قصة خيالية بالدارجة : آلاء و لعنة تالا ( الفصل الثالث )
- الفصل الثالث :
الاء ماجاوباتوش ، مد يدو و دوز ظهر سبابتو على حنكها و قال :"" يالله الغزالة نوضي من تما خلينا نتحركو ""
قالت :"" انا لي جيت سايقة ، جلس في الجهة الاخرى ""
كانت ناوية تشد الضد و لكن منين شافتو بدا يربط في حواجبو ناضت من تما و إلا غايدير ليهم شي سيناريو من سيناريوهاتو المعهودة .
جلسات في الجهة الاخرى و لقاتو جلس وراء المقود ، دار عند ولدو شد يدو باسها و قال ليه :"" اش درتي اليوم ؟ ""
عاود ليه ولدو على مغاماراتو لهاد اليوم ، و بعدها دار لعند مراتو لي مربعة يديها و عاقداهم ، تبسم و مد يدو قرص جنبها بحميمية ، ضربات يدو و خنزرات فيه ، قرب هاد المرة لخذها قبلها و قال عند وذنها :"" ماعندك حتى فكرة مخيلتي اش كادير بيك دابا ""
هاد المرة الخبطة كانت في صدرو ، شافت فيه بخذوذ موردة بالحشمة و قالت :"" زين العابدين ، ولدك !! ""
شد صدرو و رجع لوذنها كايقول :"" مالو ولدي ، جالس هاني ماعندو حتى فرصة يشوف اشنو في عقل باه ""
دورات وجهها لجهة الاخرى كاتكم ضحكتها و لكن شافها خشى وجهو اكتر في القماش لي دايرة على رأسها استنشق ريحتها و رجع استقام في بلاصتو و قال و هو كايعدل السمطة :"" و اللهتا جيتي في وقتك ، مصيبة مع الطاكسيات في هاد الوقت ""
شافت فيه و قالت :"" ماكانتش باينة فيك ، كانت عاجباك الوناسة ""
ضحك ضحكة جانبية و قال :"" وا صلي على النبي ، واش انت مراتي ام ولادي تغيري ليا من اي وحدة تجي من جيهتي ؟ وا عرفي بلاصتك فييين كاينة *أشار بيدو الفوق في الهواء * و تصرفي على هاد الاساس "" قرص خدها بين ظهر صباعو :"" ديري عقلك ""
قالت الاء :"" شوف شكون كايهضر على العقل ، على لي كايغير من .. ""
قاطعها قائل :"" بلا ماتجبدي سيرتو تاني ، خلينا نرجعو هانيين ""
قالت :"" اوى هاحنا معادلين ""
شاف فيها للحظة و قال :"" وا عاااندك مزاج المضاربة دابا ""
شافت فيه من طرف عينها و قالت تحت نيفها :"" دينا لشي بلاصة فيا الجوع ""
ضحك و قال :"" و ديريها من الصباح ، فين بغيتو تمشيو ؟ "" و دار شاف في ولدو لي قال ليه البارك في حين الاء اقتارحت يمشيو لشي بلاصة فين ياكلو و يكون فيها فضاء اللعب للصغار و على هاد الاتفاق انطالق زين العابدين .
في الحي ... كانت تغريد جالسة على عتبة-درجة رفقة زوج صديقات من الحي لي ساكنة فيه ..
كاتقرى ايمايلات في تيليفونها ، في الوقت لي كلمتها وحدة من صديقاتها :"" غير استسلمي من جهة ديك القناة في اليوتيب اصاحبتي ماموكلاش هنا في المغرب ، راه واخا هكاك ماعندناش تقافة اليوتيب ""
جاوبت الاخرى :"" و زايدون راه اليوتيب عندو قوانين لي تخليه ينجح انت مااحتارمتي تاوحدة ، او صاحبتي فاتحة شين هكاك بلا موضوع رئيسي ، مرة نصائح حول التجميل ، مرة diy ، مرة طبخ ، مرة اقتراحات كتب ، كيفاش بغيتي هاد القناة تنجح اصاحبتي ""
هزات تغريد عينيها في الخواء قدامها و قالت :"" غابيا و لا بيها هاد القناة ، و اللهما غانستسلم ""
قالت وحدة و هي كاتربت على كتفها :"" انا بان ليا ، ركزي في الحياة الواقعية ابنتي و قلبي على خدمة ديال بالصح ""
شافت فيها تغريد و جبدات صرف من جيبها و قالت :"" ضبرت في مشروع ""
تحلو عينين صحاباتها و يالله غايمدو يدهم و هي تجمعها و قالت :"" ايوا عرق كتافي هذا ""
ضحكات وحدة ضحكة استهزاء و الاخرى قالت بدون ماتيقها :"" عرق كتافك على عرق كتاف شي احد ؟ ""
قالت تغريد :"" اقسم بالله ماسرقتهم من والديا ؟ ""
بقاو كايشوفو فيها بدون مايبينو على انهم تيقو حرف من كلامها ..
اضافت :"" وا لا من خوتي ""
ماتيقوش ..
اضافت من جديد و هي قالبة عينيها بملل :"" ولا من ولاد عمامي و لا طاسيلتي كاملة ""
قالت الاخرى باستهزاء :"" اشنو هزيتي ، خناشي ديال البوصلانة على هاد الكتيفات ؟""
ربطات تغريد حواجبها و قالت :"" بطبيعة الحال لا اياسمين ، انا مايائساش لهاد الدرجة ""
جاوبتها ياسمين :"" اوى فهمينا على اشمن مشروع كاتهضري ؟""
قالت تغريد :"" البارح كيف العادة مالقيت ماندير وانا نطيب لازانيا و ديتها لإسلام مع موناضة وشوية الديسير ، في الاول كنت ناوية نبروفيتي فيه هو ، ساعة لقيت السيدة لي مخدماه حتى هي تما ، و صدق البلان فيها هي ، مهم عجباتها و قالت ليا نولي ندير هكاك و نبيع للمالين المحلات فديك المنطقة و واعدتني باش تتكلم ليهم عليا ، و فكرت فيها جاتني على كانتي ""
قالت ياسمين :"" و فين رأس المال الالة الفاهمة ، دوك زوج ريالات لي رابحة من قناتك الفاشلة اولا من زوج ريالات الاخرين لي كاطيريهم لعائلتك ؟ ""
قالت تغريد :"" غانبدى بالتقدية ديال الدار ، و حتى انتوما غادخلو معايا ""
يالله صحاباتها غايجاوبوها و هي توقف عليهم امرأة بجلابتها و فولارها و بيدها قفة التقدية ، قاطعتهم :"" تجمعتو تاني هنا افليفلات ؟ اشنو لي غايكونو معاك فيه اراس الحربة ؟ شفتو ، شفتو لي كايسمح فالقراية اش كايولي ؟ ""
قلبو تغريد و ياسمين عينيهم و بداو يسوطو بانزعاج في الوقت لي تكلمت التالتة و هي محرجة و قالت :"" وا صافي اماما واش فينما نشوفيما مجموعين تبداي فهاد الكاسيطة ؟ ""
ميلات الام فمها بغير رضى و قالت :"" اويييلي ، طليتو خضر معاكم ، ها وجهي اذا طفرتوه ، و بقاو دايعات فالزناقي و تتفلاو الشباب و الصغر راه مادايمش ""
غوتت بنتها قائلة :"" مامااا ، دخلي قابلي داارك خلي هاد النهار يدوز بيخير ؟ ""
خنزرات فيهم الام بتلاتة و قالت ؛"" حيدو ، حيدو من الطريق وكاان ""
بعدات تغريد لي كانت جالسة الوسط حتى طلعات المرأة و خبطات الباب وراها .
شافت تغريد في صديقتها و قالت :"" هناء ، خليني ندخل نقتل مك عافاك ""
قالت هناء :"" اياه ؟ باش نبقى انا نترس على بقر علال لي الداخل ؟ خلي بعدا غير حتى نتزوج ""
قالت ياسمين :"" مابقى لطاسيلتك غير الزواج ، واشوفي حريرتك بعدا ""
قالت هناء :"" اشمن حريرة ؟ الحريرة غارقين فيها انتوما ، اما انا كولشي عندي بيخير و هو هذاك ، خدامة بحالي بحال عباد الله راه انتوما لي منفخين ""
قالت ياسمين :"" مامنفخينش ، حنا غير ماراضيينش باي كان ، مايمكنش نخدمو النهار كامل واقفين غير على زوج فرانك ، اذا كنا غادي نخسرو هاد الجهد و الوقت كامل يكون فالاحسن ""
قالت تغريد :"" الانسان الذكي كايستتمر بعقلو ماشي بجهدو كيف الحمار ، الحمارة ""
قالت هناء :" اهااه ، وليتو تعايرو دابا ، اوى شوفو فينا وقارنو بيناتنا ، شكون لي عندها الصرف و جيبها محرك ، لي مخدامات 'عقلهم' اولا لي مخدمة جهدها ""
قالت تغريد :"" على اشمن صرف كاتهضري ، على هذاك لي كايسفو ليك باك ؟ ""
قالت هناء بغيظ :"" المهم قاضية غرض ""
قالت ياسمين :"" لا ابنتي ، هادشي عندك مامسلككش ""
قالت تغريد :"" عندها الحق ""
خنزرات فيهم هناء للحظة بزوجات و اشارت ليهم بصبعها :"" انتوما الفقيرات لي كاتهضرو على حالتي ؟ انا بفلوسي ، بمصدر عيش مستقر راه انتوما لي ماعندكم والو ""
قالت ياسمين :"" ماشي ماعندنا والو ، كانحاولو ""
ضحكات هناء ضحكة جانبية ساخرة و قالت :"" باش ؟ بالسرقة و النصب على عباد الله ""
قالت ياسمين :"" تهدني تهدني ، هالي كاتسرق ""
شافت تغريد في الصبع لي موجه ليها و قالت :"" انا ؟ هاذيك ماشي سرقة ، غير كانتسلف منهم بلا خبارهم ""
قلبو ياسمين و هناء عينيهم بملل ..
جراتهم تغريد من ذراعيهم و قالت :"" خليونا دابا من هادشي ، و رجعو لموضوعنا ، نجربو هاد القضية و نشوفو ""
قالت هناء :"" انا اللا ، ديجا خدامة ماعنديش الوقت في الصباح ""
و قالت ياسمين :"" اصلا ماعنديش مع الطياب ، انا و ماكانطيب لراسي غير بالزز عاد لاعساك كل يوم ""
قالت تغريد :"" انا نطيب انتوما غاتكلفو غير بالتوصيل ""
ربعو يديهم و كل وحدة شافت فجيه ، رمقاتهم تغريد بنظرات كره غاضبة و قالت :"" لهلااا ، غانديرها للراسي ""
ضارت عندها ياسمين و قالت :"" كنت غانقول ليك good luck ، و لكن الluck ماعندوش معاك ""
جراتها تغريد من ذيل الحصان لي دايرة في شعرها حتى غوتات و طارت هناء بيناتهم كاتفك حتى خرجات ام هناء بالشطابة كاتجري عليهم من قدام العتبة ...
طه كايلعب التحت في فضاء الالعاب مع باقي الصغار ، و والديه جالسين الفوق في الكافي كايطلو عليه ، جنب الى جنب ، حاطة راسها على كتفو ، بينما ذراعه محيطة بعنقها .
ربتت على كرشها و قالت :"" عركتها تاني، عندي احساس ماغانولد هاد البنت حتى نكون زدت على الاقل بشي 50 كيلو ""
احست بصدر زوجها كايتهز بضحكة خافتة بعدها بيدو تحطت على بطنها الصغير و لي بالكاد يلاحظ و قال :"" و كولي مالك اشنو خاسرة ؟""
قالت الاء :"" اكيد خاسرة ، اصعب كابوس هي تعجبك شي لبسة و ماتجيش قدك ""
ماجاوبهاش زين العابدين ، فقط شد صباع يديها كايلعب بيهم وسط يديه .
و بعد شوية السكات سولها :"" قضيتي اغراضك اليوم ؟ ""
جاوبت :"" اه ، كولشي ""
جاوبها :"" ياكما هزيتي شي تقل ""
قالت :"" لا ازين العابدين ، و انا باقي ماتقلت مازالني خفيفة كيف الفراشة غير هني بالك ""
قال ليها :"" ماشي ضروري تكوني متقلة باش تردي البال ، سمعتي الطبيبة اشنو قالت لك ""
قالت الاء :"" كون هاني ماتهز هم ، هضرت مع خالتي قبايلة سلمات عليك ""
قال :"" حتى نرجعو و نعيط ليها ""
قالت الاء :"" عمي كان عيان شوية ،كانت ملاهية معاه كانت باغية تجي ، و لكن انا حلفت عليها ماتضرب الطريق و تخليه ""
قال :"" مسكينة ، ولات كيف المقطوع راسو ماحيلتها لينا و لا دارها لهيه ""
قالت الاء :"" كاتبقى فيا ، كاتبقى مشوشة اذا ماعيطتش ليها ، عارفة ولدك جلاخة مشيبني ، هادشي الى ماشيبتيني انت مول العقل ""
ضحك و احست بيه زاد ضمها و قبل جبينها ..
طالعة تغريد في الدروج كاتتفوه ، يالله 8 و نصف ديال اليل و كاتحس بالنعاس ، ماشي من عادتها تنعس بكري و لكن يمكن حيت اليوم فاقت بكري و تحركات بالزاف ..
غير وصلات للباب فين غاتدخل لدارهم و هي تهز راسها للسماء و قالت :"" يااربي تعميهم من شوفتي ، ندوز من حداهم مايديو مايجيبو و اللهما عندي خاطر شي كومبا عاوتاني ""
و دوزات كفوفها على وجهها بحال إذا نيت كانت كاتدعي ..
حطات رجل الداخل ، و طلات بنصف وجهها ، المرح خااوي و ماجالس فيه احد ..
سمعات خطوات جايين من الصالة الداخل و قبل ماتعرف راسها اشنو خاصها دير ، خرج سليمان اخ إسلام الكبير الثلاتيني و حط الصلاية بعدما طواها ..
شاف فيها و قال :"" الرجال داخلين للدار و البنات باقيات دايعات ؟ ""
ماكانش سؤال لي واجب عليها تجاوب عليه ..
داز من قدامها و دخل لبيتو لي مشاركو مع خوه الاخر و خوها هي و قال :"" عودي دخلي بكري و لا غانقولها لباك ""
و دخل سد الباب وراه ..
خنزرات في الاثر ديالو و جعدات شفتها العلوية بانزعاج تماما كيف كايدير ولد عمها إسلام و دخلات كاتحيد سبادرية ديالها حطاتها وراء الباب ..
مشات طلعات حفيانة للطبقة التانية ، فين كاين بيتها و لي بطبيعة الحال متشاركاه بدورها مع زوج خواتاتها و بنت عمها ، و لكن قبل ماتدخل للغرفة خاصها تدوز قدام بيت امها و باها ، كان مفتوح و سمعات صوتهم كايتكلمو بزوج ..
مشات كاتسلت بخطوات صامتة ، فتحات الباب و دخلات ، لقات دوك التلاتة -رفيقات الغرفة- مجمعات ، و غير شافوها سكتو و هي تنطق اختها لي ماقبل منها و قالت بصوت عالي مسموع :"" جيتي اتغرييد ؟ ماما كانت كاتقل--- ""
قبل ماتكمل كلامها كانت تغريد بجسدها كلها عليها سادة ليها فمها طاتطلب فيها :"" العاار ا ايمان مافيا لي يسمع تاني اغنيتها ""
صفعة كانت على مؤخرتها من اختهم الاكبر و قالت بصرامة كاتشبه صرامة امها و قالت :"" النهار كامل غابرة ياهاد البنت فين كنتي ؟""
ناضت تغريد من على ختها و شدات في اختها الاخرى و قالت :"" و اللهتا كنت غير مع البنات فالاول تغذيت مع اسلام في المحل من وراها بقيت مع البنات هادشي لي درت ""
ضحكات بنت عمهم و هي شادة تيليفونها و في نفس الوقت متبعة المشهد و قالت :"" اصغعة اتغريد هاد الغبرات لي كاتغبري مايكون وراهم غير شي كتكوت متلفك ""
ضحكات ايمان اختها المتوسطة على كلام بنت عمها سكينة في حين اختها الكبيرة مارية ماعجبهاش هاد الكلام و قالت :"" و اللهتا نجبد ليها عينيها من بلاصتهم "" وجهات كلامها لاختها الصغيرة تغريد "" شوفي فيا ، اقسم بالله و يكون شي حمار في الموضوع لافكيتك من والديك ""
جرات تغريد حوايجها بغير صبر و قالت :"" شوفي فيا ، واش كانبان ليك انا مسالية قبي لهاد التخربيق ""
قالت مارية :"" اوى الله يجعلني نتيق ""
رجعات مارية كاترتب حوايجها في الماريو ، و حيدات تغريد قبيتها رماتها في الارض و جبداتها تيليفونها و تكات في بلاصتها ، هزات ايمان القبية رماتها عليها و قالت :"" جمعي روينتك المعفنة ، راه ماغانبقاوش حنا نجمعو ليك و انت تروني ""
قالت سكينة :"" هاذيك راه خاصها تشارك البيت مع الدراري ماشي معانا احنا ""
رجعات تغريد رمات القبية في الارض و قالت :"" غايكون احسن ، هما دايرين الناموسيات تما والبيت كبير و كاين التيساع ، و الدنيا ماشي وردية تما بحال هاد المهزلة لي واقعة في هاد البيت ، وزايدينها بهاد السدادر لي دايرين لينا من الفوق ""
قالت سكينة :"" حتى هما كانو عندهم السدادر و حكو على جيبهم و دارو الناموسيات لراسهم ""
اقامت تغريد جسدها العلوي شوية و قالت :"" وا حكو على جيبكم حتى انتوما و ديرو لينا الناموسيات و حيدو علينا هاد الغوز من الحيوط راه كانشوفو كاتجيني السخفة ""
قالت مارية :"" مال السدادر ماقادينكش ""
جلسات تغريد في بلاصتها و قالت :"" اللا اختي ماكاين ما احسن من الناموسية ، كانهضر معاكم بالصح ""
قالت ايمان :"" غاليين علينا زيدي عليها ماكاينش التيساع الكافي للناموسيات ""
قالت تغريد :"" و غانديرو هادوك لي وحدة فوق الاخرى و اللهتا غايجيو مالكم صقرامات ، مارية مروضة ، سكينة موظفة و ايمان يالله ترسمات في سلك التعليم و--- ""
"" كاتقولي فيها ، و انت اشنو المصيبة لي بلاني الله بيها ، وزيرة الاشقاف و المؤون الاسلامية "" كانت امها لي دخلات هازة الصندالة ..
نقزات تغريد وراء اختها مارية في حين البقية كايتلواو بالضحك على جملة امهم ..
شدات مارية يد امها و قالت :"" صافي اماما خليها راه كانت غير مع البنات ""
حاولت توصلها و لكن ماقدراتش :"" خليني نربيها هاد البرهوشة ، خوتك كلهم داخلين سوق ريوسهم الا انت خارجا ليا من الجنب ""
قالت تغريد :"" اشمن جنب اماما ، هادشي غير حيت ظليت مع البنات ؟ ""
صاحت امها كاتخبط جنبها :"" و باقية كاتقول فيها ""
رمات الصندالة لبساتها و قالت :"" مصيبة مع هاد البنت انا عييت ، هذا الله "" و خرجات ..
رجعات تغريد لبلاصتها ،و كأن لاشيء وقع هزات تيليفونها و قالت :"" الله يصبرني معاكم ""
ضحكو ايمان و سكينة في حين مارية جاوبتها :"" ماعندكش ذرة علاياش تحشمي ""
وصلات 1 و نصف من الليل ..
تحركات تغريد في بلاصتها و حلات عينيها ، لقات تيليفون فوق صدرها و ناعسة بدون ماتتغطى ، اكيد داتها السهوة و نعسات هكاك ..
ناضت جلسات كاتحك مؤخر رأسها ، و كاتحس بالجوع كايعوي وسط كرشها ، كان الظلام و صوت الشخير في البيت و عندها ضربات صاعقة في منتصف رأسها ، الكلاب حتى احد مافيقها للعشاء و من الفوق خلاوها هكاك بلا غطاء و تيليفون معرض للسقوط و عندها كان غايكون مصيبة كبيرة بالنسبة ليها ..
ناضت وقفات و هي كاتمتم :"" اللفعات الكرطيطات تنعسو ماتنوضو ، كانتمنى تخنقو بلساناتكم و تموتو زرقات كيف سعدي ""
شعلات الضو و بدات تحك عينيها و كاتقلب على قبيتها تلبسها و عندها شيرات عليها سكينة بمخذة و غوتتت بصوت ناعس مكتوم :"" طفي الضو ازمر ""
طفاتو تغريد و هي كاتمتم :"" لفعة ""
خرجات من الغرفة حفيانة كاتلبس قبيتها ..
كانت الدار مهدنة ، هذا هو الوقت الوحيد لي كاتكون هكا ، بحكم انه بيت موروت كيف حال اغلب الديور فهاد الاحياء المجاورة .
باها و عمها هما الوحيدين عند جدودها لي ماتو ، كانو اكتر من اخوة بل صحاب ماكايتفارقوش متشاركين في الدار و حتى في الخدمة ، ماعمرهم حتى حطوه كاقتراح انهم يفرقو الدار و كلها يمشي في حال سبيلو ، بل تزوجو و ولدو في دار و وحدة و عاشو متقاسمين الحلوة و المرة ، كما ان الدار بيها زوج طوابق و زيد عليها الطابق التالت لي مزيج بين سطح و دار اخرى صغيرة فيه ..
بيها المطبخ فين كايطيبو و زوج بيوت ، واحد كبير مفرش بسدادر و اخر صغير ..
اما الطوابق الاخرى بيها غرف النوم و الصالونات و المروحة اضافة الى الحمامات ..
في هاد اللحظة كانت تغريد متوجهة للسطح فين كاينة الكوزينة طيب شي حاجة تسكت هاد الجوع لانها متاكدة ماغاتلقى حتى باقايا من العشاء ، ماعمر الوجبات في هاد الدار ماشاطو ، اذا ماجلستيش في الوقت ، عول طيب شيء اخر لراسك ، و هادشي لي كانت غادير ..
غير طلعات سمعات الحس ، و كانت عارفة اكيد شكون غايكون مولاه ، إسلام ، لي ديما معطل ، عارفاه مزيان كايديرها بلعاني باش مايتجمعش مع الدار ، و هي كاتفهم وجهة نظرو مزيان .
دخلات حفيانة بلا حس ، طلات عليه ، كان كايطيب عشاه ..
فديك اللحظة الشياطين لعبو براسها و قررات تسكت ليه القلب ، دخلات بخطوات صامتة حتى وقفات مباشرة وراه ، مبااشرة للحد لي خلاها تشم ريحة جسده المألوفة .
تخيلات رد فعلو كيف غايكون و التعبير لي غايرسم في وجهو و هي تسد نيفها قبل ماتنفاجر بالضحك و تضيع الخطة ..
و في ديك اللحظة غوتات في ودنو و ما احست غير بعظم ذراعو في منتصف وجهها و بعدها الظلام ..