها ، في هاد اللحظة مممن تكون كاتواجه كابوس و انت هنا كاتسكتي راسك غير حيت راجلك مقلق منك ، ماقادرش يتعامل مع حقيقتك ، تجاهلك و عدم تقبلو اصلك ، ماغايلغيش حقيقتك و ماغايبدلهاش ، انت شفتي الشر و هجمتي عليه غريزيا ، انت حارسة بغيتي او كرهتي ' قال انعكاس الاء في المرآة مجيب على تحديها ..

"" السكاااااااااات ""

صاحت الاء و ضربات في المرآة حتى احدتت فيها شقوق وبعض الكسور ..

و سدات وذنيها كاتبكي ..

الدقان في الباب تسمع ، و بعدها صوت عائشة "" الاء بنتي ؟ ""

حلات الاء الباب و ترمات في حضنها كاتبكي ..

التوتر لون وجه عائشة بالكامل ، دوت يدها على شعر و ظهر الاء ، كاتهدنها "" مالك ابنتي ، اشنو وقع ليك ؟ ""

بعدت الاء و مسحت دموعها كاتتمتلك نفسها "" والو اخالتي غير .. ""

"" غير اشنو ؟ كاين شي احد كايغوت بوحدو في الحمام غير هكاك ؟ قال ليك شي حاجة ياك ؟ ""

عرفاتها علامن كاتهضر "" لا اخالتي ماقال لا والو ""

"" اوى هذا هو المشكل ، ماقال واالو ""

سكتات الاء حتى رجع استقرار تنفسها "" ماتديش عليا اخالتي ، غير تعصبت شوية ""

"" حاولي على راسك ابنتي مابغيناكش ترجعي لحالتك تاني ""

ربتت على كتفها "" لا ماتخافيش اخالتي ""

و رجعت الاء لغرفتها .. صلات ، بدلات حوايجها و توجهت لغرفة ابنها طلات عليه .. تم نزلات للتحت تعاون عائشة في توجاد الفطور ..

دقائق قليلة و دخل عندهم زين العابدين ملقي السلام و حط بعض المخبوزات اللي شرى من برى و خرج ..

حسات الاء بعيون عائشة عليها و حتما على زين حتى هو ..

ثم تمتم ب'لاحول و لا قوة الا بالله '..

و لكن الاء تجاهلت كل ما كايوقع .. تجاهلت كولشي ..

بعد قليل .. هبط زين مدوش و مبدل و التحق بالفطور مع امو و زوجتو ..

فطرو في صمت .. لمدة ..

الاء ماهزاتش عينيها من على صحنها و لكن مافاتهاش التوتر اللي مالئ الجو و الحركات التواصلية المتبادلة بين زين و امو ..

ثقل عينين زين كان من مرة لاخرى كاينزل عليها .. و كايقلق راحتها ..

حتى مابقاتش تحملت و ناضت "" انا غانطلع نفيق طه باركة عليه ""

بعدما سمعو خطواتها كايبعدو في الدروج .. قال زين العابدين بفضول و قلق معا "" اش واقع الوالدة مال وجهها مبدل ؟ ""

"" شوفوه مازال كايقول ليا وجهها مبدل ، واش باغي تحمقني ؟ قلت غاتصبحو مصالحين ؟ ""

حذر زين عينيه كايلعب فيما موجود في صحنو منزعج ..

"" قبايلة ضربات المراية في الحمام و غوتات خرجات عندي كاتبكي ، بلا ماتعصبها اولدي الله يرضي عليك صافي تفاهمو بيناتكم ماكاين لاش تبقى شاد في قلبك كيف شي ولد صغير راه مراتك هاديك ماعنكم علاين بعضكم ""

"" ضربات يدها و غوتت ؟ "" سولها زين بفضول ..

"" نوض اولدي الله يرضي عليك .. لحق مرتك و ماتنزل عندي غير و انت مصالح معاها ، باغية نرجع غذا فحالي مابغيتش نخليكم هكا ورايا ""

كان زين وقف .. و بلا مايزيد شي كلمة مازال طلع تبع مراتو ..

كانت الاء كاطل من نافذة غرفتهم .. طه كان غير سبة باش تبعد ..

حركة التحت لفتت انتباهها .. كان شخص غادي جاي في الدرب ..

شخص مألوف ..

اسلام ..

بعدت دغيا من النافذة قبل مايهز عينيه ..

ماستسلمش ،بطبيعة الحال ، هذا هو اسلام ..

بغات دير شي حاجة .. خاصها دير شي حاجة ..

دخل زين العابدين للغرفة و وقف كايشوف فيها بعيون متفحصة ، كانت واقفة قدام النافذة و بعيدة بخطوتين عليها كاتطل من بعيد ..

واقفة وقفة متوترة و مربعة يديها ..

' اشنو عندها ؟ ' فكر ..

حيت ماكايضنش ان توترها هذا بسبب ما واقع بينهم ..

الاء اللي كايعرف ماغاتسوقش لحدة مزاجو ، بل غاتلصق في جنابو حتى تكرهو في نفسو و تخليه ينفذ اللي بغاتو ..

للحظة رجعاتو ذاكرتو لحالتها من قبل سفرها و انتابو شيء كالخوف ، ماباغيش يشوفها هكاك مرة اخرى ، نهائيا !

"" الااء؟!!"" لقى راسو كايناديها فجاة بدون حتى مايفكر ..

دارت عندو كيف الملسوعة ، مفاجئة بوجودو ..

شافت فيه بعيون واسعة ثم دغيا تبدلت نظرتها لشيء اخر ..

شيء بحال " محتاجاك "

قرب ليها خطوة و قربت الخطوات كاملين باش توقف قريبة ليه و عنقاتو ..

فاجآتو .. ماقدرش يبادلها العناق ..

احس بيها كاتحرك يديها على كل ظهرو و يديه هو طايحين في جنابو بحال الى فقد السيطرة عليهم ..

احس بنفسو متشنج ، جديا ماعارفش كيفاش يتعامل ..

حسات هي بهادشي ..

و حست حتى بيديه كايبعدوها على صدرو ، هزات عينيها شافت في عينيه ..

و لكن ماقدرات تقول والو ..

تسناتو هو يتكلم ، ماشي هو اللي تبعها ؟ احس بيها ماشي هي هاذيك و تبعها يكون معاها ؟

قرات هادشي في عينيه ، و قرات حتى انه تراجع ..

خاب رجاها من جديد ..

دار عطاها بالظهر و تم خارج .. ببساطة ماعارفش يستجمع شتات نفسو ..

طارت لباب غرفتهم سداتو ووقفات قدامو ..

كاتشوف في عينيه ..

"" واش صافي سالينا ؟ جا اليوم اللي كاتبعدني عليك ازاين ؟ قول ليا اشنو ندير معاك ؟ واش ماباغيش تشوفني في جنابك ، غانتفهم هادشي ، غانهز ولدي و نمشي لدار بابا .. حتى تحس براسك مزيان و غانرجع  ""

غوبش ..

هاذي اخر هضرة ممكن يقبلها منها حاليا .. دور وجهو مالاقي باش يتكلم معاها ..

و في نفس الوقت كايحس بجسدو بدى يغلي لهاد الفمرة اللي طرأت في بالها ، و لكن شكون غايلوم هو اللي منين سافرت مابين ليها حتى لحظة باللي توحشها او باغي وجودها في الدار ..

قربت ليه .. و ارتاح لهادشي ..

احس بدفئ يديها على ذراعيه "" هضر معايا و وريني اشنو كاين في عقلك ، خلينا نحلو هادشي احبيبي ، خلينا ندفنو هادشي و نمشيو للقدام ""

دار شاف في عينيها ..

هاذي هي الاء ديالو ..

ماكادورش ظهرها ..

"" اولا ماتوحشتينيش ؟ مامستعدش تشوفني ؟ غاضب مني ؟ ماعارفش تتعامل مع الغضب ديالك عليا ، ماخرجتيهش و بقى كاياكلك الداخل ياك ، عصبتك في اكتئابي و لكن فكرتي ليا ، و كبتي كولشي .. انا فهمت دابا ..""

غوبش اكتر بحال الى انزعج من الفصل الاول من كلامها .. و لكن الفصل الثاني خلاه يبغي يترمى بين يديها و غير يبكي ..

اه ، يبكي .. حاس براسو تحمل اكتر من طاقتو و حتى واحد مافهمو ..

و كيف العادة ، غير هي ..

فهمات انه منزعج .. و كملات ..

"" اشنو واقع بيناتنا دابا ازين العابدين ؟ قول ليا ..""

"" اتاهمتيني باللي انا السباب في موت ولدي "" قال فجأة بنبرة مريرة ..

غمضت عينيها ، اتهامها ليه كانت ضربة من الضربات العنيفة اللي وجهاتها ليه ..

اكيد غاضرو ، اكيد غاتبقى طعنة في صدرو ..

حسات بوخز غي قلبها و لكن مدات يدها لوجهو .. كاتلمس خدو .. ماحبسهاش فخلات يدها تما .. حسات بيه محتاج هادشي .. اشارة مزيانة "" ماكنتش عقلانية ، كنت غير ام خسرات ولدها ، كنتي متفهم هادشي ، كنتي زوج مزيان ، كنتي رفيق مزيان ا زين العابدين ، لعبتي دورك في حياتي بشكل مثالي""

"" ضراتتي في خاطري رغم انني حاولت نحكم عقلي و ماناخدش اي شيء درتيه او قلتيه ليا في ديك الفترة بشكل جدي .. و لكن .. ماقدرتش "" كمل كلامو ..

"" سمح ليا ، غلطت في حقك "" دمعو عينيها "" و اللهما كاتستاهل داكشي اللي دوزتك منو في ديك الفترة ""

واجه عينيها مع عينيه و حرك راسو و مسح على وجهو "" انا غير كانخربق دابا ، ماكنتيش في حالة نفسية مزيانة .. انا دابا اللي عقلي مشوش .. ماعرفتش مالي .. ماعرفتش اشنو معنى الغضب اللي هزيت جهتك .. فاش كنتي مسافرة .. كنت مرة كانفكر مشوش عليك ، مرة معصب منك .. ماكنتش حامل فكرة تبعدي عليا .. و منين سمعت من خوتك انه كان عاجبك الحال زدت حقدت .. ماشي عليك غير قلت هي فرحانة و مرتاحة بعيدة علينا و حنا هنا مشوشين .. انا عارف دابا ، دابا فهمت ان احساسيسي ماكانتش عقلانية ماكانتش منطقية .. ندمت الصراحة .. كان عليا نتاصل بيك و نسول عليك .. نبقى على وعدي انني ديما غانبقى في جنبك  ""

بعدت يديه على وجهو و قالت بصرامة "" ماترجعش لور ، ماتعاودش تكبت مشاعرك ، ماتعاودش تلبس داك اللباس ديال الجبل الواقف ، رخي راسك ، طيح ، غاتلقى يديا يكاليوك ، غاتلقى كتفي و صدري يهزوك "" دوزت يديها على خدودو ثم شعرو "" زين العابدين "" الطريقة باش نادت اسمو خلات عيونو يدمعو بتعارض تماما مع ملامحو الحجرية "" ماشي مشكل طيح ، ماشي مشكل تعيى ، ماشي مشكل تبكي ، انا آذيتك في ضعفي بلا مانقصد ، و غانلمم جروحك كيفما تنازلتي و طلقتيني نمشي فحالي و نبعد .. جا الوقت باش نلعب دوري ، ماشي كمراتك ، كصديقتك و رفيقتك ""

عند انتهاءها من الحديث ، لقاتو قريب .. جد قريب ليها من اي يوم اخر مضى .. جسديا و معنويا ..

رقصو عينيه بين عينيها .. ضغطت بحنان على خديه بين يديها ، تبسمت من خلال دموعها ، ابتسامة كلها امل .. كلها ايجابية ..

"" انا هنا احبيبي ، شوف فيا ، انا هنا ""

مال .. مال و مال ، حتى وصل لوجهها ..

حتى احس بانفاسها اللي بدات تتسارع لقربو على وجهو ..

حط جبهتو على ديالها مغمض عينيه و مغوبش ..

بحال الى المشاعر اللي كايحس بيها كاتألمو ..

مد يديه حول خصرها و قربها ليه ..

و احاطت ذراعيها حول عنقو كاتضمو بدورها ..

ريحتو احاطت بيها و ريحتها احاطت بيه و كل فيهم  واحد اقتحم عالم الاخر ..

وقفو على ارض وحدة ، وقفو بزوج اجساد و روح وحدة ..

اكتمل الفريق ..

قلب على ثغرها بعيون مقفولة و استقبلاتو بقلب مفتوح ..

الشغف كان اقل شيء ممكن توصف بيه قبلتهم .. يديه كانو في كل مناحي جسدها و كذلك بالنسبة ليها ..

بحال اذا يالله كايستكشفو اجساد بعضهم ..

يديها شدو في جناب التيشورت ديالو بقوة و يدو على مؤخر رأسها طلقات شعرها و خلى صباعو متخللين خصلاتها اللؤلؤية كايدفع براسها لجهتو بحال اذا قربهم هذا ماكافيهش .. 

بعدو على بعضهم بلا مايبعدو كليا .. عطاو لانفسهم فسحة فين يلتاقطو انفاسهم و لكن من النظرات الشغوفة الحارة اللي تبادلوهم .. اكتشفو انهم ماشبعوش .. مازال ما اكتفو ..

رجعو لبعضهم بشكل عاصف و اكتر قوة من قبل ..

رجع ضمها بقوة و بدا يتحرك بيها ..

و حدى النافذة ، حسات بيد بعدت على جسدها و سدات النافذة ..

تبسمت الاء من خلال قبلتهم ..

زين العابدين هو هو في كل حالاتو ..

بعدها شهقت ، الطوب اللي كانت لابسة تقطع و ترمى في الارض ..

تبسمت كاتشوف فيه بعدما احست بسطح ناعم تحت جسدها ، كان رماها على السرير بلهفة و دغيا قرب منها ماصابرش يضيع اي ثانية .. حاوطت ذراعيها حول عنقو كاتقربو ليها و كاترجع الاتصال ديالهم .. اللي ماكانش فقط جسدي بل كان اكتر من ذلك ..

فاقت تغريد و منين استرجعت ادراكها فهمات انها مانعستش اكتر من 3 السوايع ..

بطبيعة الحال .. بينها و بين النعاس الطبيعي المكتمل المسترخي بارتياح زمان طويل ..

مفاصلها و ظهرها .. كاتفضل ماتفكرش في حالتهم دابا .. حيت هما اخر مشاكلها ..

جسدها المتسخ و اطرافها العامرين بالخدوش ..

جوعها و عطشها .. تشردها .. عراها ..

حتى حاجة من هادشي من المشاكل اللي خاصها تخمم ليهم ..

بل حريتها اساس المشاكل .. اذا رجعات ربحاتها كولشي المشاكل غاتختفي ..

قلبات في الساك و جبدات اخر ماتبقى من الملابس النقية .. ماكانتش هزات بزاف منين خرجات من الدار ..

هزاتهم و هزات الاخرين اللي كانو متسخين و مرميين داخل الكهف .. خذات مشطة ، الصابون و الشومبوان و حتى الكاميرا اللي ماكاتفرقهاش و خرجات ..

غير خرجات الذئب هز رأسو و وقف ..

"" انا غانمشي جهة الشلال نغسل حوايجي و غانغسل ، ماتمشيش لتما ""

هز رأسو هزة وحدة للاعلى و بعدها شافت في عينيه عينين ايدر و صوتو في رأسها "" ماتهبطيش للماء ماغانقدرش نعتقك وسط منو اذا طحتي في المتاعب""

هززات رأسها و حطت يدها على رأسو ، اختفى ايدر من السطح و كانو عينيه تحولو للناريتين ..

على ديك الحالة توجهات للشلال و خلاتو ..

رمات كل مافي يدها و هزات عينيها كاتشوف في الشلال .. و في مياهو كيف كاتجري بانسيابية و هدوء ..

اللي شافو هكا مايتخيلش المقبرة اللي تحتو و الشر اللي كان كامن وسط منو سنين طويلة ..

جلست تما ضامة ساقيها و سهات كاتفكر للحظات عدة .. قبل ما تتكلم ..

"" اذا خرجتي هنا و رجعتي لشلالك ، كيف كنتي عايشة من قبل .. غانرجع فحالي بحال اذا ماوقع والو .. و غانديه معايا ""

"" محاولة مزيانة ، و لكن ماكانتيقش فيك "" جاوبت تالا ..

"" و لايني راك واحد الغبية ""

""سمحي ليا و لكن انت اللي غبية هنا ، غير غاترجعي غايشم باللي ريحتي اختفت منك و غايطاردني و يجي حتال لهنا يصيدني ، هادشي اذا بعدنا احتمال انك ممكن تكوني ناصبة ليا شي كمين ""

"" واخا غايجي ، مايقدرش يصيدك وسط الماء ، الماء مسموم بالنسبة ليه ""

"" ماغايصيدنيش دابا ، و لكن غايرجع ليا منين يولي اقوى و يسترجع عافيتو ، الذياب ماكاتنساش ، الذياب كاتنتقم مهما كان الثمن ""

"" انت ماعندك حتى اختيار ، انت هنا محاصرة تماما ، انت الاضعف هنا ، انت فقدتي كولشي ، فرصتك ضاعت بغباءك ، علاش ماتستسلميش راك خاسرة خاسرة ""

سكتات تالا ..

و سكتات تغريد ..

بعد لحظات .. ناضت شعلات الكاميرا .. وجلسات قدامها كاتمشط شعرها ..

غير كاتمشط و كاتشوف في العدسة ..

مابقى مايتقال ..

خدات الماء من الشلال و استعملت نفس الادوات باش حممات ايدر من قبل ..

كبات الماء على راسها و هي مازال لابسة حوايجها .. غسلات شعرها بالشومبوان و جمعاتو فوق راسها ..

و جلسات تما بحوايجها ساردين كاتشوف في الكاميرا "" عرفتو ؟ اذا جا ليا شي مغتصب دابا و انا كانعوم اشنو غاندير ليه ؟ ""

تبسمت بغموض و قربت للكاميرا "" غانوكلو للذيب ""
و بعدها بعدت .. عينيها مازال على الكاميرا ..

دوراتها للجهة الاخرى و حيدات الفصل الاول من ملابسها ..

دوزت الصابون بالخف نظفات نفسها و نشفات و لبسات من الفوق بعدها مرت للتحت و دغيا نشفات و لبسات حوايجها ..

و دورات الكاميرا لوجهها .. "" و هاحنا تنقينا ""

جمعت الضحكة فجأة بحال اذا كانت غير تسخر او انها غير مستمتعة باللي حاصل .. و طفاتها ..

ملابسها سرداتهم بالماء و دوزت عليهم الصابون بما انه غير موجود مسحوق التنظيف ..

ملات دغيا من عملية تنظيف الملابس بين يديها و هي ترميهم و بدات تضربهم برجليها و تشتف عليهم ..

"" مامتيقاش باللي انا في نصف مصيبة و غانهز الهم للفريك حتى هو ""

"" ماغاتهزيش ليه الهم بعد هاد اللحظة "" قالت تالا فجأة ..

و بعدها جسدها بد يتحرك تجاه الماء "" غاتموتي انت الاولى و غانبقى في الماء ، و بما قلب الذيب على خلاصو غانلقى انا جسد اخر و نسكنو .. اشنو بان لك في هاد الخطة ؟ اه .. ؟ ""

فهمات تغريد باللي تالا ربحات قليل من القوة بعد اتصال تغريد بالماء ..

ماقدراتش تتحكم في جسدها ..

تالا كانت ناوية تغرقها في ذاك الشلال .. و تخليها هيكل في المقبرة اللي التحت ..

تغريد اللي ماقابلاش بهادشي حاولت توقفها "" تااااالااا ""

و عند الحافة وقفات .. "" اليوم غاتموتي اتغريد ، كنتي تجربة فاشلة و تعلمت منها ..""

و يالله غاترخي جسدها يطيح في الماء .. قوة جراتها و رجعات تكركبات التحت .. و بعدها سمعات زمجرة قوية ..

حسات تغريد بتالا كاتغرق وسطها .. شدات راسها بسباب الرطمة اللي ارتطمها مع الارض .. هزات جسدها العلوي و لقاتو واقف قدامها ..

الغضب في عينيه.. ماكانش موجه ليها..

جلسات ضامة رجليها في مكانها و بدات تبكي ..

حسات بيه وقف حداها ..

هزات عينيها شافت فيه .. "" مابقيتش قادرة نصبر ، خاصك تلقى حل في اقرب وقت .. ""

ناض وقف دفع جسدها باش تنوض و تمشى حتال فين كانت كاتغسل ملابسها و جلس تما ..

تبعاتو و مسحات دموعها و رجعت كاتغسل حوايجها ..

"" انا غانفهم باللي قصدتي نمسح دموعي و نرجع قوية باش نواجهو هادشي ""

شافت فيه لمدة ..

"" كنتي مراقبني ؟ "" ناضت فجاة و رمات البياسة اللي كانت في يدها للارض ..

عيون ايدر ظهرو في السطح و سمعاتو في عقلها "" كنت قريب ماكنتش كانراقب .. ماقدرتش نتيق فيها و انت حدى الشلال .. ""

رجعات كاتشتف بغضب و هي كاتبكي ..

الذيب كان منزعج من بكاها .. هي كاتشتف و هو كايضرب جسدها بانفو .. كلما ترنحت كاترجع تشتف و تتجاهلو ..

و هكا دوزو صباحهم ..

تحركت الاء من بين يدين زين العابدين و حاولت تنوض و لكن رجعها و احكم يديه حواليها ..

قبلة كانت منو على جبينها و اراح خدو على راسها "" فين نايضة و مخلياني ؟ "" سولها ..

"" كنت باغية ننزل غبرنا بزاف ""

"" غير خليك ""

تبسمت الاء و بعدها حسات بيه كايداعب خصلات شعرها و سولاتو "" اشنو رأيك في لونو ""

حسات بيه هز راسو و هزات عينيها شافت فيه ..

كان كايشوف في شعرها بعيون مبتسمة "" جاك غزال ""

"" واش بالصح ؟ عرفتي رد فعلك كان موترني ، لدرجة ماقدرتش نحيد زيفي خاصة و انني شفتك ديجا ماعاجبك حال ""

ضحك و قال"" هما اللوينات في شكل و لكن اذا كانو عاجبينك و مفرحينك فعلاش ماديريهمش ، زيادة على انهم جاو معاك بكل صراحة ""

وساعت ضحكتها "" واش بالصح هذا رأيك ؟ "" تفاجأت لهاد الجانب الجديد من زين ..

ضحك زين العابدين و بعدها عنقها عناق متكاسل .. و غمض عينيه بحال الى باغي يرجع ينعس ..

بعد عاصفة الشغف اللي مرات بينهم هو نعس و هي بقات كاتخمم في مشكل بنت عم اسلام ..

لاحظت ان حالة زين العابدين كانت تستحق منها تكون حذرة ..

ماعمرو كان معاها كيف اليوم .. تلقات منو بزاف ديال المشاعر .. منها الحنونة و منها الغاضبة .. منها المشتاقة و منها اللائمة ..

استنتجت انها خاصها تهتم اكتر لمشاعرو و تقبل فين تعطيه استراحتو هو هاد المرة ..

هو ماشي بحالها .. مامحتاجش يبعد عليهم باش يرتاح ..

محتاج غير وقت هادئ مع عائلتو ، مسالم و سلس ..

و هادشي اللي غاتوفر ليه ..

حياة هادئة ..

"" الاء ""

انتابها القلق لطريقتو مناداتو ليها و هزات عينيه لعينيه ، تردد شوية قبل و لكن كمل كلامو "" مابغيتكش تحملي دابا ""

تفاجأت ..

"" علاش ؟ ""

"" بغيتي تحملي ؟ ""

"" ماعرفتش ، مافكرتش في الموضوع ""

"" في نظري انا ننساو الموضوع دابا ""

"" علاش ؟ انت ديما متشوق لموضوع حملي و الولاد ، واش على قبلي ؟  ""

رمش عينيه للحظة "" من الاحسن ا الاء ترتاحي من هاد الموضوع .. رجعتي مزيانة من السفر و لكن ماشي كفاية باش تخوضي في تجربة اخرى .. ""

اعطت لحظة لرأيو تحللو في عقلها و جاوبت "" عندك الحق "" رجعت سندت رأسها على صدرو و ضمها "" نفكرو في الموضوع من بعد ""

"" فين بغيتو نسافرو هاد الصيف ؟ ""

و هزات عينيها فيه كاتضحك و بدات تقترح ..
و نساو ريوسهم ساعتين اخرى غير كايدردشو و يتناقشو بحال الى رجعو بيهم الايام لايام صداقتهم ..

الوقت اللي رجعات تغريد للكهف بعدما نشرات حوايجها على اغصان الشجر لقات الذئب عامر دم ..

خرجو عينيها و غوتات .. تخشات في الكهف و لقات الارنبين مختفيين ..

خرجات ليه نيشان تلاحت عليه ، مغزفة ، مفقوصة ، نتفات فروو و عضات وذنيه و هي كاتبكي ..

رماها من فوق ظهرو و تحنى كايلحس وجهها ..

ضرباتو بعداتو و جلسات في الارض كاتبكي ..

فهم الذئب باللي شي حاجة ماشي هي هاذيك ..

و جلس قدامها ..

منين هزات عينيها فيه .. لقاتو مخنزر و لكن كايدرس تصرفها ..

ماكانش فاهم اشنو بيها ..

لاحظت ان الذياب ليهم تعابير .. تعابير وجه كيف البشر ..

كل مرة كاتكتشف فيه شيء كايثير فضولها و اعجابها بحقيقتو العجيبة ..

مسحات دموعها و رجع قرب منها كايلحس وجهها و بعداتو منزعجة "" بعد مني كاتوسخني يالله غسلت ""

ماتسوقش ليها استمر فيما كايدير حتى غوتت عليه و بعد ..

شوشات تفكيرو و بقى كايشوف فيها بفضول و مافاهمش ..

"" مافاهمش اش درتي ؟ انت قتلتيهم القتال ، ماكنتش ناوية نقتلهم ، كنت باغية نرجعهم معايا ""

و رجعت كاتبكي ..

ماعارفاش بالضبط علاياش ، يمكن مشاعرها تضررت و تدهورت و مابقاتش تتفاعل بشكل سليم ..

ناضت كاتمسح دموعها و دخلات للكهف خوات ساكها في الارض خدات شارجورات و البيسي و الكاميرا و القليل ديال الفلوس و خبات الباقي الداخل.. لبسات سبيرديلتها و خرجات ..

و هي غادية قالت  "" انا راجعة ""

الطريق كلها و هي كاتبكي .. الجوع و العطش و تورم رجليها و وحشها لاسلام .. تعرضها لخطر الموت الصباح و ورطتها بشكل اجمالي .. و موت الارنبين ..

كولشي هادشي مابقاش كايبكيها .. نشفو دموعها شحال هاذي و وصلات لحد التخدر ..

اذا اشنو بيها اليوم ؟

وجه اسفل بطنها بدات تحس بيه ..

واش هذا سباب بكاها و تعكر مزاجها ؟

وقفات شادة راسها .. لا .. ماشي داكشي اللي في عقلها ..

الدورة الشهرية ..

رجعات تبكي و كملات طريقها "" هادشي اللي كان ناقص ""

مسحات دموعها "" شحال من يوم و انا واقفة كيف الجبل كانواجه مخاويفي بلا بكا ، جات الدورة الشهرية و وليت كيف شي نافورة ديال الماء ، بحال شي بعلوكة صغيورة ، اللي شافني كانبكي دابا على زوج قنيات مايفكرش حتى التفكير في انني حليت كرش مغتصب و وكلتو للذيب ""

دارت شافت حواليها و مالقات حتى احد ..

"" اش هاد العبث ""

وقفات كاتمسح دموعها و جبدات كاميرتها شعلاتها .. و تسنات ثانية قبل ماتتكلم "" انا عيييييييييييييييت بغيييت نرجع فحاااالي "" بعدما صرخات هاد الجملة في الكاميرا طفاتها و كملات في طريقها ..

كاتبكي ..

دخلات للcyber لقات الياس و خطيبتو معاونين كايجمعو المحل ..

"" اهلا اهلا تغريد "" ساس الياس يدو و هو كايقول ليها بابتسامة واسعة ..

قربات منها خطيبتو مبتسمة و سلمات عليها "" فين غبرتي هاد اليومين ""

"" ماغبرتش "" قالت تغريد بغرابة و ابتسامة حاولت ما امكن تخليها ودودة ..

و لكن ماخرجات غير ابتسامة الذئب ، مشوهة ..

عيون الياس و خطيبتو كانو عليها بزوج .. حتى هما كايدرسوها ..

اش واقع للعالم اليوم ؟

"" قولي ليا اتغريد ، عمرك قلتي لينا فين كاتسكني "" سولها الياس

"" علاش كاتسول..لو ؟ ""

"" والو ، غير باش نعرفو ، كانعتابروك ختنا دابا ""

"" قول الصراحة ""

"" هادشي اللي قلتو صراحة ، زيادة على انك و سمحي ليا كاتباني بحال .. ""

"" متشردة ؟ ""

"" ماقصدش هادشي اختي "" تدخلت خطيبتو و هي كاتدفعو بمرفقها ..

تبسمت تغريد "" ماديروش في بالكم ، انا جيت بغيت الانترنيت و لكن بان ليا بديتو كاتجمعو ""

"" جمعنا هادشي ، و لكن خليت ليك واحد و بطبيعة الحال باقي حتى الويفي ""

خرجو عينين تغريد "" واش بالصح ؟ ""

ضحكو عليها الكوبل منين دخلات دغيا و جلسات قدام الحاسوب شعلاتو .. و هما رجعو لخدمتهم ..

ننيشان دخلات للفايسبوك ..

كيف العادة كاينين ميساجات من صحابها و باقي الميساجات اللي ماقراتش من قبل .. و لكن على راسهم اسلام ..

كانو بزاف ديال الميساجات ..

و منين قراتهم مالقات غير السبان و الشتم .. من النوع اللي 'تحت السمطة'

شدات فمها و بدات تضحك .. ماقدراتش تحبس نفسها ..ضحكات حتى دمعو عينيها ..

هذا ديما اسلام فاش كايبلغ اخر مراحل سيطرتو على نفسو ،و كايفقد توازنو ..

غايكون دابا كايدور تما و كايغلي بالاعصاب ..

حاسة بيه لانها ماكاتلعبش هنا .. حتى هي كاتحاول تلقى حل ..

ماعرفاتش اشنو غاتكون ردة فعلو بعدما غايشوف هادشي اللي غادير ..

"" ممكن نشارجي بيسي ديالي و كاميرتي ؟ ""

"" اه ، هانية اختي ""

"" شكرا اخويا ""

حطاتهم يتشارجاو حداها و جاوبت اسلام "" مايمكنش لك تكون موحش فشي احد و تسبو بهاد الطريقة ، babe watch your mouth  ""

و خرجات .. مابقى ليها ماتقول ليه .. و مابغاتش تتبرزط و هي كاتقاد شغلها ..

بعد ساعات قليلة .. انهت شغلها و في حاسوبها هي و اتمت المهمة علاياش جات ، عاونت الياس في اشغال المحل ، خطيبتو كانت مشات للدار و قالت غاترجع ..

و منين رجعات جابت معاها الشاي و رغايف و بعض الحلويات .. تغريد طاحت فيهم عمية و خلات الاخرين كايتفرجو فيها ..

و عاودت رجعات خطيبتو للدار باش ترجع الاواني و جلست تغريد كاتدردش شوية مع الياس كاتشرح ليه بعض الافكار الاخرى .. و كان هو كذلك كايقتارح و كايتناقشو ..

منين ادركت انه داز الوقت بدون ماتحس ناضت جمعات حاجياتها في ساكها ..

سلمات على الياس و لكن شدها "" تسناي ترجع --""

قاطعاتو خطيبتو منين دخلات و لكن كمل "" هاهي نيت ، مالك تعطلتي ؟ ""

تبسمت في وجه تغريد و قالت لخطيبها"" ها انا رجعت ، هاكي اختي تغريد ""

"" اشنو هادشي ؟ "" قالت تغريد كاتشوف في القفة الصغيرة اللي ممدودة قدامها ..

"" غير شي شهيوات كوليهم بالهناء "" ابتسامتها كانت واسعة منين قالتها ..

خداتها تغريد ماقدراتش ترفض لطفهم "" شكرا ماكانش عليك تبرزطي راسك ""

"" هانية ماكاين عذاب ""

سلمات عليهم تغريد و خرجات من المحل بابتسامة على وجهها ..

الوقت اللي دوزاتو مع هاد الثنائي عاونها تنسى شوية و يتحسن مزاجها .. ولو غير شوية ..

شرات فوط صحية و ملابس قديمة لايدر مع بعض الملابس الداخلية .. خشات كولشي في الساك ديالها و بعدها شرات الماء ..

و بهذا تمات راجعة للغابة ..

في الوقت اللي وصلات كان طاح الظلام ..
حطات ساكها و حطات الماء و حتى القفيفة الصغيرة .. و تسائلت ..

فين هو ؟

شعلت المصباح اللي كان في الكهف الداخل و شعلات العافية على برى كيف العادة باش تنقص كثافة الظلام ..

مالقاتش الشجاعة الكافية باش تدخل في الغابة و تقلب عليه ..

بل دخلت للكهف و غيرت و استعملت الفوطة الصحية و تكات تما ..

كان القليل من الوجع و لكن ماشي لدرجة كبيرة .. كانت كاتحس غير بالعياء و الفشل في ركابيها ..

و ماعقلات حتى داها النعاس ..

كان جالس اسلام قدام باب دارهم ..

قضى اليوم بكامله في الحي ..

كايحوم فيه كيف شي قرش جائع ، زوج الاء ماخرجش من الدار و لا حتى هي ..

كاعرفش واش في هاد اليوم غايقدر يتكلم مع شي واحد فيهم ..

فهم باللي الكلام مع الاء ماغايكفيش ، غايخصو يدون لراجلها هو الاول ..

غايخصو يتكلم معاه هو على الانفراد الاول ..

و لكن مازال ماصادفو ..

تحل الباب وراه و سمع صوت اختو سكينة "" اشنو مازال كادير هنا ، قالت لك ماما طلع تاكل ""

بدون ما يدور .. بدون ماحتى يتحرك قال بنبرة هادئة الا انها ماكانتش هادئة بالمرة "" مايصدعني احد هاد الساعة ""

احس بيها بقات تما كاتشوف في للحظة قبل مايسمع الباب كايتسد و خطواتها طالعين في الدروج ..

شد راسو و هو كايحك كفيه عليه باحباط و غضب ..

هز الهاتف ديالو من جيبو و لقى اشعار من فايسبوك و من يوتيب ..

دخل للاول دغيا و بيدين سرعان ما بداو يرتعشو .. حتى من جسمو ماعرفش ايمتى وقف في انتباه تام ..

《 مايمكنش لك تكون موحش فشي احد و تسبو بهاد الطريقة ، babe watch your mouth  》

خرجو عينيه في الميساج و عضلة شفتو العلية كاترتعش ..

كيفاش تجرأت ؟

و هما في هاد الوضع ، كاتقول ليه يراقب فمو ؟

هذا جوابها .. ؟

على كاع دووك الميساجات ، هذا هو الجواب ، غير زوج جمل ؟

"" تغريد ،تغريد ،تغريييييييد ، الله يلعن--------""

صاح كايشتم بدون مايتحكم في نفسو ..

ماجاوبهاش مازال ، جوابو هاد المرة غايكون في وجهها ..

"" كانواعدك ، هاد المرة جوابي غايكون في وجهك اتغريد ، غير تسنااااي  ""

خرج بالخف لإشعار اليوتيب الخاص بقناتها ..

بلا مايركز اكتر في اللي مكتوب ورك فيه .. و بعدها كاع ما مر قدام عينو خلاه مصدوم من بدأ و جديد ..

و كيفما الصدمة الاولى وقفاتو من بلاصتو ، هاد المرة جلساتو في الارض ، الرعشة اللي كانت في اصابعو و ركابيه ولات استرخاء ، استرخاء غريب .. بحال الفشلة ..

لقى كاع مشاعر الغضب اللي هزاتو من الارض كيف شي سحابة ، لاحتو دابا في الارض و ولات شيء اخر ..

حلات تغريد عينيها من نعاسها ، فياق ماشي هي اللي اختارتو .. بل كان الذئب كايدفع جسدها بانفو ..

حلات عينيها معبسة كاتفكر كيفاش تفهمو باللي 'اللعب' ديالو بالنسبة ليها عذاب ..

و كيفاش تقنع هاد الحيوان الضخم انها ماقاداش على لعبو الخشن ..

بعداتو بيدها و هو يوقف كايشوف فيها ..

ناضت جلسات "" اشنو باغي ؟ "" و بدات تحك اثر النعاس من وجهها ..

خرج و منين رجع رمى في حجرها 3 ارانب .. حيين ..

خرجو عينيها فيهم و هزاتهم فيه "" اشنو هادشي ؟ ""

رجعات شافت فيهم و مباشرة لعينيها هاد المرة مدركة "" اوى كولهم في الخلا لاش جايبهم ليا ""

اصدر زمجرة عميقة و ...عصبية ..

ديك الساعة سكتات ..

كاتشوف فيه بتشكيك و تشوش ..

كايتنفخ عليها ؟

رجعات شافت في الارانب اللي هاديين حتما بسبب عياهم من الجري ..

ميلات فمها و عنقاتهم "" هادو ليااا ؟ ""

جلس و عطاها بالظهر و وجه وجههو لفتحة الكهف ..

كيف البنت الصغيرة بدات تبكي تاني ..

الذيب كايحزرها ؟ كايصلح ما غلط فيه ؟

تبسمات ، لطف الاخرين ليها اليوم كان شيء ..

شيء بحال شي نقطة ماء في صحراء قاحلة ..

في الاول من الكوبل اللطيف و دابا من الذئب ..

الذئب اللمتوحش و اللئيم ..

رمات رجلها عليه و حطات راسها على فروو الدافئ ، تصنتات لنبضو و ارتفعت مع تحركات جسدو و هو كايتنفس ..

و هو خلاها تعنقو و في نفس الوقت متجاهلها ..

"" شكرا للحركة اللطيفة ،ولكن انا كنت غير باغية نفش غلي و لقيتك سبة .. ""

ضحكات .. و هو ينفضها  من فوق جسدو ..

ضحكات اكتر و عاودت عنقاتو "" و لكن جديا عزو عليا و ربيت عليهم الكبدة ، بكايا عليهم كان صادق ""

زمجر و دفع راسها براس انفو .. و بعدها لحس شعرها ..

بعداتو و جرات الساك و رمات الملابس اللي جابت ليه في وجهو "" رد البال هاد المرة ماتقطعهم .. ""

ناض وقف و هزهم بسنانو و خرج و هي جرات القفيفة و جبدات وحدة من العلبات اللي فيها الحلويات و تكات كاتاكل ..

بعدما لحظات وقف بهيئتو البشرية ..

تبسمات لهيئتو الوسيمة ، تيشورت اسود و شورط رمادي ضمو هيئتو الضخمة بشكل مثالي ..

شعرو و لحيتو حافظو على شكلو البري وسط ملابسو الحضرية ..

فقط وسيم بشكل عنيف و متوحش ..

دار مبسط يديه في الهواء و هي تستغرب ..

بعدها حدق في عينيها و هو كايقول "" اشنو ، عاجبك اللي كاتشوفي ؟ بغيتي تشوفي من الجنب لاخر حتى هو ؟ "" و دار ..

قلبات عينيها من سخريتو و هي تجمع الضحكة ..

جلس حداها و مد يدو كاياكل معاها ..

"" فين غبرتي اليوم ؟ ""

"" ماسوقكش ""

"" ماتبعديش لفين مانقدرش نكون حداك ""

"" كاتهضر بحال الى ماتقدرش تنزل تطاردني من الريحة ""

تهز جسدو كايضحك .. و منين شافت في وجهو لقاتو راسم ضحكة جانبية كلها غرور ..

قلبات عينيها ..

"" كانهضر على ربح الوقت ""

"" قادة براسي ""

"" اشنو كاتقصدي ب"قادة براسي" بالضبط ؟ واش بحال كيف عتقتك من الموت الصباح ؟ ""

عاودت قلبت عينيها ..

"" غير اليوم ماكنتش .. على طبيعتي ""

"" عارف "" سكت ثانية و قال بنبرة ساخرة و مبطنة "" شلا روايح شميت هاد النهار .. ""

حطات علبة الحلويات بالعنف في جنبها و فمها عامر و هي غمضات عينيها بشدة ..

هربات الشهية ..

ضحك عليها ساخر و كمل ماكلتو بحال الى ماقال والو .. بابتسامة جانبية على وجهو ..

"" طه ، خللي داكشي في بلاصتو يا هاد الولد ""

ضحك طه و صراخ جدتو عليه صدى من غرفتها خلا زين يضحك .. احذر عينيه لزوجتو فين واخدة فخضو مخدة موسداها و كاتفرج ..

الضحكة على وجهو بهاتت منين شاف حالتها ..

من الصباح و حدسو كاينبهو بشي حاجة معاها ماشي هي هاديك ..

سحاب ليه في الاول بسباب معاملتو ليها ..

تحسنت حالتها بعد صباحهم الجامح و بعد الوقت اللي دوزوه مع بعضهم على طول اليوم .. و لكن احس باللي شي حاجة شاغلاها .. شي حاجة اخرى ..

دوز يدو من خلال خصلات شعرها بحنان و بعدها دور وجهها من ذقنها لعندو ..

دارت بكليتها واجهت وجهو و تبسمت ..

ماتبسمش بالمقابل "" مالك ؟ ""

"" والو ""

"" غاتكذبي عليا انا ا الاء ؟ ""

"" ماكانكذبش ، اشنو غايكون بيا متلا ؟ ""

سكت و هي تتوتر تحت عينيه المتفحصة بذكاء ..

عارفاه ماشاريش هضرتها ، خاصة و انه كايشوف مضيق عينيه و كايلعب باطراف الشارب ديالو ..

حسات بيه غايدخل لعقلها و غايعرف ..

ناضت قادت شعرها و تمات نايضة "" نمشي نغاون خالتي فجميع بيتها ""

شدها من خصرها و جلسها على رجلو"" الوالدة سالات جميع البيت .. ""

سكتات كاتبلع ريقها تحت انظارو ..

"" مالك ؟ "" بعد شعرها وراء وذنيها و حط انفو على جانب خدها "" اممم ..؟!""

غمضات عينيها لاحساسها بقربو .. كايفشلها بحنانو ، عارفاه مزيان اشنو كايدير ..

و لكن ماغاتقدرش تقول ، ماغاتفتحش المواجيع و ماغاترجعش التوتر لعائلتها ..

حاوطت عنقو بذراعها و بعدات وجهو بعنف لطيف عليها و قالت "" واش انت ماعندكش علاش تحشم ، ماماك و ولدك غير الداخل ""

حيد يدها من وجهو و رجع شاف فيها من طرف عينو ..

ماطايحش لمحاولتها في تشتيتو ..

و قبل مايقول شي حاجة .. دقان قوي تسمع من خلال بابهم و تسلل حتال عندهم ..

"" زييين العااابديييين ""

وقف زين العابدين ، فجأة متنبه متاهب لمهما كان هذا اللي كايدق و يغوت بهاد الطريقة ..

بعد زوجتو من عليه بحذر و لكن قال بصرامة ليها و لحتى لامو اللي خرجات بدورها من الغرفة قلقة  "" بقاو هنا ""

شدات الاء ذراعو و جراتو لعندها و عينيها البراقة مذعورة "" ماتخرجش ""

"" شكون هذا اولدي؟ "" قالت امو ..

"" زيين العاابديييين "" ضربة اخرى قوية في الباب و صيحة عنيفة ..جر يدو من قبضة زوجتو و تم خارج كايقول بعنف "" بقاو الداخل .. انا غانعرف ""