قصة خيالية بالدارجة : آلاء و لعنة تالا (الفصل العشرون)
كانت تغريد جالسة في الكرسي على الطابلة اللي في وسط السطح ..
كاتشرب مشروب ساخن و شادا كرشها و قالت :"" سحبي هاد الوجع ،انت ماكاتحاربيش بطريقة عادلة ""
قالت تالا :"" انا ماكانتحاربش معاك ، انا كانحاول نتعايش معاك ""
هزات تغريد راسها و ضحكات بسخرية :"" my ass ""
قالت تالا :"" ماعرفتكش اشنو قلتي ، و لكن غانقولك شربي و ديها في وجعك ""
سكتات تغريد شوية .. و قالت :"" مصرة ماتعاوديش ليا كلشي ""
قالت تالا :"" لا ، ماكانتيقش فيك ""
قالت تغريد :"" مامتيقاش ياربي هادشي اللي انا فيه دابا ، ساحرة حمقاء مزاحماني في الجسد ديالي ... و كاتقول ليا ماكانتيقش فيك ""
و غير كملات جملتها .. وجه اسلام نزل من فوق راسها بالمقلوب كايطل عليها ..
غوتت و الكأس اللي فيدها خواتو على فخاضها و ناضت .. المرة الاولى غوتت من خلعتها بوجه اسلام .. الغوتة التانية كانت بسبب احترافها من المشروب الساخن ..
بدات كاتبعد السروال القطني من فخاضها .. و قبل ما تفهم .. برودة بلاصات السخونة الي حسات بيها ..
اسلام كان جاب ماء من التلاجة كبو على موضع الاحتراق .. عاودت غوتت و شدت يدو و قالت :"" اسلااااام غانقتل مك ""
هز وجهو فيها .. و عاد ضحك :"" r u okay ؟ ""
جلسات كاتغبن و شدات كرشها و قالت :"" no , I am f*cking not ""
رجع ضحك و عنق راسها و قال :"" ماقصدتش كاع يوقع ليك هكا .. اشنو كنتي اصلا كاتهضري بوحدك كاتقولي ""
قالت تالا في وذنيها :"" ها انت حصلتي ، يالله تفضلي ""
كان اسلام جلس في جنب تغريد .. شافت فيه و كذبات :"" والو ، كنت كانفكر للvlog الجاي ""
رجع بظهرو للور و قال :"" اممم ، عاد شفت الvlog اللي في اليوتيب دابا ""
توقدت في جلستها و قالت موسعة عينيها بحماس :"" شفتيه ؟ مابقيتش طليت عليه .. غايكونو المشاهدات طلعو .. كنت الصباح جايا نبشرك .. ارى تيليفونك نشوف ..""
عطاها تيليفونو .. و غير شافت العدد اللي ارتافع .. عينيها خرجو ..
رجعات شافت فيه و قالت :"" نااري ا اسلام ، المتتبعين تزااادو .. و ماعمرني وصلت للهاد العدد من المشاهدات واخا يبقى الفيديو شهر معلق تما ... ها هو وصل في ظرف يوم .. ""
دار رجل على رجل مسرحها فوق الطابلة و قال :"" ماغايكون غير الediting و المونطاج ديالي ""
شافت فيه بطرف عينيها مبتسمة و قالت :"" ماغاديش ننكر باللي انت موهوب في هاد القضية ، و المونطاج ديالك كان اقرب للاحترافي .. انا ماعنديش الصبر نقاد دوك التفاصيل .. كما ان تدخلاتك الكوميدية ماقسراتش ، مامتيقاش باللي خليتك تزومي على الربيعة اللي كانت واحلة بين سناني .. ""
رجع للور كايضحك و ربع يديه وراء راسو و قال و هو كايشوف في عينيها :"" باقية كاتباني زوينة ""
عضات على شفتها السفلية كاتكتم كاع المشاعر اللي ممكن يفلتو منها ..
و رجعات كاتشوف في التيليفون .. و رجعات هزات عينيها فيه و قالت :"" قريتي التعاليق ؟ ""
ديك الساعة جمع الضحكة و تغعد من جلستو المستريحة و قال تحت نيفو :"" اه ""
استغربت من رد فعلو .. و جلسات قدامو كاتقرى و بعدها هزات عينيها فيه و هما واسعين و قالت :"" اويلييي على الصغع ""
هز عينيه مغوبشين و قال هاز يدو :"" كيفاش بنادم كايتجرأ هكا على بنات الناس ؟ اشنو كايقصدو ب ' قوق بلادنا ' ؟ و هذاك الحمار اللي عندو الجرأة يقولك تجاوبيه في الانستاجرام ؟ و... ""
قاطعاتو صائحة :"" و تنوض انت تسبهم في التعاليق ؟ ""
رجع ترخى في كرسيه و قال بتهديد :"" عينيا على والديهم ، يعلقو بآداب ""
شافت فيه بطرف عينيها :""هذا هو بنادم ، كما ان التعاليق المحترمة و الزوينة اكتر من هاد النوع من التعاليق.. يعني شكون تسوق لهادوك البعالك ""
جاوبها :"" انا كانتسوق ليهم ""
شاف في جهة اخرى و هي تبسم ملء وجهها .. و سمعات صوت تالا في داخلها :"" ايدر كان مغيار بحالو ""
جمعات تغريد الضحكة و كملات تالا في وذنيها :"" كانت غيرتو الذراع اللي كانلويه منها .. ""
بغات تغريد تسول .. و لكن ماشي وقتو ..
شافت في اسلام مسرح و مغمض عينيه .. و رجعت تبسمت ..
اسلام كايغير .. كايغير عليها هي ..
ماقدراتش تحبس الضحكة اللي فلتات ليها من كترة الحماس للفكرة ..
تحلو عينين اسلام فجأة و شاف فيها ... بالزربة جمعات ابتسامتها و هو يخنزر و قال ليها :" اشنو الزوينة اللي خلاك تفرنسي ، عجبوك التعاليق ؟ ""
رجعات بعينيها للتلييفون وقالت كاذبة و ماكاذباش :"" اه ، الناس كايشجعوني و كايشكرو مجهوداتي و كايمدحو فكرتي و التصوير ديالي ، كايعبرو على اعجابهم بشخصيتي و شجاعتي ، بالزاف اللي قالو باللي غايجربو يديرو بحالي .. ""
بقا كايشوف فيها و قال :"" برافو الحادكة ، بلاصة سنين و هي سليمة و بعيدة على وسخ بنادم ، نضتي انت دابا شجعتي كحل الراس يمشي يشوهها ""
هزات راسها و عينيها كيف الملسوعة و هي تغوت تالا في وذنيها :"" اقسم بالله و يوصل شي احد لتما حتى تولي تلبسي ديك الفوطة الصحية اللي وريتيني قبايلة في وجهك ""
وقفات تغريد و قبل ماتحبس راسها صاحت :"" اشنو كاتعني اصلا هاد الهضرة ""
جاوبتها تالا :"" اللي فهمتيه ""
و جاوبها حتى اسلام :"" اللي فهمتيه ""
هزات عينيها فيه .. و عاد فهمات نيت اشنو دارت .. بتوتر قالت ليه :"" انا غانزل نبدل ""
منين تمات غادية قال ليها :""و انا غانطيب شي حاجة جاني الجوع ""
اللحظة اللي وقفات قدام المراية صاحت في وجه تالا :"" اشنو كاتقصدي انت ؟ الشلال مابقاش ملكك ، و ماعمرو اصلا كان ملكك ، القتالة الساحرة الشريرة .. ""
قالت تالا بنبرة هادئة و لكن شديدة :"" من الاحسن ليك ماتدخليش في هادشي ، هاديك البلاصة طرف مني ، حافظت عليها و حميتها ، غيابي منها ماكايعنيش انني صافي تخليت عليها ""
تغريد :"" اوى هي الى رجعتي ليها و هنيتيني ، و ماتبقايش تغرقي الناس ، خلعيهم بشي طريقة يهربو و صافي .. داك النهار قلتي انت ماشي شريرة و لكن القتل ماشي غير شر .. راه قبح .. خبت و اكتر من الشر ""
تالا :"" هما اللي كانو كايقلبو على هادشي .. ""
تنهدت تغريد :"" صافي ، خلينا من هادشي . قولي ليا ، انت قلتي باللي عندك القدرة تعيشي في اجساد اخرى .. و اذا ماعشتيش في جسد كاتموتي ، و لا لا ؟ ""
سكتات تالا و كملات تغريد :"" اذا كيفاش عشتي هاد السنين كاملة تما .. ماشي في جسد و انما في شلال .. في الماء""
تبسمت تالا و قالت :"" كاين سر تما ، و لكن ماغاتعرفيهش ""
قربات تغريد للمراية و بتهديد رمات كلامها :"" واش كاتسحابي راسك تما غاتبقاي ضد رغبتي ؟ ""
تبسمت تالا و جاوبتها :"" متلهفة نعرف اشنو غاديري ""
و تبسمت تغريد بكل هدوء و برود وبعدت من قدام المراية .. لبسات حوايجها و رجعت طلعات ..
لقاتو حط اتاي و مرافقاتو و بدا كاياكل ..
جلسات في جنبو و قال ليها :"" دخلتي الفلوس ""
وساعو عينيها و قالت :"" اويلي من دابا ؟ ""
ضحك و قال :"" مولفة ماكاطلي حتى دوزي شي شهر ""
خدات تغريد التيليفون من عندو كاتشوف و قال ليها :"" بان ليا هاد الvlog غايجيب ليك فلوس صحيحة ""
منين شافت الرقم اللي وصل لحد الان وقفات كاترفرف بيديها و ماقادراش حتى تتكلم بالفرحة ..
ضحك على شكلها و شد يدها جرها جلسها في الكرسي حداه :"" يعني من هنا لواحد الاسبوع غاتكوني مرفحة ""
عضات على شفتها و هزات عينيها في السماء كاتفكر ..
سولها ضاحك :"" اش غاديري بيهم ؟ ""
شافت فيه و جاوبت بحال الى ماكانتش متبعة مع كلامو :"" الvlog الجاي خاص يكون النيفو ديالو فوق من هذا ""
ضحك و جاوبها :"" تهدني ""
وقفات و جاوبتو :"" لا ، ماغانتهدنش ، ماخاصنيش نغيب من بعد هذا حيت ماشي لمصلحتي ، خاصني نضرب الحديد ماحدو سخون ""
رجع جرها جلسها :"" و شربي بعدا اتاي ماحدو سخون ""
جلسات في جنبو و خدات الكاس و هزات عينيها كاتفكر :"" خاصني نضبر فشي بلاصة بحال داك الشلال ، و ندير شي مغامرة اخرى .. ""
و قبل ماتكمل كلمتها فمها تسد بدغمة ماعرفاتهاش حتى اشنو هي .. شافت فاسلام و قالت بفمها اللي عامر :"" انت واعدتيني ""
جاوبها :"" واعدتك نسافرو ، سفرية ظريفة ، على قد الجيب و على قد العقل ""
غوبشت :"" اشنو كاتقصد بقد العقل ، مالك هكا كاتسرق المتعة ""
جاوبها :"" انا هو العقل اللي ماعندكش ""
"" واخا ، واخا ، نناقشو هادشي من بعد "" رفعات رجلها فوق الكرسي و ضمت ركبتها و تنهدت .. تم شافت فيه "" نجاح الvlog يعتبر نجاح ؟ انا نجحت دابا فشي حاجة ياك ؟ ""
تبسمو عينيه و هو كايشوف فيها :"" انت نجحتي في بزاف ديال الامور .. اتغريد .. غير طحتي في حياة ماكاتعتارفش بهاد النوع من النجاحات ""
تبسمت :"" اشنو هو هاد النجاح ؟ ""
جاوبها :"" ماطحتيش ، و خديتي قرارات كانت شجاعة في الوقت المناسب ""
قالت :"" كاتكلم على قرار عدم اكمالي للقراية ؟ ""
جاوبها :"" اه ، انا متأكد كنتي غاضيعي الوقت و الجهد بحالي كون كملتيها ""
قالت :"" بالصح ، و لكن كيف كاتشوف مادرت والو""
ضحك و قال :"" اشنو واقع .. قلبنا الادوار دابا ؟ ""
غوبشت .. بعدها صرفقات راسها و قالت :" ااه ، اويلي اشنو وقع ليا ، انا في العادة اللي كانقول هضرة ايجابية . انا ماشي فاشلة دراسيا حيت مكلخة او كسولة ،والديا والديني و لكن ماعارفينيش ، كايحكمو بشكل سطحي بحال اللي ماكايعرفونيش .علاش حتى احد ماعارف ، باللي ربي خلق شلا ذكائات في الانسان و ماشي ذنبي العالم غبي بكونو كايقدر غير الذكاء المتعلق بالمات و الكيمياء .. ""
سكتات شوية و كملات :"" غير قول ليا ، فين هو الذكاء في كونك كاتحفظ درس قداش عاطيه ليك واحد اخر اللي هو الاستاذ و هذاك الأخر حتى هو غير جايبو من شي بلاصة مجهولة ماشي حتى هو اللي كتبو و هكا ، و كاتجي انت كاتحطو في ورقة باش يصححها لك و يشوف قدرتك الغبية على الحفظ ، بحال الى العام كامل و هو كايدك فيك داكشي .. باش تعاود تتقياه عليه انت في الاخير ""
ضحك اسلام و كملات :"" انا دابا ماشي كانهاجم الناس اللي عندهم القدرة على الحفظ و لكن جديا ماكاين حتى ذكاء هنا .. الذكاء هو اكتشافك لامور جديدة ، لابداعك .. لتجديد الافكار اللي ديجا موجودة في العالم .. او تكمل شي فكرة اللي بداها واحد و ماكملهاش .. ماشي تفهم عملية معقدة و تعاود ديرها نفسها ، باش فايت قرد كايقلد حركات الدراري الصغار في الحديقة ؟ ""
شربات من كأس اتاي ديالها و كملات "" الكونسيبت ديال المدرسة بشكل عام كامل بالنسبة ليا بايخ ، شوف حنا في اشمن عصر ، و شوف هما اشنو كايقريونا في المدارس ، علاش في نظرك الشباب ولاو كاينجحو بامور تعلموها لراسهم خارج المدرسة ، بحال اللغات ، و الامور المتعلقة بالافورماتيك و ماشي داكشي اللي تعلموه ، علاش في نظرك هاد الجيل الاغلب ديالو يعد فاشل و ماكايقراش و مامهتمش بالحياة الدراسية ؟ ""
جاوبها اسلام :"" حيت هاد الجيل اذكى و اقوى من سيستيم المدرسة ""
قالت :"" تمااماا ، هاد الجيل مزيود وسط التيكنولوجيا ، مزيود في المستقبل ، هاد الجيل مسلح بالانترنيت .. ماشي من دوك اللي قراو بالشمع .. دوك اللي قبل نجحو في ديك القرايا حيت ناسبت ظروفهم في داك الوقت . اما حنا ، خاصنا نكونو مواكبين العصر ديالنا ، نقراو داكشي الي غادي ينفعنا نيت في حياتنا ، اللي غادي نستخدموه باش نصنعو الكارير ديالنا .. من الروض للباك .. و اللهما خرجت من دوك السنين بشي حاجة من غير انني كانعرف نقرى و نكتب و انني ربطت صداقات و جمعت مع اللي قدي .. سنين كتيرة ضاعت هكاك ، غير حتال السادس كان كافيني حيت تعلمت نقرى و نكتب ، ال6 سنين اللي من بعدها غير خسارة صراحة .. *شافت فيه* انا فهمت القالب في حدود الباك .. و انت اصغع جبدتي عليها "" و دارت يديها على فمها كاتضحك ..
شاف فيها بطرف عينو و قال :"" حتال اخر شعبة دزت ليها كان نيت كايسحاب ليا غانجح في القراية ""
جاوبت :"" بززتي على عقلك و شخصك شي حاجة اللي بعيدة على اختصاصو . نجاح ناس كتيرة في القرايا ماكايعنيش انك بحالهم و انك خاصك تعيش نفس الحياة ديالهم ""
جاوبها :"" و لكن ماعندنا حتى خيار اخر ، من غير نقمعو داكشي اللي تزادينا بيه .. و نصنعو .. ""
قاطعاتو :""اشنو نصنعو ؟ عقول و شخصيات اخرى باش نتماشاو مع الحياة ؟ my ass , انا النهار اللي حليت عينيا في هاد الدنيا .. كنت مقحومة فيها ، مجبورة نعيشها ، اوى اسي مادام الحياة ماركات عليا هدف بإقحامي هنا ، فانا غانماركي التعادل و غانعيش بالطريقة اللي بغيت .. و ماشي اللي غاتفرضها عليا ""
تبسم حتى تسدو عينيه و دار يدو على خدو و تقابل معاها و ما اضاف حتى حاجة ..
بلعات ريقها لحركتو هاذي و حاولت تجاهلها و كملات :"" انا و ياك كانتشابهو ، ماعندناش ذاكرة اللي تخولنا نحفظو و ماعندناش الصبر او القدرة على التركيز بغرض فهم العمليات و اعادة تجسيدها ، انا وياك مصممين باش نتجو ، انا وياك دغيا كانتعلمو للتطبيقي للامور اللي كاتخول لينا نعبرو على افكارنا الخاصة ماشي افكار الاخرين .. عقلتي كيفاش انا و ياك كنا غير كانقراو الدروس و كانعاودو نكتبهم بطرقنا في الامتحانات ؟""
قال اسلام :"" طريقتنا ماكانتش كاتعجب الاساتذة ""
جاوبت :"" يعاودو لمخاخهم ، حنا نجحنا فيها واخا بنقط ضعيفة ، و لكن في سوق النجاح ، حنا الناجحين على هادوك اللي حفظو و جاو حطو نفس الشي اللي تعطاهم ""
جاوبها :"" العالم ماكايعتارفش بهاد النجاحات الصغار ، ماكايشوفوهمش ""
ضربات على صدرو بقوة و قالت :""يكفي تكون عارف بقدر نفسك و بقدر النجاح ديالك ، و العالم افضل صبع وسطاني ليه ""
و ديك الابتسامة عمرها تمحات من وجهو و هو كايتصنت ليها ..
ساطت و كملات باحباط :"" ماكايعجبنيش كيفاش الناس بحالنا ماعندهمش فرص ، خاصهم هما يخلقوهم .. ""
جاوبها :"" عندك الحق ، زعما ، اشنو كان غايكون الوضع كون كنا بحال خوتنا ، نقراو بشكل طبيعي و نكملو من القرايا لمشوار العمل ""
كملات :"" يااع ، و من بعد العمل كايجي الزواج و بعدو الولاد و بعدو ماكاتجي فين تفيق حتى كاتلقى راسك كبرتي و تلاهيتي مع الامراض و فشلان الركابي و هووب الله يعاونك ..next "" عوجات وجهها "" اشمن حياة هاذي ، هاذي انا كانسميها 'حياة العبيد الكلاسيكية' انا ماكنتخيلش راسي نهائيا محاصرة في خدمة يومية من ال8 لل6 ..غانحس براسي مخنوقة و محاصرة ، غانحماق اقسم بالله .. انا عارفة واخا كون كملت القراية و نجحت فيها و نجحت في الخدمة ... ماغايدوزش بالزاف و غانهرب و غانلقى راسي كانقلب على ستيل حياة اخرى ..و غانبدى من الاول بحال الى كولشي داكشي اللي درتو ماكانش .. هاذ النوع من الحياة ديال وحدين اخرين اللي كايناسبهم يعيشو في ديك الحلقة المملة.. ماشي ديالي انا .. انا انسانة حرة ماكانبغيش القيود كيفما كانت .. كانبغي الامور تمشي كيف بغيت انا .. كانبغي نكون في محيط ننتج فيه افكاري و مايعارضني فيهم احد ، باغية نكون انا القائدة ،بغيت منين ماتمونش عندي كانة الخدمة مانخدمش ، الى ماكنتش انا البوص ديال راسي ، حتى واحد ماغايكون ""
جاوبها :"" اوى اللالة انت عارفة طريقك هادي صعيبة ""
جاوبت :"" انا عارفة ، و راضية و قادرة بهادشي ، كانعرف راسي ، و كانعرف نقط نجاحي و غانفتاخر لكل نجاح نجحت فيه ، نجاحي ماكايبانش لواليديا او لا للعالم ، و لكن who gives a shit ؟ ""
جاوبها :"" not u .. "" ضحكات و كمل و هو نايض "" غسلي الماعن و يالله نخرجو نتمشاو شوية .. شحال هاذي ماحسيت براسي خفيف ""
ضحكات و قالت :"" اوى منين انت فرحان هكا مالك مادرتيها من قبل ؟ ""
قال ليها ساخر و هو كايجمع المواعن :"" اذا جينا نديرو اي حاجة كاتفرحنا كاع غانكونو فقراء ""
ضحكات و هزات اللي بقى ليه من مواعن و تبعاتو ..
ال9 من الليل ..
راجعين اسلام و تغريد بعدما داعو العشية كاملة ..
"" اسلام ، اشنو كاتخطط دير دابا؟ "" قالتها و هي كاتشوف فيه بكل اهتمام ..
خشى يديه في جيابو و تنهد "" ماعرفتش ، اللي عارف دابا هو مزيان منين خرجت من المحل ، محتاج نرتاح شوية و نفكر فشي حاجة جدية نبني بيها حياتي ""
وقفات و وقفاتو و عينيها واسعين و قالت :"" كاتهضر من نيتك ا اسلام ؟""
هزز رأسو و هو كايشوف فيها "" اه ""
ضحكات بحماس "" اشنو وقع لك ا اسلام ، هذا ماشي انت نهائيا .. لا لا .. هذا هو انت ، سنين دازو كنتي هكا و لكن تبدلتي و وليتي مكنزز و فاقد الامل و كئيب .. و لكن كانشوف فيك دابا ، بحال الى اسلام المتفائل ديال شحال هاذي كايرجع شوية بشوية .. اشنو السر يا هاد الراجل ؟ ""
تنهد تنهيدة طويلة و هو كايشوف في السماء و فكر في سؤالها ..
الجواب هو خطوتو في التقرب ليها ..
غير خدا قرار انو يستسلم ليها و يكشف حبو ليها .. و شافها شحال هي متجاوبة ..
هادشي لهمو يطبقو مع امور الحياة المعقدة ليه حتى هي ..
و كلامها ديال قبايلة فكرو في اسلام ديال شحال هاذي ..
من الامور اللي كايحبهم في تغريد .. و هو انها فيها جزء منو و من طفولتو و مراحل حياتو كاملة .. مهما نسى نفسو القديمة كايلقى الاثار ديالها في تغريد .. و ديما كاتفكرو فيها .. لان تغريد من الناس القلال اللي ماكايتمحاش سحرهم ، ماكاتنجحش الحياة تمحي السحر فيهم ..
و خلاتو يفكر هاد العشية كاملة .. اشنو اذا استسلم و جلس في الراحة و اتاح ليكون عندو متسع من الوقت باش يقدر يبدع و يكتاشف و يتعرف على نفسو الجديدة .. و يرجع ليها السحر ديالها ..
اشمن حياة هاذي اذا دفنها في الخدمة و النعاس من وراها ..
العيش بشكل حر ، كل يوم كايعتمد فيه على الارتجال ، بدون قيود بان ليه فكرة مغرية في هاد اللحظة ..
و حتى قبلة من خدي الملهمة ديالو و هي كاتشوف فيه عينيها واسعين بالحماس و الفرحة ليه ..
تبسم ليها بالمقابل و قرب ليها "" اشنو خاص الراجل اللي ماكايتصنتش لكلام مراتو ؟ ""
غوبشت بدون فهم و بعدها تحلو عينيها بارتباك و هي كاتبسم و ضربات صدرو بعداتو و هي كاتشوف في جنابها و لكن حمد الله هاد الوقت كايكون الدنيا خاوية"" حماقيتي انت ؟ ماكنتيش كاتجاوب كاع مع نكتي حول كوننا زوج و زوجة اش وقع ليك دابا ؟ وليتي انت اللي كاتجوكي حول هاد الموضوع ""
هز كتافو و قال ليها :"" بدات كاتعجبني الفكرة ""
و هنا مابقا لقلبها فين يزيد .. و كمل عليها صوت تالا في وذنيها "" هذا كايطلبك للزواج رسميا ""
من جهة تالا و من جهة هاد الحمق اللي ولا فجأة كايلعب معاها هاد اللعب الخطير .. عاود قرب لعندها ، شاف فيها شوفة فرضات عليها ماتزعزعش عينيها من على دياولو ..
بحال المنومة تبتات تما .. احست بيديه ضمو ذراعيها .. و زاد قربها لعندو ..
ماعرفاتش نهائيا كيفاش تتصرف كانت حرفيا كيف المنومة .. واش كاينة شي وحدة اغبى عاطفيا منها ؟
كان كايدير ديك الحركة اللي كاتعجبها بفكيه .. و عينيه كايلعبو مع دياولها ، بالحماس و الحب ..
يديه دابا كايبعدو شعرها من وجهها ، كايتأملها ، بكل سكون و راحة و هدوء ..
العالم الخارجي كايسكت .. كايسكت .. حتى تم اخراصو في مرة ..
مابقات كاتسمع غير دقات قلبها ..
هذه اكتر حركة حميمية وقعات بينهم ..
شحال عامو بزوج في البحر و شحال من مرة اغفات في جنبو حتى صبح الصباح ..و لكنها كلها كانت اوقات بريئة ..
و لكن هاد المرة لا .. حتما اللا ..
و واخا فاهمة باللي هادشي شوية زايد عن حدو ..
مازال واحد العرق ديال الغباء كايضرب فيها و كايخليها تتجاهل هادشي و تقحمو في إطار صداقتهم .. او ديك العلاقة عندهم اللي 'مامسمياش'
"" انت ديما كايكونو عندك تفسيرات للاغمض الامور ، و حتى احد مافايتك فانشاء نظريات غريبة ، ياك ؟ ""
هززات راسها .. تم ابتسم و كمل :"" اوى فهميني ، علاش فاش كانبغي نخطط لحياتي المستقبلية كانلقى ur ass مخشية فيها ""
ضحكات و هي تلكم صدرو :"" من الاحسن لك ، ماعنديش نية اصلا نتفرق عليك ، انا و ياك بحال الابيض و الاسود ديال الرمادي .. مايقدر حتى لون يتجانس معانا و يعطي الرمادي .. ""
هز راسو و ضحك و قال بنبرة ذات مغزى :"" هي نفهم عندك ليا بلاصة فين تحطيني انا و مخططاتي ؟ ""
جاوبت و هي كاتبعد و كاتلعب بيديها وراء ظهرها :"" واش كاتفلى ؟ البلايص كلهم ديالك .. انت و مخططاتك ""
شافتو كيفاش دوز يديه على لحيتو و من تما لراسو و هبط وجهو لعندها و التعبير اللي كان فيه .. شقلب معدتها وسط كرشها ..
عض على شفايفو بزوج و طلقهم و مد يديه لجهتها و قال بابتسامتو اللي كاتقتلها حية "" اجي للهنا ""
بعدت كتر و قهقهت بشكل خفيف "" علاش غانجي ؟""
جاوبها و هو كايقرب "" حمستيني ""
ضحكات اكتر و كملات :"" ماما كاتقول ليا ماتقربيش للرجال المتحمسين ""
في لحظة ضحك بقوة و اللحظة اللي وراها كان كايجري وراها ..
غوتات و جرات بالاتجاه المعاكس ..
صاح وراها "" من الاحسن لك ماتخلينيش نشدك انا ""
صاحت "" ماغاتشدنيييش ""
سمعات ضحكو وراها و تطلق فخاضها .. ضارت مع زنقة و مع اخرى و لقات فرصة توضرو ..
تخبات في خوية ديال واحد الدار و بان ليها كايجري ..
شدات فمها و هي كاتضحك و كاتشوف في ظهرو حتى غبر ..
شدات قلبها و تنهدات ..
و لكن ماوقفش من الضرب بسباب العياء ديال الجرى .. مازالو كايضرب على هادشي اللي وقع دابا ..
هبطات و جلسات مع الارض و شدات خدودها و قالت :"" ناري اشنو هادشي و اللهتا غانسخف ؟ ""
جاوبتها تالا :"" انا و الله حتى مليت منك و من الكلاخ اللي الخز ديالو خارج من ظفارك ""
جمعات تغريد ضحكتها و قالت :"" كنت عاوتاني غانسى باللي ساكناني ساحرة شريرة لسانها طويل ""
سمعات صوتها كايضحك "" من الاحسن لك ماتنسايش ، فكري تتقبليني و خلينا نساليو هادشي .. انا محتاجة جسدك و انت محتاجة قوايا ""
جاوبتها تغريد :"" انت غالطة .. ماغادياش تغريني بهادشي ديالك .. انا بغيت جسدي يرجع ليا وحدي ..و كيف قلت لك قبل .. يا بيا .. يابيك .. ""
سمعات تالا ساطت بملل "" هادشي بان ليا غاياخد وقت معاك .. و انا باغية نعيش ""
وقفات سيارة سوداء قدام الدار اللي فجنبها ..
و منين شافت شكون نزل منها ، وساعت ابتسامتها اكتر و اكتر تم قالت :"" غاتعيشي .. و لكن في جهنم ""
هضرات تالا في وذنيها منين حتى هي شافت اللي شافتو تغريد .. "" مافيدك ماديري ""
كانت الاء خارجة من السيارة و متوجهة لباب دارها .. و لكن في فجأة و في ديك اللحظة .. ضارت لاتجاههم و عينيها برقو ..
تغريد حلات فمها و قالت "" ناري أحياني الله حتى وليت نشوف الفضائيين ""
و غير شافت الاء جايا باتجاهها و هي تبعد بخطوة و هي تقول ليها هازة صبعها في وجهها "" غاتقيسيني غاننسى انك حاملة .. ""
ماخلاتهاش الاء تزيد كلمة ..
ديك ساعة شنقات عليها من جديد ..
وبكل نبرة تهديدية قالت بين سنانها مقربة وجهها ليها تماما :"" غاتقولي ليا كااع اللي كاتعرفيه و ماغاتنقزي حتى تفصيل ""
هزات تغريد يديها و قالت "" طلقيني الاخت .. انا اللي جايا نسولك كيفاش نتهنى من هاذ المصيبة اللي سكناني ""
وساعو عينين الاء بدهشة .. بالزاف ديال الافكار مشوشينها .. مابقات عارفة فين تشد .. "" اشنو كاتخربقي .. ؟ انت كاتعرفيني شكون انا .. ياك ؟ ""
دورات تغريد عينيها كاتقلب على شي جواب وسط الروينة و لكن لاحظت باللي الزنقة خاوية واخا هكاك قالت "" غانقولك .. اذا قلتي ليا كيفاش نتفك من هاد الساحرة الشريرة .. ""
و قبل ماتكمل كلامها .. الاء دفعاتها رماتها بعنف في الارض .. غير سمعات اسم الساحرة الشريرة و هو يرجع ليها الكابوس اللي عاشتو سنين هاذي .. و اللي مازال مطارد احلامها ..
احست بالخطر .. احست بان كولشي داكشي اللي عاشتو غايرجع ليها ..
خافت من هاد التغريد و من اللي كاتعرفو ..
بدون ماتقدر تخمم او تتحكم في نفسها .. كان يومها صعيب .. و وجود تغريد دابا قدامها ..مازاد غير الطين بلة .. قربات لعندها و عينيها ماكايبشروش بالخير ..
في الدار ..
كان زين العابدين في الصالة برفقة زياد و زيد و زوجتيهما و الولاد الصغار ..
كان الكل جالس الا زين العابدين اللي غادي جاي ..
"" و جلس اصاحبي راه قالت جايا "" قالها زيد اللي تعصب مع عصبية زين ..
حك زين العابدين على موسطاجو و قال :"" مانجلس حتى نشوفها ، اختكم حماقت هاد اليومين ، و ناوية تحمقني ""
جرات شيماء انيسة و طه و قالت ليهم :"" سيرو طلعو ابابا لعبو الفوق حتى نعيطو ليكم ""
الولاد سمعو الكلام و طلعو .. و قفات شيماء حدا خوها و قالت :"" الله يحسن العوان ، حملها يمكن اللي داير فيها هكا ""
شاف في اختو بانزعاج و جاوبها :"" الشهور الاولى ديال الوحم اللي كاتكون صعيبة دازت بيخير ، دابا عاد غايبدا يصعاب ""
جاوبت نعيمة :"" و هذا هو الحمل .. اشنو بغيتي فيها تزيدها حتى انت ؟""
وقف كايخنزر فيهم بزوج .. و قال :"" هاد الاتحاد النسوي غاتمشيو للخلا و تمتلوه ، المرأة الحاملة اللي كاتهضرو عليها ال9 و نصف هاذي مازال مابانت و كاتقولو ليا مشاكل الحمل ..؟ ""
تكمشو بزوجات و سكتو .. زين العابدين المعصب حتى واحد ماكايزيد معاه الهضرة ..
نطق زياد :"" انا مازال حتى حاجة مامرتبة في عقلي ، من هاد البيلسان الجديد لمشكل الصباح .. علاش اصلا ضاربت مع الخدام ديالها ؟ ""
هز يدو و قال :"" الله اعلم ، على هي بغات تقول شي حاجة ، غير بين هاد اليوماين ، كلشي هادشي وقع و شي كايخبط فشي حتى مابقينا قدينا حتى نجلسو نهضرو كيف موالفين .. ""
قال زياد :"" انا حاس اختي بيها شي حاجة .. ""
تدخل زيد :""جاني انا نحققو فهادشي ديال هاد البيلسان ""
صاح زين العابدين :"" اشنو غانحققو ، هذاك مايتذكرش عندي هنا في الدار ، ماغاديش يقرب من مراتي بحتى عشرة كيلومتر ""
ساطت نعيمة و دارت يد على يد و قالت شيماء و هي كاتنغزها :"" تهدن اخويا و خلي عليك تقساح الراس هاد الساعة ""
استلمو زياد قبل مايعارض :"" مادام كلنا كنا عارفين ان البيلسانة ماكاينين فيها غير النساء و فجأة كانلقاو راجل بيلسان ، فراه الامور شوية فشكل و كاينين شي حوايج غالطين و مخربقين .. زيد عليها رد .. رد فعلها ديال البارح راك عارف ، اكيد كاين شي تفسير و لا لا ؟ و الكريزات اللي ولاو يجيوها .. ""
شاط غضب زين و صاح :"" اش جاب شي لشي .. علاش كاتربطهم مع بعضيااتهم .. ؟ ""
كاع تكمشو و ماعارفينش كيفاش يتواصلو معاه و هو كلو كايبان كيف شي عرق كايزدح و غاينفاجر في اي لحظة ..
زدحة في الباب قوية خلات عينيهم كاملين تتوجه باتجاهو ..
وساعو عينين زين و صاح :"' الاااء ؟""
و مشى بالجرى للباب و البقية وراه ..
منين حل الباب ، تحل فم زين العابدين و البقية شهقو من المنظر اللي شافووه ..