قاطعها كايغوت و سمعات خبطة على المكتب "" الاااااء ، اقسم بالله ياحتى تلقايني فوق راسك .."" و ديك الساعة قطعات عليه ..
"" يالله شد "" عاود اتاصل و هي تقطع "" ماسميتكش زين العابدين الزغبي الى ماخرجتيهاش مني "" تقطع الاتصال و بعدها جاها ميساج
《 اقسم بالله العلي العظيم و تزيدي لشي قنت انا ماعارفوش حتى غاتشوفي وجه اخر عمرك شفتيه ، انا دابا غير كانهضر 》
رمات تيليفونها حابسة البكية "" قالك غير كايهضر ، تهديد صريح نييت .. *دارت لولدها* رصى حتى انت صدعتيينييي ""
و غير مازاد في ركيلو و صداعو و هي ترجع تشد راسها ..
كانت راجعة تغريد بعدما تيرات كل الفلوس اللي وصلوها في كونط اسلام .. و هي كاتفكر واش غير دير ديالها و لا تبقى هكا لان اسلام اصلا ماعندوش مشكل في هاد الخصوص .. و ماكايقيسش فلوسها ..
فكرات في الكلام اللي قالت ليها تالا و دازت لعند صحاباتها و لكن شافت غير ام ياسمين و خبراتها باللي خدامة هي و هناء ..
منين كانت راجعة و هي كاتنش على راسها من الصهد جاها اتصال من اسلام ..
"" يالله فقتي ؟""
"" هههه يالله فقت ؟ فقت قبل منك و خرجت مع النبوري ، جريت و فطرت حدا البحر ، صدقت عمت بسباب الصهد و تشمشت ، بعدها كليت و رجعت دوشت و تكيت شوية عاد عيطت ليك ""
و تخيلاتو مزنك بلا تيشورت متكي في بلاصتو ..
"" بوحدك ؟ ""
"" و مع من ؟ ههه ياكما غاتبداي ديري ليا داكشي الحامض ديال البنات 'كنتي بوحدك و لا كانت معاك صاحبتك ' و ديك بلا بلا و التمتيل ، انا ماعنديش معاه ""
ماعجباتهاش لهجتو "" لا ماشي هكاك ، زعما ، كنت بغيت نمشي معاك ""
"" ماشي ضروري نكونو مع بعضياتنا كل نهار و كل بلاصة ""
"" ا.. اوكاي "" احساس بالدنو خايب انتابها ..
غير الموضوع "" شفتك خيطتي المدينة ؟ ""
"" كنت في البنك و رجعت للحي و قررت نمشي لفين خدامين هناء و ياسمين نطل عليهم شوية و لكن مالقيتهمش يمكن ماكايخرجوش برى المعمل في هاد الوقت او يمكن تعطلت ""
"" على رجليك ؟""
""اه كنت باغية نتمشى .. ""
"" كيف درتي للهاد الكعطة كاملة تحت الشمس ؟ رجعي فحالك و خودي شي طاكسي راك ماشي فقيرة هاد الساعة.. ""
"" حتى نشوف ""
"" اش غاتشوفي ؟""
"" مابغيتش نجلس معاهم هاد الساعة ؟""
"" علاش ؟ وقعات شي حاجة ؟ ""
"" ماعندو مايوقع ، انا غانقطع ""
"" تي دوي اشنو قالو لك ؟ ""
"" وا صافي اسلام ، drop it ، يالله حتى نتشاوفو ""
و قطعات ..
سمعات تالا في وذنيها "" تشهيت الطاجين بالخضرة ""
"" ياااع ""
"" ناااري ماتقوليش ليا ماكاتحمليهش ، انت اشنو كاتاكلي اصلا ؟ النهار و ماطال و انت كاتنقزي من هنا لهنا بالزز باش كاتاكلي شي ماكلة ديال بالصح ، فين المسمن بانواعو فين الرفيسة ، فين الكسكسو ، فين الحلاوي ، فين الحرشة ، فين الطواجن ، فين الخبز الفراح بالزبدة و العسل ، فين .. ""
"" صااافي ، كهمتيني ، انا ماشي شي وحدة لي شهيتها كبيرة و ماكاناكل غير على قدي ، الجوع ماكايجيني انا غير بالليل ، و ديما كانطلع كانلقى السيد موجد ليا شي حاجة ، داكشي علاش ""
"" لاحظت ، و انا اشنو دنبي ""
"" واش بغيتي نيت تعرفي ذنبك ؟ ""
"" صافي بلاش ""
"" اوى هنينا ، الاحاسيس اللي في ذاتي ماكانحس بيهم غير انا ، انت غير زايدة ""
كانت اصابعو كاترقص بخفة فوق البيانو و هو مغمض عينيه ، مخشع في المقطوعة اللي كاتعزفها يديه ، و اللي في وقت من الزمن قدمها قدام حشد كايقدر هاد النوع من الفن الراقي و الساحر ، معزوفة كانت قطعة من روحو ، معبرة لجزء منو ماقدرش يعبر عليه بلسانو ، على وحدتو .. معزوفة كانت من لحنو هو الخاص ..
كان الوسيط وراه كايشوف فيه كيف العادة .. كايتحسر و يتألم ليه ..
فجأة سمعو كايقول ليه "" علاش مادرتيش الولاد أ حسن ؟ النعمة اللي كانت بين يديك ماعارف قيمتها غير اللي بحالي و انت ادرى ، كما ان خدمتك كوسيط عندي ماغاتأترش على حياتك ، حتى انك كان ممكن ليك تولد حارسة و تزوجها ليا ""
سمعو تنهد و ماجاوبش ..
دار ايفارديت لعندو بعدما انهى معزوفتو الحزينة "" عاد لاحظت باللي دوزنا عمر مع بعضياتنا ، و ماعمرني سولتك ""
"" يمكن كنتي ملاهي مع همك ؟ انا عقيم اسيدي ، فاش تلاقينا كنت طلقت اسيدي ""
بانت الصدمة على وجه السيد و لكن مابعدش برد فعلو .. و ماحاولش يجبذ عليه المواجيع .. ماعمرو كان من الناس اللي يجلس و يتصنت للاخرين ، همومو كانت مشكلة حيوط عالية عازلاه على الاخرين . و في الاخير ، اكتشف باللي الوسيط ديالو كايعاني تقريبا من نفس المشكل ، وهو الوحدة الابدية ..
ناض من فوق البيانو و حل المكان المخصص بتخزين المشروب و لكن ملقى والو ..
دار شاف فيه "" فين المشروب ديالي ""
"" انت عارف اسيدي ""
"" اوى جيبو اخر ""
سكت الوسيط كايشوف فيه و بعدها بجراة هزز راسو رافض لامرو .. و اول مرة فحياتو معاه كايديرها ..
"" انا اسيدي وفي ليك ، و وفائي ليك كايمنعني نعطيك السم باش غاتقضي على حياتك .. ""
"" واش كاتهضر على الحياة اللي توقفات شحال هاذي ؟ انا وحلت في عمر 30 عام من زمان بعيد ، و هكا غانبقى اذا ماتزوجتش ، حتى نأدي مهمتي في الحفاظ على استمرار نسلي عاد غانتقدم في السن ، هادي راها لعنة ، ماشي حياة ، انا ماغانصبرش مازال .. عييت ، عييت ماننبقى نقول هاد الهضرة كل مرة ، ليك انت و للحارس الاعظم .. عيييت ""
"" ماعرفتي اسيدي تولد شي حارسة اخرى ، انت عارف باللي اخر حارسة تولدات فات عمرها العشرين ، و ممكن نلقاو العشيرة التانية و تزوج من عندهم ""
""حنا ماعارفينش احوالهم فين وصلات ، كما انك عارف باللي كل حارس ، كاتولد حارسة خاصة بيه ، كايعرفها بالنبؤة اللي كاتوصلو ، حارسة من عشيرة اخرى ماجاتنيش نبؤتها ماشي ديالي ، انت عارف كيف كاتمشي الامور عندنا ، و فين غاتولد هاد الحارسة تاني ، خاصنا وسيط ، او انا اللي خاصني نولدها ، بشري ماعمرو غايولد من جنسنا ، واخا يتزوج من عندنا .. "" و وساعو عينيه بادراك"" باها كان وسيط ، ياكما الوسيط اللي هرب للحارس الاعظم ؟ ""
فكر شوية قبل ما يجاوبو "" فكرت في هادشي حتى انا ... يمكن عندك الحق""
"" فهمت علاش كان كايحميه الحارس الاعظم مني و خلاه يهرب ، كان عارفو غايولد الحارسة ديالي ""
"" هادشي اللي بان ليا حتى انا اسيدي ""
"" و لكن اشنو وقع ، بعدما خليتها حتى كبرت و تفتحت ، خطفها واحد مني ، بكل جرأة ماعارفش باللي جات لهاد الدنيا لواحد تسناها عمر ، سنين طويلة ""
دار غادي منحني الكتفين ..
حدر و غمض الوسيط عينيه و قال فجأة "" انا كانستاقل من خدمتي كوسيط ""
وقف ايفارديت .. بظهر متشنج و دار عندو ببطئ ..
منين هز الوسيط حسن عينيه فيه ، لقاه مصدوم .. مامتيقش اللي سمع ...
كانت ال3 و نصف منين وصلات تغريد للدار ..
جلسات في فراشها و جبدات التيليفون و لقاتو طافي .. دارتو يتشارجا و جبدات المبلغ المالي اللي فرقاتو بعناية بين جيابها باش مايبانوش في جيابها و خزناتو في صندوقة صغيرة معدنية كاتقفل بالساروت و خباتها وراء حوايجها في الماريو ..
نقصات عليها الحوايج و حلات الشرجم للشوية ديال البرد و تكات في بلاصتها ..
"" غير قولي ليا ، كيفاش هاداك الخير كلو خسرتي عليه الفلوس و تخليه ليهم تما ""
"" كان ممكن نعيطو لشي واحد ماعندوش يكملو ، ماشي ضروري ندكو في ذاتي ""
"" انا كنت مشهياه و باغياه ""
"" انت تشهاي و انا نهز التقل ""
"" واصافي ""
"" انا ماعرفتش علاش كانحس براسي مقلقة ""
"" كاتهضري من نيتك ؟ كاين شي احد ماكايعرفش راسو علاش مقلق ؟ ""
"" ماعرفتش ، بعد المرات هكاك بنادم كايتقلب ليه المزاج واخا مايكونش سبب ""
"" ممكن ""
"" او يمكن ، بسباب اسلام ؟ ""
" اشنو دار لك اسلام ، واش على البارح ؟ ""
"" لا ، على اليوم فاش عيط ليا ، قال ليا خرج اليوم كامل بلا بيا و منين قلتها ليه ، ماعرفتش هضر معايا بطريقة ، حسيت بيه كايدفعني بيها ""
"" واش تقلقتي حيت ماداكش ؟ ""
"" كان غايعجبني نكون معاه ، و لكن اذا بغى المساحة الشخصية الخاصة بيه كنت غانتقبل الوضع ، انا ماشي من النوع اللي كايلصق و ماكايفهمش راسو و كايقتاحم المساحات ديال الاخرين ""
"" اذا اشنو المشكل مادامك متقبلة هادشي ""
سكتات تغريد كاتفكر تم قالت "" يمكن زدت فيه ، انا عادة كانتقبل رفض الاخرين ، كانتقبل فكرة ان شي احد ماباغينيش ، ماعنديش مشكل نهضم بحال هادشي ، بالعكس كانعاون الناس انهم يخرجوني من حياتهم ، ماكانعقدش العلاقات ، او نقولو حتى نهاية العلاقات ""
"" يمكن حيت حتى احد ماكايهمك ""
"" المهم ماكانآديش ""
"" بطبيعة الحال ، و لكن اشنو المختلف في وضعك مع اسلام دابا ""
سكتات تغريد من جديد كاتفكر و رجعت قالت "" ان دفعو ليا ضرني ، و انني مابغيتوش يحطني في واحد الزاوية في حياتو اللي يجي ليها غير الوقت اللي احتاج ""
"" و لكن هكا الرجال دايرين ""
"" هاذشي في شكل ، ماعمرني تدمرت بهاد الخصوص ، عمرني قلت و لا حسيت بشي حاجة بحال هكا .. واش حماقيت ؟""
"" لا ، غير اسلام غيرهم ، هو الوحيد اللي بان ليا كايهمك ""
"" بطبيعة الحال هو الوحيد اللي كايهمني ، هذام راه عائلتي كلها ، جزء مني ، بطبيعة الحال غايكون غيرهم ""
"" اوى الحمق بان ليا ملك كولشي غير ماشاف والو ""
"" اشنو كاتقصدي ""
"" قصدي هو تمشي عندو و تقولي ليه هادشي ""
"" حماقيتي مستحيل ، اشنو غايقول عليا ، حمقة ؟ مابغيتش نكون وحدة كاتلصق ، بحال شي مهووسة تقلقات و تعصبات غير حيت قال ليها دوز شوية ديال الوقت بوحدو ، كيف قلتي الرجال كايبغيو مساحتهم و انا غانعطيه مساحتو حتى يشبع منها ، كما انني عندي شخصية مستقلة بحالو ، حتى انا كانبغي مساحتي الخاصة .. و كوننا مع بعضياتنا لا يعني اننا نبقاو لاصقين في بعضياتنا الوقت كلو ""
"" اشمن نوع من الحب هذا اللي عايشينو دابا ، انا حبيبي كنت ديما متشوقة نشوف وجهو الحبيب ، واخا ماتبسم ليا و لا مرة ""
مازادتش معاها الهضرة دارت للجهة الاخرى و غمضات عينيها .. حتى حسات براسها كايديها النعاس.. و هي تسمع الشرجم تسد ..
"" انا فاش قلت ليك قريب غاتوقف خدمتك كوسيط .. كان قصد.. "" قالها ايفارديت بتغوبيشة غير راضية على وجهو ..
الا ان الوسيط حسن تبسم ابتسامة حزينة و قاطعو "" عرفتك اشنو قصدتي اسيدي ، باللي انت ناوي تنهي حياتك ، و وسيط بلا سيد ماكايبقاش وسيط ، انا ماغاديش نجلس نتفرج فيك هكا كاتموت اسيدي ، واعدت الحارس الاعظم باللي غانحميك من نفسك ، و غانوفي بيه ، انت غير حزين ، خليني انا نتولى هادشي ، كيفما ديما اسيدي ""
"" باش غاتوقف معايا ؟ غاتخلى على خدمتك ليا ، غاتخلى على صداقتنا ، سنين طويلة ديال العشرة ؟""
بلع الوسيط ريقو ، و حدر راسو مخلل صباع يديه في بعضهم قدامو و قال بنبرة حزينة "" غانلقى ليك وسيط اخر ، رجل اللي تيق فيه ، يكون ذراعك اليمين ، انا اساسا شرفت مابقيتش قاضي الغرض ، خاصك دابا شاب ، حيوي و نشيط ، مواكب هاد الوقت ، انا غانبقى في جنبك اذا سمحتي اسيدي و لكن ماشي كوسيط.. ""
سكت ايفارديت كايشوف فيه ، مامتقبلش فكرة انه غايكون ليه وسيط غير حسن ، عقل منين تلاقى معاه قبل 35 سنة ، كان شاب في عمرو 25 سنة ،وحيد يائس من حياتو ، شاف فيه التميز ، عاونو يستجمع نفسو و ماندمش و منين عرفو يستاهل تقتو جعلو وسيط ، و ماعمرو خان تقتو .. ديما كان تما موجود ..
كان اول وسيط ليه ، الوسطاء اللي سبق تعاملو معاه كانو وسطاء باه ، كايتواصل معاه عن طريقهم ، عاش سنين طويلة بدون خدمتهم ، و حسن كان اول واحد ليه و ماكايشوفش شي واحد اخر ياخد بلاصتو .. واش ممكن يلقى صداقة نقية بحال صداقتو مع حسن ؟ الحظ ماكايضربش في جهة وحدة زوج مرات ..
"" فاتتك شي حاجة هنا الوسيط ، انا ماباغيش نعيش ، ساليت من الدنيا ، تضحيتك بالمنصب ديالك ماعندو باش ينفع ""
"" غاينفع اسيدي ، غاينفع ، الوسيط الجديد غايقدر يولد لك حارسة ، انا غانبقى في جنبك ، غاصبر مزال غير شوية ، غير شوية اسيدي ""
ضحك ضحكة ساخرة ""هاد شوية كاتعني 20 سنة اخرى او اكتر، انا مابقيتش مازال باغي نعيش ""
"" تموت و لمن غادي تخلي املاكك ، و اللي فنيتي عمور فيها باش تبنيها ، غاتستسلم بعد هاد الصبر بكل جبن و انانية ، نسيتي باللي استمرار النسل ديال نوعكم كلو على كتافك انت ، هادشي علاش عمرك واقف ، هادشي علاش الحارس الاعظم حتى هو ماقادرش يموت ، حيت كايتسنااك ""
دار ايفارديت كايدوز يدو على وجهو بانزعاج و كمل الوسيط كلامو ..
"" الوقت اللي غايجي الحارس الذكر الحفيد لهاد الدنيا ، انت غادي تاخد المنصب اللي كان خاصو يكون ديالك من شحال هاذي ، الحارس الاعظم و هكا غايتطلق سراح باك حتى هو ، هو كبر و عيى ، انت مازال شاب ، مازال عندك شلا مايدار ، هو معول عليك ، العالم ديالكم محتاج ولدك .. محتاج بزاف الولاد منك ""
"" كاتبني احلام كبيرة الوسيط ، واخا نجيب ليا وسيط اخر ، كيفاش غانتيق فيه ، كيفاش غانقنعو يولد باش نتزوج بنتو بعد 20 عام ؟ باش حنا اصلا غانعرفو انه غايقدر يولد بنت ، هذا ماشي حل نهائيا ، الحياة ماشي ساهلة كيف كاتخطط ليها انت .. ""
"" سيدي ، اللهم نجربو اولا نبقاو نفكرو في الفرضيات .. انا مستحيل نخليك تضرب هاد الصبر كلو في والو و تقتل نفسك .. مستحيل ، الوسيط الجاي ، انا اللي غادي نجيبو ليك ، و بنتو الاولى غاتكون حارسة ، و غاتكون مراتك ، ان شاء الله ""
سدات الاء باب السيارة بعدما خلات ولدها عند نعيمة ... قادت السمطة و حطات يديها على كريشتها ..
كانت عارفة عينين زين العابدين عليها ، غايتقبو وجهها الجانبي ..
ماتحملتش دارت عندو لقاتو كايعض على عظم فكو و صاحت "" اشنو ؟ ""
صاحت "" الليل كلو و انا في جنبك كانحزر فيك و نعتاذر ، عاودت لك كولشي و ماخبيت حتى حاجة واخا عارفاك اشنو غاتقول و اشنو غاتدير ، كنت كانتسنى منك تتفهمني ، تعاوني في هاد الحريرة ، تعاوني نريح راسي ، و لكن اشنو داير انت ؟ غير كاتغوت و تعصب عليا و تفقصني ، و من بعد تتجاهلني و تعطيني بالنخال و تعاود تفقصني ، و من بعد تجي تقول ليا ماكانتعتارفش باغلاطي ؟ ""
""اعتذاراتك ماكافيينش ، خاصك ديري عقلك و توزني فعايلك ، واعدتيني تنساي الموضوع و مادازتش زوج سوايع لقيناك راكبة طموبيل راجل اخر باش ترجعي في العشية و تقولي لينا لقيت عائلتي الحقيقية ""
"" انا كانقلب ، يقدر الامر ماكايعنيكش ، و لكن كايعنيني انا ، ماكنتيش مهتم ماتدخلش خليني نعوم بحري ماسوقكش فيا ... حتى من خوتي و اللهما بقاو عطاوني وقت ، مابقاوش كايديو عليا ، ماكاتعرفو غي تنكرو و تعصبو عليا .. ""
""خوتك انا اللي عاودت ليهم كولشي ، و اذا ماعطاوكش وقت ، راه حيت معصبين منك ، مقلقين منك ، حيت حماقيتي ""
"" حماقيت ؟ !!""
"" اه اللالة ، حماقيتي ""
"" واخا ، طلق دينا فين غاديين دابا ""
من طرف وجهها شاف الدموع كايتكونو فمقلتيها ..
تنهد بغير حيلة و استسلام و جر يدها ..
نطراتها من يدو و زادت بعدت منو ..
و مالقا غير يديماري بالسيارة في سكات تام ..
دارت تغريد عينيها تاملين بالنعاس .. و مالقاتو غير اسلام اللي واقف مسند على الشرجم ..
"" فين ناعسة و مخلية الكولوندير كايضرب في ظهرك ""
عاودت رجعت كيف كانت و غمضت عينيها "" خليه فيا الصهد ""
هاد المرة حسات بذراعيه مربعين نزلو الفراش بضغطو عليه و طل عليها من فوق وجهها "" فيك النعاس ؟ ""
و بعد صمت بسيط حاولت الطبيبة تخلق ليهم جو حيوي و حماسي ، لاحتها "" عندكم ولد ""
وساعت ابتسامة الاء و ضحك زين العابدين ضحكة من تمت هزيمته "" دارها بيا الخوينز ""
ضحكت الطبيبة و قالت "" اللي كايهم هو صحيحتهم .. ""
هزز زين رأسو موافق كلامها و طل على مراتو ... لقاها مازال ساهية .. كاتشوف في جنينها و ابتسامة جد حلوة على وجهها ..
فرحانة حيت عندها ولد ، على اساس تجربة طه كانت كاتشجع تولد ذكر اخر ..
و لكن ما عساه يقول ، هاذو هما النساء ، علاقتهم بالحمل و والولاد بحال المعجزة ، شي حاجة اللي ماليها تفسير ..
و مادامو كايشوف مراتو و ولادو معاه بصحة و سلام ماباغي حتى حاجة اخرى ..
قاطعت تفكيرهم الطبيبة و لكن نبرتها كانت قلقة "" الضغط ديالك ماكانش طبيعي فاش قستو ليك قبايلة ، و نبض الجنين ابطئ من المعتاد ، خاصك تردي البال لحالتك المزاجية ، بعدي من اللي يعصبك ، الافرازات العالية من الهورمونات ممكن تسبب بتشوه للجنين او يتولد ليك ولد كايعاني من التوتر و العصبية *دارت عند زين* حاول ترد ليها البال اسي الزغبي ، الشهر الخامس كايكون حساس شوية ، و خطر الاجهاض باقي وارد ، و حاولي ا الالة الاء ماتديريش حركات عنيفة ، ماتهزيش التقل ، هادشي راك عارفاه مانوصيكش ""
منين شافت في زين العابدين و هي مخنزرة لقاتو كايشوف في الطبيبة بقلق داز ليه منها ..
"" واخا ادكتورة "" و شاف في مراتو ..
ناضت الطبيبة من مقعدها "" يمكن ليك تمسحي الكريشة بهذا ، و لحقي بينا .. ""
منين ركبو السيارة بزوج .. مد زين العابدين يديه على كرشها و قال "" سمح ليا اولدي هضرت معاك بصيغة المؤنت من قبل ، طعنت ليك رجولتك اولدي "" نطراتو الاء مخنزرة فبه بملامح مشمئزة من كلامو و لكن زاين رجع يدو لكرشها و حذرها بنظرة صارمة الا انه كان واضح باللي كايلاعبها "" و لكن توقعاتي هاد المرة كانو مضروبين في ال0 ، حدس ماماك اولا زهرها غلب هاد المرة ""
سند بذراعو على مسند المقعد ديالها و قال و هو كايشوف فيها "" الماما ديالنا مابغاتش تطلق الضحيكة خلاص "" حذرات عينيها كاتلعب بصباعها .. و من حركة ماتحت شفتها السفلية عرفها كاتحبس البكية ..
تنهد و طلق السمطة ديالو و قرب ليها .. عنقها و حط راسها على صدرو و يدو على حنكها .. الدموع دازو و دابا كايمسحهم ..
شافت تغريد ياسمين كيفاش نغزات هناء و تجاهلت الامر "" و علاش ؟ اشنو درت ليكم مافهمتش ""
هزات هناء راسها كاتضحك بسخرية .. "" والو ، غير استعملتينا و قلبتي وجهك ""
""استعملتكم و قلبت وجهي ؟ ""
قالت ياسمين "" واجهنا مشاكل مع عائلاتنا ، هناء صرفقها باها و بابا كون ماحبساتو ماما كان غايجي يتبرى من باك و خوتك ""
"" عادي ، هادشي هضرنا فيه قبل ما نسافرو اشنو كنتو كاتسناو ؟ هادشي علاش قالبات وجاكهم ؟ حتى انا سمعت الهضرة ، و راه اسلام فين جالس يقول ليكم ، هو براسو خرجها مني ..""
كان كايسمع اسلام و لكن ماتدخلش بينهم خلا تركيزو في تيليوفونو ..
"" لا ، غير تسممت بالفكيع و بت في السبيطار و قضيت دوك اليوماين منفوخة حتى النعمة ماقدرتش نسرطها ، بانت شي حمارة فيكم طلات عليا ؟ لااااا ، السيدات كانو مشغولات كايجبدو اي سبب مهما كان بايخ باش يتقلقو مني و يصنعو مشهد من والو ، ماعندكم دراما في حياتكم بغيتو طلعوها على كتافي انا ؟""
ياسمين ماتكلماتش ..
و لكن هناء "" اوى و الايام اللي وراه ؟ المرض ماحبسكش تقادي الفيديو و تلوحيه ، بطبيعة الحال الامر كايتعلق بالفلوووووس ""
هز اسلام عينيه فيهم كايعض على فكيه ، ظاهر ان شي حاجة تقالت استافزاتو و لكن رغم ذلك خلا البنات بينهم و فضل يبقى داخل سوق راسو ، كيف ديما ..
صاحت تغريد "" الفيديو قادو ليا اسلام ، و المرض كان في حلقي ماشي في صباعي و مخي ""
قالت ياسمين "" حمد الله على سلامتك ، و لكن اشنو من ورى ما تشافيتي ؟ ""
تفكرات تغريد انشاغلها بتالا تم باسلام و مشاعرو و قالت ببساطة "" غير تشغلت بشي حوايج ""
صاحت هناء "" ماكاين والو ، كاين غير قضيتي بينا الغرض و لحتينا ""
تعصبت تغريد و هزات يديها "" تي منين كاتجيبي هاد الهضرة ، فين استاغليتك اختي ""
"" خويا منين شاف الفيديو ماخلا باش سبني ، و من بعد قال ليا باللي استغليتينا الفيديو كنا فيه ب3 اذا خاصنا نتخلصو في ب3 ""
هزات تغريد راسها كاتضحك "" نتخلصو ب3 ؟ على اشمن اساس ؟ انتوما ماعندكمش حتى اسم في عالم اليوتيب اللي غانستاغلو ، راه انا اللي درت ليكم افتتاحية لقنواتكم اذا جينا نيت نتحاسبو راه انتوما اللي خاصكم تخلصوني، راه باقين مادرتو حتى فيديو و كاع المشتركين اللي عندكم دابا لا في اليوتيب و لا انسطا جايين من لا شين ديالي انا ، حيت كتبت سمياتكم بالخط العريض و قلتها شحال من مرة تبعو هاد الزوجات غايحطو فلوغات ديالهم حتى هما ، و زيدي عليها ، انتوما اشنو درتو في داك الفلوغ كاااع ، بانو كمامركم لور ؟ شكون نتوما و شكون كايعرفكم كااااع ، انا اللي هضرت و انا اللي عاودت كاع داكشي و الكاميرا كاع الوقت و انا هازاها حتى حتاجيتك فاش كنت كانعوم ؟ واش على هادشي كاتحاسبو معايا دابا ؟ ياك تواعدنا باللي غانصور معاكم فلوكاتكم و غانعاونكم ؟ اشنو وقع ؟ كاتخلقو مشكل من والو ، جاكم الملل ؟""
بغات تتكلم هناء و لكن سدات ياسمين فمها و خلاتها كاترعد بالفقصة و جاوبت في بلاصتها "" والدينا ماخلاونااش نديرو قنوات ""
صاحت تغريد "" وهادي مشكيييلتي ؟ غاديين كاتبلوكييو فياااا ؟ انا درت اللي عليا و علاياش تافقنا و من دابا كنت مستاعدة نمشي معاكم فينما بغيتو ، الله يجعلني نصور معاكم في السماء و لا حتى تحت الماء .. ""
صاحت هناء بعدما حررات نفسها من قبضة ياسمين"" و اللهما غاضحكي عليا بهاد زوج كلمات ، انت غير وحدة انانية ، مستغلة و عاجبك راسك ، يسحاب ليك حنا مكلخين و لا غادوزيها علينا ؟ ""
تنهدت تغريد كاتبرد نفسها"" مازال مافهمتش المشكل هنا ""
صاحت هناء"" فلووسناااااا ""
"" ماعندكوووم فلوووس ، الفلوغ كامل طالع بجهدي و الله السانتيم لا كان ليكم ، داكشي اللي واعدتكم بيه غانوفي بيه و مازالة عند كلمتي .. انتوما اللي قلبتو وجهاكم ، انتوما اللي خويتو بيا و مشيتو خدمتو بعدما قنعتكم ماعرفتش اشنو كاتحاولو تبتو حنا هضرنا و رسمنا اهدافنا ""
ضحكات هناء "" و باراكة من الغميق النصابة ، ها ياسمين اللي كانت من ديما كاتجي منك فاقت و عاقت و مابقاش يمشي عليها تخلويضك ، قلبنا على خدمة ماتنفعنا ، يسحاب ليك غانبقاو متبعين فنيانة فاشلة معكازة بحالك ، باغية تفشلي و تجري معاك الوناسة ؟ بحالك راه وااالو ، عرفتي اشنو هي واالو ؟ انت صدق ليك فيديو في داك اليوتيب يسحاب لك قضيتي الغرض ، و اللهلا بقا لك بالله .. ""
"" الى عندك شي وجهة نظر ، هضري عليها بلا ماتهاجمي حياتي الشخصية ، مازال شادا راسي عليك ""
"" و مالي كذبت عليك ؟ دايرة فيها الانسة المتقفة اللي كاتكلم بلا غوات ؟ ما انت غير انانية ، مستغلة ، ماكاتشوفي غير راسك ""
ضربها الكلام في نصف الصدر .. ماغاتنكرش ..
و لكن باش تبكي تغريد و تطيحها تمكن منها كليا ، خاصك تكون من بعد اخر ..
شافت في اسلام و اكتاشفت باللي الوقت كلو و هو كايشوف فيها ..
مهتم بالواقع و متبعو ..
ماتدخلش و مابغاتوش يديرها ..
ماشي هي اللي تقلب على اللي يحامي عليها و يهضر في بلاصتها ..
"" كانعترف باللي كانتامي لفصيلة الassholes ، انا من دوك الصحابات او من الناس اللي قادرين يجرحو و يهرسو ، هادشي الي كاتشوفوه فيا و كايسحاب ليكم ، انا عارفة ، و لكن على الاقل ، كانبين هادشي لاي واحد داخل او في عتبة باب حياتي ، ماكانتخباش من وراء قناع لاعلاقة بوجهي الحقيقي ، ماكانخدعش الناس بوجه اخر ، وجه واحد واضح عندي ، وجه حتى واحد مابغاه و لا تقبلو و مازال غانوحل لديلمكم كاملين في القرجوطة ، مافيها حتى باس بان الانسان يبغي راسو ، كلنا كانبغيو غير ريوسنا ، الفرق هو ان كاينين ناس كايعتارفو ، ماكايخافوش يخبيو هاد الحقيقة و كاينين ناس بحالك كايخبيوها و كايمتلو طيبة القلب و داك التخربيق ، يسحاب لك نسيت او مارديتش البال لاشنو درتي فاش "كنت كانغرق " ؟ اوى ، مالك سكتي ، ماشي ياسمين كانت كاتحاول تدخل عندي و انت كنتي كاتشدي فيها و كاتقولي ليها يالله نمشيو ، الى نسيتي رجعي للفلوغ ،بزاف التعاليق هضرو على هاد النقطة ""
"" انا ..كنت .. خايفة "" قالتها هناء بتردد ..
جاوبت تغريد "" انا لمتك ؟ صنعت شي مشهد ؟ نهيت صداقتي معاك بسبب خيانتك و استعدادك تخليني وراك حتى بلا ماتجربي تعتقيني ؟ في نظرك خوفك مقابل حياة انسان كاملة عندو معنى ؟ واش خوفك عذر كافي ؟ لا ، انا عرفتك خايفة ، شايفة انانيتك واخا كاتخبيها ، داكشي علاش مالمتك ماصنعت مشهد ، انا ماشي غبية ، حتى انا كانشوف كولشي ، و لكن كانخدم عقلي ، ماشي حالة فمي و كانصيد اخطاء عباد الله ، عيوب الناس ماكاتعنينيش ، حيت عارفة مزيان باللي اما ماشي احسن منهم ، انا بحالهم ""
""انت اصلا كنتي غير كاتفلاي علينا ""
"" فاش كنتي كاتجري في ياسمين ماكنتيش عارفاني كانلعب معاكم، شكون الانانية هنا ؟ * هزات يديها * ماتفهميش غلط ، مازال ماكانلومكش ، انا الناس اللي كانلومهم هما اللي مستعدة نفديهم بحياتي ، انت ماشي من دوك الناس ، انا .. ماكانلومكش ، انا كانتفهم حقيقتك الانانية ، اللي ماكنتفهموش هو انك اتاهميني انا و تزيحي نفسك من الصورة ، انت اسوء مني ، حتى فاش ماطليتوش عليا في مرضي ، مالمتكمش ، و فاش عرفتكم مبلوكيني جيت كانقلب ماشي بلوكيتكم حتى انا بلا مانفهم .. انا اللي كاتقولو عليا انانية كانبغي راسي من ديما كنت كانموتيفيكم و نزرع فيكم الروح المتابرة ، عائلتكم ماكنتوش كاتسمعو منهم اللي كنتو تسمعوه مني انا ، كنت باغية ليكم الاحسن ، ماشي ذنبي اذا فهمتي تصرفاتي تجاهكم غلط ، موتي انت و رأيك فيا . عمرني قلت لشي وحدة شي كلمة نقصات منها او ضرباتها في ما يضرها ، انت الالة " الصديقة الطيبة "قلتي ليا دابا فاشلة و ماكنسوى والو و عايرتيني بحياتي ، على اشمن اساس كاتعتابري نفسك الصديقة اللي من حقها تقلق ، الصديقة المتاالية ، الصحابات الغزالة ماكايزيدوش يطعنو بعضهم في الجراح ، الصحابات ماكايتصيدوش الاخطاء لبعضهم باش يبلوكيوهم .. كاتمتلو عليا باللي تجرحتو في حين انني ماكانعني ليكم والو ، من اول كنت عارفة هادشي و ماعنديش معاه مشكل ، حيت حتى انتوما ماكاتعنيوش ليا باش نكونو صريحين، انا دابا غير كانصارحكم و لكن انتوما غاتاخدوها اهانة و واللهما كايهمني . غير كاتمتلو عليا و كاتمتلو على ريوسكم ، حتى انتوما انانيين ، وقفتكم ضدي دابا ماكاتعني غير انكم ماباغينش ليا الخير ، فلوغ نجح شميتو ريحة الفلوس و تقلبتو عليا ، ماكانبغيش نستعمل هاد المصطلحات و لكن دابا ماكانشم غير ريحة الغيرة و الحسد ، ماعجبكمش ينجح ليا الفلوغ، على شوية الفلوس قطعتو معايا ، و جايين كاتلوحو هاد الهضرة قدامي ديال استاغليتكم ، على اساس اشنو دخلنا لهاد اليوتيب نديرو اصلا ؟ نشويو الكبال ؟ على قبل الفلوس .. كان ممكن ينجحو قنواتكم كون بغيتو ، بيا و لابيا ....خبيت عليكم شي حاجة ؟ طمعتكم فشي حاجة و ماوفيتش بيها ؟ اوى دوييو .. هضروووو ""
قالت ياسمين"" انت فهمتينا غلط اتغريد ، مابغينا لافلوسك لا والو ، حنا غير تقلقنا من غبورك بدون ماتسولي ، حسينا بحال الى لعبتي بينا و درتي بينا مابغيتي ""
صاحت تغريد بعصبية"" جييو هضرو معايا ، قلبو عليا و سمعوها مني بعدا عاد تقلقو ، شوفوني اشنو عندي ، سولو ، زعما انتوما هما الواعرات غاديين تهضرو وراء ظهري و تخططو بلا حتى منعرف حتى حاجة ، ماعارفاكم حتى واش مخاصمين معايا ، و زعما انتوما ماعارفينش باللي انا ديجا كانغبر مرة مرة ، انا و كانتي ، مافهمتش اشنو كاتحاولو تبتو هنايا ""
دفعات هناء ياسمين و صاحت فيها "" انت طلعتي ليا فوق راسي بهاد الشخصية الخاضعة ديالك ، زوج كلمات رجعات ضحكات عليك بيهم تاني و هانتي مستعدة ترجعي دوري بجنابها و تنبحي كيف الكلبة ؟ *دارت عند تغريد* مافهماتنا لا غلط و لاهم يحزنون ، حقنا في اللي ربحتيه يوصلنا و لا اقسم بالله حتى .. ""
"" حتى اشنو ؟ ""
"" حتى نطيح ليك ديك الشين ، و اللهلا كملتي فيها ""
قربت تغريد بشكل خطير منها و قالت "" لعبي معايا و اقسم بالله حتى نشوه ليك هاد الوجه الزوين حتى ماتبقايش تخرجي من جحركم ""
كان اسلام مازال متبع ، و مابقاش رجع حل تيليفون ديالو .. كان غاينوض و لكن منين باعدات ياسمين مابينهم رجع استرخى .. و سمع ياسمين "" البنات صافي تهدنو خليونا نهضرو بالعقل ""
صاحت تغريد "" مابقاش الكلام بيننا ، سالينا ، ماكانشوف حتى سبب اخر يخليني نحافظ على وجودكم في حياتي ""
دور الضحك الساخر هاد المرة كان عند تغريد "" مازال مصرة تخفاي في سترة النعجة ؟ فيقي لراسك ، فيقي لراسك الغبية ، خرجي من قناعك و من البلاصة اللي مخبية فيها ، وريني الجرأة الحقيقية و غوتي ، انا كانحسدك اتغريد ، ماعجبنيش تنجحي اتغريد ، ماعمرني اعتابرتك صاحبتي اتغريد ، خصامي و لومي ليك ماشي من المحبة .. من الكره اتغريد ""
بوجه كريه قالت هناء "" كاتخربقي ""
"" هاذي مشكلتكم العاطفيين بشتى انواعكم "" مررت عينيها بينهم بزوج ""ما كاتشوفو غير مشاعركم الخاصة ، كاتصحابو ريوسكم ابطال في رواية خاصة بيكم ، العالم كايتمحور عليكم ، الناس الاخرين في حياتكم ماهما غير شخصيات تانوية ، شي كاتوهبوه بمحبتكم الطاهرة المتالية حيت كايستاهلو ، حيت" كايسولو فيكم "و " كايعطيوكم ديما الكادوات" و كايفكروكم في "مبروك العيد" ، و شي كاتخليوه هو الشرير ، اللي كايآذيكم و يحبطكم و ينزلكم للارض ، و اللي مكرس حياتو غير باش يوقف عقبة في اهدافكم ، و في الحقيقة داك الانسان ماهو غير كايحاول يعيش حياتو ، كاعما فايق ليكم اصلا .. فيقو الاغبياء فيقو ، و خرجو من اقنعتكم ، و شوفو وجوهكم في المراية ، انتوما الاكتر انانية ، انتوما اللي ماكاتسبقو غير ريوسكم و كاتموتو على ريوسكم *سكتت للحظة* انا ماعمرني طمعتكم فشي حاجة ، داكشي اللي تسنيتوه مني كان من وحي خيالكم ، ماشي ذنبي انا .. ""
قربت هناء من تغريد و قالت "" كترتي الهضرة بزاف ، ايمتى غاتعطينا فلوسنا و ديك الساعة الله يعاونك ""
قربت تغريد حتى هي و بكل تقة و تحدي ، قالت "" لا ""
دفعاتها هناء و هي طرشها حتى دار راسها و طار شعرها مع راسها في الهواء ...
شهقات ياسمين و دارت يدها على فمها ..
""غاتعطيني فلوسي ، بزز من الحمار ديال بووك ""
هزات تغريد عينيها في هناء ..
هناء عارفة مزيان كيف كاتكون تغريد في المضاربة ..
بعدت بخطوة لور بقلة تقة ..
اسلام مع التصرفيقة وقف و غوت تجاه هناء "" بإيييه ""
الشوفة اللي دارتها تغريد قالت ليه خاصو يتدخل ..
و قبلما يوصل .. كانت حتى هي طرشاتها .. وحدة .. تم الاخرى بلا ماتعطيها حتى فرصة فين تسرط الاولى ..
ياسمين دخلات بينهم و اسلام حاول يشد تغريد ، و بنادم بدا يتجمع ..
حتى من اسلام ماقدرش يحكم تغريد ، كانت قوية الحركة و سهلة التملص ..
فاش كاتكون باغية شي حاجة ، حتى قوة ماكاتمنعها ..
و الحاجة اللي بغاتها دابا هي تربي هاد البنت ، توقفها عند حدها ..
فلتات من يدو و جراتها من شعرها من بين يدين ياسمين و دارتها تحتها ..
زوج تصرفيقات و رجع اسلام انتاشلها من فوقها .. و اسلام كل مرة كايغوت على تغريد باش تحبس ..
و لكنها already turned feral ..
مابقى حتى صوت يوصلها ، دمها حامي ، اخر مراحل تمالكها لنفسها و صبرها ..
غير شدها اسلام .. ناضت الاخرى و نتفت تغريد بكل قوة و هي بين يدين اسلام ..
تغريد راسها نزل و ماجا فين اسلام يتصرف حتى تغريد كانت ركلاتها برجلها لكرشها ، و طاحت بعيدة بشي خطوات ...
طارت عليها و هاد المرة كانت كاتلكم .. ماشي كاتنتف كيف البنات ..
هناء مالقات غير صدر تغريد و كمشاتو في قبضة غارزة ظفارها ..
تغريد تشتت انتابهها و ضربات يدها اللي كمشاتها بيها و هي تهز هناء ركابيها ضربات ظهر تغريد حتى طاحت قدامها ..
اسلام كان كايجرها و لكن ماقدرش نهائيا يحكمها من كترة حركتها ..
هناء ناضت جرات تغريد من شعرها كاتحكها مع الارض ..
اسلام ضرب بالقوة يد هناء منين شادا شعر تغريد حتى طلقاتها ..
تغريد استاغلت الوضع و بحركة سريعة تشقلبات و ضرباتها برجليها طيحاتها في الارض .. و دغيا طارت عليها فوقها .. قجاتها .. هناء كاتغوت و تغريد قربات ليها و بين سنانها و هي كاتنهج هدداتها "" اخر مرة نشوف كمارة ال***** ديال امك قدامي ، ندوز انا من الطريق انت تخويها ، و لا انا ماشي مسؤولة على اللي غانديرو فيك ""
و قبل ماتكمل كانو ذراعي اسلام حول خصرها حكمها بقوة و صاح "" صافي اتغريد ، سالينا هنا ""
ضربات يدو حاولت تخلص منها و لكن هاد المرة حكمها مزيان .. ماقدراتش ..
ناضت هناء مستغلة الوضع حاولت تنتفها تاني و لكن شد اسلام يدها و دفعها و غوت في وجهها "" سيري تكمشي راه غانطلقها عليك ""
و هنا عاد قررو المتفرجين يتدخلو و شدوها مع ياسمين ..
جر تغريد و قال "" زيدي انت قدامي ""
دار القب ديالها على وجهها المقموش و غطى شعرها المنتوف و ساس حالتها و هو كايلاحظ الحردات في جوانب السروال و ركابي بفعل الاحتكاك ..
و يشنق عليها من عنقها جارها ..
حيدات يدو و دارت غوتت على ياسمين "" و حتى انت بلوكيني ، قولو عليا انانية ، قولو عاجبني **** ، قولو اللي بغيتو ، I don't give a single fucking shit غير ماتجيوش من بعد تمتلو عليا ادوار الضحايا ، حتى واحد ما ضحية هنا ، كلنا بحال بحال""
و باخر كلمة .. كان ذراع اسلام رجع احاط بعنقها جرها لجنبو قريب و حط يدو على راسها بحركة حمية او كايهدأها ماعارفاتش .. اللي عرفات هو انه خاصها شي دوش بارد هاد الساعة ..
