ترددت تالا قبل ما تجاوب "" ماعرفتش واش نقدر نتيق فيك ؟ ""
"" انا اليوم خليتك تستخدمي جسمي ، كانتسالك تردي ليا بشي حاجة ""
"" حنا الساحرات ، كلما استعملنا السحر ، كانفقدو قوانا شوية بشوية حتى كايتقاداو ، و كاينين مراحل ديال السحر ، انني نشافيك من المرض راه مرحلة متقدمة ""
"" واخا ، و كيفاش كاتعاودي تسترجعي قواك ؟ ""
"" الماء ""
"" الماء ؟!""
"" اه ، انا باش نسترجع قوايا خاصني غير نعوم في الماء ، و حنا الساحرات مختلفين ، كاينة اللي كاتسترجعو بالتراب ، و كاينة اللي بالنار ، كاينة اللي بدم الحيوانات ، و كاينين شي وحدات صعاب ماكاين لاش تعرفي عليهم ""
"" هادشي عندكم فشي شكل ""
"" نزيدك ، انا ساحرة و لكن قوايا على قدي ، حيت مت صغيرة ، لو مت اكبر شوية كانت قوايا غاتكون اقوى و اكبر من هكا ""
"" اجي ؟ قبل ما تسكني جسد ديك الرضيعة فديك القبيلة ، منين جيتي قبل ؟ ""
سمعاتها تنهدت "" ماكنتش عايشة حياة زوينة ، منين حليت عينيا في جسدي الحقيقي لقيت راسي فيدين ساحرة كبيرة ، كنت مع شلا ساحرات بحالي ، كبرنا تما كيف الخدم تحت رجليها ، كانت كادور هضرة تما باللي عندها شي نوايا خبيتة تجاهنا ، خاصة الساحرات اللي كبر مننا كانو كايغبرو وحدة بوحدة ..داكشي علاش ساجنانا عندها .. كانت غير كاتسنانا نوصلو للسن اللي بغات .. ""
"" للسن اللي بغات ؟ علاش ؟ ""
"" داكشي خايب ، مانضنش انك غاتبغي تسمعيه ""
"" غير قولي ""
"" كانت كبيرة ، و كانت كاتسترجع قواها و حتى جمالها باكلنا حنا الساحرات الصغارات ""
"" اشنووو ""
و هنا دقة في الباب و بعدها سمعات "" وا ديك الهبيلة معامن داوية ؟ "" كان ولد عمها فيصل ..
هزات عينيها و بعدت شعرها من وجهها بوجه اصفر تمتمت "" سير .. عاود لمخك .. سووقك ؟ ""
"" كيف قلت ليك ، كانت كاتاكل الساحرات الصغارات اليافعات باش تسترجع قواها و شبابها .. هذو هو النوع الاقوى من الساحرات ""
"" و انت كيفاش فلتي ، واش قتلاتك ؟ واش كلاتك ؟""
"" لا ، كون كلاتني ماكنتش غانكون هنا ، كنت غانكون فين كانكونو كاملين بعد موتنا ""
"" اذا ؟!!""
""ماكانت عندي حتى فرصة نهرب فيها ، و لكن لقيت طريقة ""
"" اشنو هي ؟ ""
"" اغريت ساحر كان كايجي عندها ديما ، القى عليا تعويذة قوية ماعندك حتى فكرة شحال محنني باش قنعتو بيها ، وفي الاخير حررني من جسدي و هربت من تما روح و خليت جسدي ليها . كلاتو العاهرة و لكن على الاقل ماشي و انا فيه كانشوف فيها .. كولشي سحاب ليه مت ..""
"" هادشي اللي كاتهضري عليه بزااف على العقل ""
"" عارفة ، و لكنو واقع في عالمنا ، عالمكم ماشي احسن منا ""
قلبات تغريد عينيها "" انت غاتقولي ليا ؟!! "" و كملت "" و من تما اشنو درتي ؟ ""
"" كان خاصني نلقى جسد يحتويني قبلما نختفي من الوجود ، و لقيت جسد ديك البنت ""
"" كيفاش لقيتيه ؟""
"" ماكيهمكش كيفاش ""
"" و علاش سنين طويلة عشتي بلا جسد ""
"" عشت في الماء ، في المكان الوحيد اللي ممكن يحافظ عليا ، حيت الماء قوتي ""
ضحكات تغريد و شافت فيها كاتعض على شفايفها "" رديني بصورة رجل ""
توسعو عينين تالا "" رجل ؟ علاش ؟ '"
"" ديري اللي قلت لك ""
"" واخا ، اشمن راجل بغيتي ""
و بوجه مبتسم ابتسامة غير بريئة قالت"" اسلام ""
ضحكات تالا ، و من تما غمضات تغريد عينيها على تحول وجه تالا و هي كاتتلو التعويذة ..
و منين تغريد عاودت حلت ، غوتات بالجهد و رجعات باللور حتى زلقات في الارض بقوة الصدمة ، و تالا بدات تضحك ..
شدات تغريد قلبها كاتحاول تسترجع شتات نفسها ..
عاودت ناضت و هي شادة مؤخرتها وقفات قدام المراية ، و بعدها عاودت قفزت من المنظر ، في بلاصة ماترجعها رجل "اسلام" تحديدا ، رجعاتها مسخ ..
الوجه كلو اخضر لزج بعيون كبيرة كلها سوداء ، كان نيفها عبارة عن زوج تقوب قراب لعينيها و ماتبقى كلو فم واسع و كبير عامر بالانياب و لسان رقيق مزرق خارج من بين نيابها ..
عوجات تغريد فمها بنفور و صاحت دايرة يدها على الوجه قدام المراية كاتدرقو "" بعدي هادشي من قدام عينيا اتالا و اللهتا غانتقيا ""
بعدات باش تاخد نظرة على جسدو من بعيد و هي تعض على شفتها السفلية و تبسمت بملامح غير بريئة و قالت "" شفتيه كيف داير ؟ a whole meal ""
"" اهول ميل ؟""
قلبات تغريد عينيها متجاهلاها و هي تحل الفوطة حول صدرها و بدون ماتخمم فيها دارتها حول خصرها كيف كايديرو الدراري و بدات تستعرض في عضلاتها ..
"" كانو كايجيوه رسائل غرامية مجهولة فاش كنا في الليسي ، دابا فاش كانفكر فيها ، كنت كانغير ، و لكن كان كايلوحهم بلا مايقراهم كان كايعجبني الحال فاش كايدير هكاك ، و بلا مانهضر على دوك العاهرات اللي كانو يجيو عندي نتوسط ليهم معاه ، الكلبات مامتيقاش باللي كاينين نساء كايديرو هكا في هاد العالم ، انا كانتى ، حشمانة في بلاصتهم""
"" و علاش ؟ اذا بغيتي شي واحد خاصك تديري جهدك باش تاخديه و يكون ليك ، كنتي امراة او كنتي راجل ، لا يفرق ""
"" كايبغغيووه ؟!! هادوك كانو باغينو غير حيت زوين داكشي ديال المراهقة ، كيفاش غايبغيو شخص ماكايعرفو عليه حتى حاجة ، كما ان هاد الكلام فيما يخص الحب و بلا بلا جديا ماكايعجبنيش ، خليينا دابا من هادشي ""
ضربات على صدرها فين كاين الوشم و قالت "" شفتي هادي ، يدي انا ، هداك بنادم ديالي انا ماديال حتى عاهرة من هادوك المدلولات ، انا اللي مالحتش راسي عليه خديتو ، و قلعي ، مادرت حتى مجهود باش ناخدو ""
"" ماتستاهليش هاد الحظ ابنت الحرام ، لو كان عندي نصف حظك مع ايدر كان غايكون ليا قدر اخر ""
توسعت ابتسامة تغريد و هي كاتعصر عضلاتها و تدور للجهة الظهر و كاتشوف عضلات الظهر حتى هما ..
تماما كيف كايديرو الولاد فاش كايكونو بوحدهم قدام المراية ..
و بعدها دارت واجهت المراية و هما يوساعو عينيها ..
حذرات عينيها للتحت كاتبسم بانحراف .. غمضات عينيها و هي طير الفوطة .. منين حلات عينيها .. تجمعت الضحكة و من ابتسامة منحرفة لوجه خائب الامل ..
هزات وجهها في المراية و قالت "" ضفاك ؟ فين هو ؟""
"" اشنو هو ؟ "" تسائلت تالا ..
"" هذاك ""
"" ااه ، لا احبيبة ، ماغانفعكش في هادي ، انا ماكانجسد غير اللي شافتو عيني ، السحر ديالي عندو حدود و ماهو غير قدرة على توهيمكم و صافي ""
عاودت حدرات تغريد عينيها للتحت و كان تما بحال تحت الابط ، تنية بلا وااالو ..
عاودت هزات عينيها في المراية و قالت بملامح خايفة و هي كاتشوف في جنابها و من تما للمراية "" نااري ، و الوجه ديال قبايلة فين شفتيه باش قلدتيه ""
ضحكات تالا "" هاذاك غير تخيلتو ""
صاحت تغريد ""اوى حتى هذاك تخيليه ""
"" انا مت عذراء غير متزوجة اشنو كاتخربقي ؟ ""
"" غريتي قبيلة كاملة ، قبيلة كااااملة و ماعندك حتى فكرة ؟ ""
"" حضي فمك اشنو كايقول ، انا ماشي عاهرة ، انا غير عرفت نستافد من اللي كايتلاح بين رجليا ، دوك الحيوانات اللاهتة ماصورو مني والو و ماشي غلط ديالي انهم كايعطيو ..""
ساطت تغريد لايحة كتافها بخيبة امل و دارت واجهت المراية بوراها و هي تهز يديها "" من نيتك ؟ المؤخرة حتى هي ماعندك عليها فكرة ؟ ""
و هي تحنى كاتطل على راسها من التحت و ترجع تنوض تدير كاع الحركات و البوزات فين تبرز ديك المنطقة اكتر قدام المراية و هي دوز يديها من القدام حتال للور و هي تقول "" ضفاك ، دابا ولاو عندي تلاتة البيطان ؟ عرفتي الى خديت سلفي دابا هكا في المراية و سيفطت الصورة لاسلام من رقم مجهول ، ناري ماقادراش حتى نتخيل، اقسم بالله حتى يفقدها ، غايهرب عريان * ضحكات تالا* وا رتاجلي تخيلي شي حاجة حطيها هنا ، مايمكنش مايكون عندك فكرة ""
"" عندي ، و لكن ماشي ، زعما ماشي اسلام ""
وقفات تغريد ""صافي رجعي مؤخرتي ""
و دارت اللي قالت ليها ..
النتيجة خلات تغريد تحل فمها "" لا لا لا لا لا ، شي حاااجة ماشي صحيحة هنا ""
دارت تغريد و رجعت قربات للمراية بوجه مشمئز "" حيدي عليا هادشي ، مامتيقاش باللي كانلعب بجسم اسلام ، اشمن نوع من المنحرفين انا ""
ضحكات تالا "" ماشي الجسد ديالو ، هاذشي غير وهم ، كون كان حقيقة كون رجعت ايدر و سحرتو يبغيني و شلا ماممكن نحققو ، و لكن سحرنا ، ماهو غير وهم ""
"" اه ، كلامك منطقي ،يعني كون السحر حقيقي ماكانش العالم غايمشي بطريقة صحيحة ""
"" بطبيعة الحال ""
"" صافي صافي ، رجعيني كيف كنت بغيت غير نمشي نضربها بشي نعسة ، راسي كايحرقني ""
""و اللهما متيق حرف من هادشي اللي كاتقوليه "" قالها زين العابدين و هو كايمشي و يجي في الدار ..
شافت فيه الاء من طرف عينيها "" علاش ؟ كولشي منطقي دابا ""
صاح بعدما وقف قدامها "" لا ، اللالة ماشي منطقي ليا ""
"" يالله ، شرح ليا انت اسيدي ، اشنو اللي غايخليني كاندير هاد ردود الفعل كاملة كلما شفتو ؟ اشنو التفسير عندك ""
"" ماكايهمنييييش ، و ماتعاوديش تقولي ليا ، كاتحسي بيه ، اولا كاتحسي باحساسيو ، اولا ماكاتبقايش عارفة علاش شي حاجة غير ارادتك كاتجدبك ليه ""
قاطعاتو "" حيت كاين احتمال كبير انه خويا ""
صاح بقوة"" زوج خوت اللي عندك ، زوووج ، زياد و زيد ، هذتك ماشي خووك ، الشوفة اللي شاف فيك و انا في جنبك ماشي ديال خووك ، مامتيقش باللي مشيتي عندو برجليك و معااك ولدي ""
ناضت عندو و هو يبعد و صبعو موجه ليها "" ماتقربيش ليا في هاد اللحظة ، كاعارفش اشنو قادر ندير ""
"" زين العابدين ، حاول تفهمني ، انا كانحاول نكون صريحة هنا ""
قاطعها "" بالزز منك ، بالزز منك تجي و تعاودي ليا بصراحة و بلا ماتخبي ، ماعرفتش اش واقع ليك ، و لكن عقلانيتك طارت ، طارت االاء مابقيتيش كاتوزني ، واش الحمالة و لا شي مشكل عقلي واقع ليك ، كاتعرضي راسك و ولدك للخطر و لا انت على بالك ، و فوق هادشي ، كاتمشي لدار راجل غريب عليك ، و اللي راجلك ضربو حيت شاف فيك شوفة ناقصة ، واش عارفة اشمن موقف حطيتيني فيه ؟ ضربتي بروجولتي مع الارض .. *بعد منهاو عطاها بالظهر* و اللهما متيق هادشي اللي كانسمع ""
"" انا مافكرتش ، انت كاتعرفني فاش كايتيرني شي موضوع ، و حقيقتي من ديما كنت باغية نعرفها و الحقائق اللي عرفت مؤخرا مامساعدينيش ننسا ""
دار عندها "" و تنوضي انت تمشي لدار واحد غريب ؟ واخا ، اشنو عرفتي ؟ ها ؟ اشنو عرفتي بهاد المشية ؟ ""
بعدات عينيها من هدف عينيه اللي شافتهم غايدوزو من خلالها ""والو .. و لكن .. الرجل .. عايش عيشة تعيسة ، ماقدرتش نتجاهلو راه قلت ليك حاولت ن .. ""
"" و انت ماالك ؟ و انت مااال طاسيلتك ؟ يموووت كااع انت اش دخلك ، حليتي مشاكلك بقاو ليك غير عباااد الله ، و الى كنتي هشيشة و قلبك ابيض لهاد الدرجة ، رحمي غير رااجلك بعداا ""
طلع خلااها ..
و جلسات في السداري شادة راسها ، ندمات حيت قالت ليه ، حاليا كاتبان ليها الافكار في عقلها تشوشت ، كانت غاتيق فكرة انه نيت خوها ، و لكن موقف و اللي قالو زاين بدا كايبعد هاد الفكرة ، و اذا اشنو كايفسر انجذابها ليه ، راه مايكنكش ماتكون بيناتهم حتى رابطة و دير تجاهو رد فعل بحال هذاك ..
ماعجبهاش يتاهمها بقلة العقل او فقدان عقلانيتها .. و لكن ، وحدة عارفة راسها في حالة حساسة بحالها و كاتمشي لدار غريب ، عقلانية ، كاتفكر بكامل العقل ؟
"" زين العابدين ، هضر معايا ، اما عارفة راسب غلطت ، و كانعتاذر ، و لكن انا درت الي حسيت براسي خاصني نديرو ، كان عليا نتاصل بيك ، كنت عارفة باللي كنت معرضة راسي و طه للخطر و لكن .. ""
"" و لكن حماقيتي و خاصني نشوف كيفاش نرد ليك عقلك ""
"" زين العابدين ""
"" عطيني التساع هاد الساعة و سيري جيبي ولدك ، وحاولي ماتمشيش لعند هذاك *دار عندها* و اللي بالمناسبة ، غدا غاتعطيني عنوانو ""
بعدت منو "" ماعاطياكش ""
دار بمليتو عندها "" نعام ؟!!""
"" لا ، ماعاطياكش ، ماغانعطيكش فرصة فين تمشي تجبد الصداع مع السيد ، انا اصلا اللي مشيت عندو ، الوقت كامل و هو كايقول ليا رجعي فحالك ""
من الشوفة اللي شاف فيها عرفات راسها قالت اللي ماكانش خاصها تقولو..
ناض عى ركابيه و صاح "" كان كايجري عليك و انت كيف العلقة اللي ماعندها عقل لاصقة تماااااا ""
ناضت هربات من قدامو و تبعها كايغوت "" الاااااااء ""
"" اشنو كاتحاول دير ؟ نطاااق "" اخر كلمة دوى الصدى ديالها ديال الفيلا ..
بلع الوسيط ريقو بتوتر و قال "" سيدي ، انا عارفك معصب دابا ، و لكن.. ""
""و لكن اشنو .. اشنو ؟ انت عارف في عالم الحراس ، ماكايرتابطو و يتزوجو غير مرة وحدة في العمر ، علاش في نظرك انا مازالني كيف ما تولدت حتال دابا ؟ واخا دازو سنين ، حيت باغيها حارسة ، باغيها تولد ليا حراس اصليين ، كان ممكن نتزوجها بشرية من شحال هاذي ، علاش في نظرك حياتي واقفة ، علاش في نظرك صبرت هاد السنين كاملة ""
"" ماعندك حتى خيار اخر اسيدي ، هادشي اللي كانحاول نقول لك ، هي في الاصل ديالك اسيدي ، جاتك نبؤتها منين تولدات ، كانت مراتك حتى قبل ماتتلاقا هاد راجلها ، مايمكنش تستسلم بهاد البساطة و تضرب سنين من العذاب و الانتظار هكاك ، تجاهل نفورك اسيدي ، انت قوي تقدر ديرها ، شوف من الجانب الايجابي ، على الاقل هي ماغاتنفركش انت مارتابطتيش من قبل ، بالعكس هي منجذبة ليك ، اقناعها غايكون ساهل عليك ، خاصك انت تغريها ، اذا بغيتي كولشي غايجيك ساهل ""
وقف ايفارديت احمر بالغضب ، ضرب بقبضتو بقوة على الطاولة قدامو و صاح "" واش كاتسمع راسك اشنو كاتقول ، كاتكلم على امرأة مزوجة ، امراة حاملة ، عندها ولاد ، عندها عائلة ، امرأة عندها حيااة ، واش كاتشوف من اخلاقي نستغل غرائزها باش ندمر ليها كولشي هادشي ، كيفاش تجرأتي حتى تقول هاد الكلاام قداامي ، ابداا ، نفضل نمووت ، و كيفما انا نقي من اي ريحة وحدة اخرى ، بغيتها حتى هي تكون نقية ، ليا بوحدي ، ماسبقني ليها احد ، مانشم فيها غير ريحتي انا، هكا تخلقنا ، و ماغايتبدلش هادشي مهما كانت الظروف ""
"" و لكن اسيدي هي ديالك .. ماغاديش تسرقها ، غاترجعها ليك ، و لادها ممكن يبقاو مع باهم ، و لكن الحياة السليمة غاتكون معاك انت ، الحياة الحقيقية ديالها غاتكون معاك ، هنا بلاصتعا معاك و في جنبك ""
هز يدو "" سكت عليا ، هي تخلقت باش تكون مراتي و لكن هادشي ماهو غير جزء من حياتها ، هي .. قدرات تبني حياة انا ماكنتش موجود فيها ، ضد اخلاقي نهدم ليها كولشي ، و ماتنساش انا مابقيتش باغيها ، قدما كنت متشوق ليها قدما انا دابا بردت من جيهتها ، اخر مرة تمشي عندها ، خليها لحياتها و خليني لحياتي .. و قريب غاتمشي حتى انت لحياتك ،مابقيتش محتاجك ..""
""سيدي.. اشنو كاتقصد ؟ ""
تجاهلو و هو طالع يتخبى في المخبأ ديالو من جديد ، منتفخ الاوداج ... يائس ... و كايقطع القلب ..
جلسات تغريد في مكانها على الطابلة و حطات امها الطاجين ..
حكات عينها من اتر النعاس اللي يالله فاقت منو ..
قطعت دغمة و حطاتها في فمها ، من ورى النعاس في العشية ضروري ماتفيق خاسرة ، خاصة و هي ناعسة بحريق الراس ..
عائلتها في هاد اللحظة و بصداعهم كايبانو غير ديال تشعل فيهم العافية و كون ماكان الجوع ماكانتش غاتجلس معاهم و هي بهاد الحالة ..
ماكانتش عارفة اشنو كايقولو و لا اشمن موضوع جابدين و لكن كان موضوع مثير بحيت كلهم كانو داخلين فيه .. الا هي ..
و في ديك اللحظة سمعات سميتها ..
هزات عينيها تجاه باها و قال "" معاك داوي ""
"" اشنو قلتي ابابا ؟""
ضحكو الكل و تقلب عينيها بملل ..
"" قلت ليك ، واش بغيتي تخدمي ؟""
بلا ماتفكر فيها جاوبت "" لا ""
قال خوها "" خدمة غاتبقاي جالسة فيها النهار كامل ""
ضحكو من جديد و قال سليمان "" واضبرو للمعكازة في خدمة و تتشرط من الفوق تبقى جالسة و ماتتعذبش فيها ""
و رجعو ضحكو .. تنهدت بدون ماتجاوب ، غير كاتاكل ..
قال خوها "" هضرت ليك على صاحبي و حيت عندك الانجليزية عندو ليك بلاصة في سونطر دابيل ""
"" مابغيتش ""
قالت بنت عمها"" كايخلصو مزيان الزمرة ""
حطات اللي فيديها و قالت بنبرة هادئة " واش ماكاتاخدوش لا جواب ؟ ""
"" اوى لوالديك حتال ايمتى غاتبقاي هكا ، لا خدمة لا ردمة راه ماغاندوموش ليك ""
"" خدمة في سونطر دابيل هي الي غادوم ليا ؟ ""
"" و اليوتيب هو اللي غايدوم ليك متلا ""
هزات عينيها في سليمان .. هذاك المتنمر المستفز .. و هي ترجع ترمش كاتبرد في راسها و قالت "" اشنو دابا تقاضاو ليكم المواضيع باغين طلعو هاد الليلة على حسابي ؟ ""
"" واش قلنا ليك ، مضبرين ليك في خدمة و كاتحلي في فمك تما ؟ "" كان خوها ..
جبدات الهاتف ديالها .. ووجهاتو قدامهم ، و وراتهم المبلغ اللي وصل ليه الvlog ديالها ..
عينين سليمان خرجو و خوها سكت و اللي بعاد عليها كايحاولو يفهمو ..
قالت لخوها "" قيد شحال كاتسالني ، و انت الاخ سليمان ، اليوتيب ممكن نديرو غير طبق جانبي و طلعت منو قد او اكتر من خلصتك اللي كاتدمر عليها انت شهر .. و هاد العشاء خليتو ليكم ""
صاح باها "" الله يهديك ابنتي راه هضرو معاك لمصلاحتك ""
صاحت امها ""رجعي تعشاي ماكليتي والو ""
كانت تغريد حدا الباب منين غاتنزل و لكن طاحت في بالها فكرة "" تالا ؟ ""
"" نعام ؟!""
"" حرمو فيا العشاء ""
ضحكات تالا "" هي اللي ماتعاود ""
سمعات تالا كاتلوح شي تعويذة .. و من بعدها الصقييييل ..
و من تما غوت عمها "" شكون طيبات هاد الطاجين مالو عامر زغب ""
قال فيصل "" هاذشي ولا ماالح لا ؟""
صاحت سكينة "" ياااع اشمن لحم هذا ""
سمعات امها قالت بصوت مظطرب "" العناق ديال بيبي ""
قالت مارية "" كايبان بحال الحنش لا ؟ ""
حلات تغريد فمها بصدمةو قالت تالا "" تفكري ، غير وهم ماكاين والو من داكشي ""
و ديك الساعة سمعات سليمان كايرد و كولشي بدا يغوت عليه "" سيري لطواليط "
"" اويلي اش وااقع ؟ ""
"" الحيوان رد على الطاجين ""
"' على زينو من طاجييين كانت ناقاصاه غير التقية ""
و هبطات خلاتهم مضاربين .. و هي كاتضحك و هي كاتقول "" غير بلاتي ، غانلقى هدف في حياتي و غانجح فيه و غاندير عليهم كاملين كتاب و نديرهم الاشرار اللي كانو كايضحكو على احلامي ""
و ماجات غير في اسلام في الطابق التحتاني .. طالع كايتفوه و يديه في جيابو ..
طلعات و نزلات فيه "" فين كنتي انت ؟""
"" باقي مارقيتك للمنصب فين كاتكون عندك هاد الصلاحية ""
دارت يدها على جنبها "" اهااه ؟ و الapp ديال Gps اللي درتي ليا في تيليفوني انت في منصب يسمح ليك بهاد الصلاحية ؟ ""
هز عينيه كايدير راسو كايفكر و قال "" بالنسبة لحالتي انا مامحتاجش منصب ، انا عاطيك قلبي ، اغلى ماعندي ، يعني اقل مايمكن تعطيني انت هو نعرفك فين كاتكوني ""
"" لا اسي اشمن منطق هذا ، راه حتى انا عاطياك قلبي اغلى ماعندي ، لا ماشي قلبك هو اغلى ماعندك ، نفسك هي اغلى ماعندك ""
قالت بغير فهم "" اشنو كاتقصد ؟ ""
كايقصد انه كايبغي مشاعرو و كايبغي الجانب العاطفي فيه ، حيت عارفو احسن نقطة في شخصيتو و كايحميه و يحافظ عليه من ناس ممكن يستاغلو هادشي و يشوهوه ..
اما هي فكتبغي نفسها ، كاتبغي نفسها كشخص ، كاتفضلها كشخص و هذا شيء ميل اكتر لانانية ..
قال ببساطة غير موضح كلامو .. ماغاديش يفضح نفسو الداخلية قدامها ، واخا هي مالكة ما هو اغلى عندو ، قلبو ..
"" والو ، زيدي عليها ، واخا نكون ملكت قلبك ، قلت ليك من قبل ماكافينيش "" قرب ليها اكتر و قال بنبرة اكتر هدوءا "" انا باغيك كلك اتغريد ""
دفعاتو بيديها "" اشنو كاتقصد بكلك ، حتى واحد ماكايملك شي واحد اخر بكلو ، انت دابا عاطيني كلك ؟""
بابتسامة غريبة جاوبها "" القلب هو كولشي "" و داز من قدامها مكمل طريقو ..
ماعرفاتش علاش انتابها احساس غريب ، بحال الى خيبات املو ، ابتسامتو ضراتها في خاطرها .. بحال الى كان كايعتارف بحقيقة ماليه يد فيها ، حقيقة محزنة ..
قالت لتالا "" اشنو بان ليك في هادشي ؟ ""
"" بان ليا هو انه عارف مزيان باللي ماعمرو غاياخد داكشي اللي بغا ""
"" بلا ماتحمقيني حتى انت ، اشنو بغا ؟""
"" هاذي هي المشكلة ، انت ماعندك حتى فكرة ""
قلبات تغريد عينيها و دخلات للغرفتها "" بغيت نفهم علاش انا ضايرة غير بالعاطفيين ؟ بغيت نتلاقى غير شي احد ساهل مامعقدش ، نتلاقاو نستمتعو باللحظة و نتفارقو خوت ، ماكايتسنى مني مانتسنى منو ، جديا ""
خدات هاتفها و مشات للواتساب ، سيفطات ميساج للياسمين ، كانت اونلاين و لكن ماكاتجاوبش .. دازت لهناء و لقاتها مبلوكياها اصلا ..
حلات تغريد فمها بصدمة و مشات شافت الفايس و حتى الانسطا نفس الشي .. و قالت "" اويلي واش هاذي حماقت ، علاش بلوكاتني ؟ ""
و هزات راسها كاتفكر واش دارت شي حاجة .. و لكن عقلها ماكايجيب ليها حتى حاجة ..
اخر مرة تشاوفو هي منين حطاتهم بالسيارة في الحي ... من تما مابقاوش هضرو حتال قبايلة ..
"" ناري خلعتيني كايسحاب ليا البشر ولاو ذكيين حتى وصلو لمرحلة اختلاق السحر ، و لكن دابا جديا بنتو ليا مكلخين ، زعما كاتصطانعو انكم مانعين انفسكم من بعضكم في هاد الخرشاشات و في الحقيقة كاتقدرو تشوفو بعضياتكم ، واش ماكاتحسوش بهاد الغباء ""
و ارتفع ضحكها ..
قلبات تغريد عينيها "" يالله باركة من القصف ، ماشي كلنا مكلخين و غير جالسين و نبلوكيو ، البلوك كاينفع متلا مع هادوك اللي كايبقاو يسبو ، كاينفع في انك اذا مابغيتيش شي احد يبقى متبع حياتك ""
"" و لكن اشمن حياة ، راع ممكن يبقى متبعك في الحقيقة ""
