قصة خيالية بالدارجة : آلاء و لعنة تالا (الفصل العاشر)
- الفصل العاشر :
بعد يومين ...
ناضت تغريد من فراشها جوايه 4 و نصف من الصباح ..
مانعساتش هاد الليلة من كترة الحماس و حتى بسبب انها خاصها في هاد الوقت تكون واجدة للموعد ..
حوايجها لابساهم ..
صاكها و كولشي داكشي لي غاتحتاجو جمعاتو البارح في الوقت لي كانت الغرفة فارغة من البنات ..
بهدوء و تسلل ، خرجات داكشي و مازادت على حوايجها غير قبية واسعة و هزات سبادري ديالها ..
حطات السيكان في الردهة برى في الدروج و قادت شعرها و قالت لنفسها :"" كولشي واجد ""
هزات عينيها للفوق و قالت :"" بقات المهمة الاصعب ، نسرق السوارت لهاداك البغل للي الفوق ""
طلعات على رؤوس اصابعها في الدروج حتى وصلات ..
دخلات للداخل و طلات من شق الباب و لكن كان الظلام ..
في ساعة 2 منين نزلات تنعس كانت شافتهم مازال في بلاصتهم من المرة لي فاتت ..
ماقدراتش تسرقهم منو في داك الوقت بسبب لانه مالقاتش فرصة ، فقررت ترجع منين تبغي تمشي و يكون نعس ..
كان الظلام و الرؤية مستحيلة ، كانت غادية غير بحدسها ..
وصلات للطابلة ، قلبات بيدها حتى لقاتهم و هزاتهم بالشوية حرضا لاتصدر شي صوت ..
إلا ان صوتو الرجولي تذبذب في مسامعها و خلا عينيها يوساعو وسط الظلام ..
"" تغريد ""
صافي ،الخطة فشلت ..
غمضت عينيها و عاودت فتحاتهم ، ملامحها مكمشة ماكاتعبر على والو غير الالم ، حابسة البكية ، اه البكية و حتى الفقصة ..
هادو هما فعايل سارق المتعة ..
قالت وسط الظلام بصوت مكتوم و خافت :"" نعام ""
قال :"" تغريد ، سرقتي مني كولشي ، بغيت حتى نسرق منك ""
قالت مخسرة وجهها بغير فهم :"" بغيتي تسرق مني ؟ ""
قال :"" مامخليانيش نسرق منك حقي الساحرة الشريرة السراقة ""
حلات فمها مهانة و قالت :"" انا ساحرة شريرة اشرشبيل ""
سمعاتو قال :"" سيري بحالك بعدي مني ، بعدي عليا ، دي معاك لي سرقتي و بعدي مني ""
دابا نييت مافهملت والو ...
كلامو كان جد بعيد على المنطق ..
كانت باغية تشعل الضو و لكن ذكرى تطرطقات في عقلها ..
اسلام من متحدثي الليل ، من ديما كان هكا فاش كانو صغار و كانو كايباتو حدى بعضهم في الصالة ، و لكن بعدما كبرو و مابقاوش كايديروها مشات هاد القضية من عقلها ..
رجعت تبسمت خاصة منين حسات بيه تقلب للجهة الاخرى ..
همست و قالت لنفسها :"" نسيت هاد القضية ، غير بلاتي على طاسيلتك حتى نرجع ليك و نوريك الساحرة الشريرة اشنو هي ""
و خرجات كاتجري ..
وراء المقود في السيارة ..
غوتات ، صفقات بيديها و ضربات ارض السيارة برجليها ..
تمدات يد من جنبها سدات ليها فمها و قالت :"" سدي فمك الزمرة غاتشوهينا ""
حيدات تغريد يدين ياسمين من عليها و شافت فيها بعينين كايلمعو بالحماس و قالت :"" انا فرحانة ، انا غانحماق بالفرحة شحال هادي مافرحت هكا ، كولشي هو هذاك و حنا دابا غانسافرو ، غير حنا ب3 مامتيقااااش ""
قالت ياسمين بملامح مرتبكة :"" فرحي غير انت ، الله يخرج هاد التسافرة على خير ""
دفعاتها تغريد بمرفقها و قالت بمداعبة :"" تيقي في صاحبتك و اللهما غاتندمي ""
تنهدت ياسمين كاتهدن نفسها و هما يسمعو صوت تزينين ..
ضارو بزوجات للمصدر الصوت و لقاوها هناء ، مربعة يديها و كاتعض على ظفارها و كاتقول :"" اش درت ياربي ، اش درت ياربي ""
قلبات تغريد عينيها بملل و ياسمين مدات يدها ليها و قالت :"" واصافي اصاحبتي غاترجعي في كلامك دابا ؟ ياك تكلمنا ""
هزات هناء عينيها فيهم بزوج و قالت :"" مامتيقاش باللي قنعتوني بهادشي ، مامتيقاش باللي خليتكم تلعبو بعقلي ""
قالت تغريد :"" وا صلي على النبي اصاحبتنا مالك جبانة لهاد الدرجة و مابقا ليك غير ديري الجناوح و تكلسي تقوقعي تما "" شافت في ياسمين :"" نوضي قلبي تحتها لاتكون بيضات بقوة الخلعة ""
بغات هناء طير عليها بنتفة و لكن تغريد رجعات للور و يدين ياسمين عتقوها منها ..
صاحت هناء :"" من الاحسن الvlog لي غاتصوريه في هاد السفرية الصغعة ينجح و تطلعي معاك قنواتنا اولا و الله حتى غادي ندمك على اليوم لي قررات امك تولدك فيه ""
قالت تغريد بتوتر :"" انا عند وعدي ، الvlog ديالي ان شاء الله ياربي ينجح و بما انكم غاتكونو فيه الناس غايبغيو يلقاو قنواتكم حتى انتوما و ان شاء الله تكون انطلاقة مزيانة ليكم ، غير هو ترخاو و ان شاء الله يكون الخير ""
رجعات هناء لبلاصتها و قالت بغصة :"" واحد مولاتي دكة ديال العصى كاتسناني ""
تغريد قالت بين سنانها بلا مايسمعوها:"" اشنو انا لي سارقة سيارة خويا ، تقدية ديال الدار ، و شي مواعن ، خيمة ديال ولد عمي الكبير سليمان و اللي بالمناسبة ماكايحملنيش ""
قالت هناء :"" اشنو كاتقولي ؟""
ضحكات تغريد و قالت :""والو كانقول غير عادي حتى انا هربانة بحالكم ، خليو القلق لمن بعد في وقتو اما دابا وقت المتعة و النشاط ""
قالت ياسمين :"" لطوموبيل عامرة ؟ ""
قالت :"" كولشي هو هذاك ماتخافوش ، قولي ليا غير انت ، حافظة مزيان الطريق لديك القبيلة ديالكم ؟ اشنو سميتها ؟ قرية شلال تالا، اذا توضرنا اقسم بالله غانبيعكم لشي عصابة ديال تجارة الاعضاء ""
قالت :"" هاذيك الطريق من صغري وانا غادية جاية ليها حافظاها اكتر من وجهي ""
قالت هناء :"" كون غير بتنا في شي اوطيل احسن من الخلى ""
عضات ياسمين على شفايفها في حين تغريد هزات راسها كاتضحك بقوة حتى تهز حلقها وسط عنقها وبعدها قالت بسخرية :"" خمس نجوم و يكون شي سويت كايطل على الجبال ، بالدوش و الجاكوزي و شي king bed وشي سهرة بالليل ياك ""
ضربات ياسمين على جبهتها و خلات هناء و تغريد غاياكلو بعضهم بعينيهم ..
تنهدات تنهيدة كبيرة . غاتكون رحلة طويلة ، اطول من لي كايسحاب ليها ..
الساعة 10 الصباح ..
كان اسلام في المحل خدام ..
لحد الان اليوم بالنسبة ليه روتيني عادي لدرجة ماردش البال للسوارت لي ماكانوش في بلاصتهم و لا للسيارة لي ماكايناش في حتى هي في بلاصتها ، و لي كانت في رأس الشارع لي فيه دارهم ..
و بكونو ماكايشوف تغريد إلا ابتداءا من وقت الغذاء للتحت ماردش البال لغيابها ..
هاد اليوماين عليه ضغط الخدمة كلها ، هاد المحل ممشي مزيان ، و لي زاد عاون هو كونو المحل الوحيد في هاد المنطقة ، الخدمة غالبا كاتكون مظغوطة و كان هو اللي مكلف تقريبا بكولشي ، ابتداءا من التصوير للطبع ..
كاتجي الاء و لكن ديما ساهية و كاتخمم .
ماعرفش اشنو عندها و لكن ماكايهموش يعرف ..
مابقاش فكر في داكشي لي شافو في عينيها ديك المرة لانو فكر في كلام تغريد و لقى راسو متافق معاها في كون الفكرة غير منطقية ...
تفوهت تغريد و حكت عينها بسبب نقص النوم ..
طلات على ياسمين لي حاطا راسها على الزاجة ناعسة و هناء خدات راحتها في المقعد الخلفي ..
سبات في خاطرها و قالت :"" انتوما لي جا معاكم النعاس ، مابقيتش حاسة بصباعي و فخاضي ، تاعت غير لي يوقف هنا و يضربها بواحد النعسة""
تحركات ياسمين و قالت بعيون مغمضة :"" تجرئي توقفيها ""
خنزرات فيها تغريد و قالت :""حيت شبعتي نعاس و مابحالك احد واصلة مرتاحة""
قالت ياسمين :"" بلا ماتبقاي تشكاي بحال الدرية الصغيرة ، بلا مانفكرك باللي انت مولات هاد الفكرة ، سو سوقي و سدي فمك ""
و سكتات تغريد ، ماشي من مصلاحتها تجبد معاهم الصداع و تصدعهم ، كما انها عندها الحق ، زيادة الى انها الوحيدة فيهم لي عندها البيرمي ، الشكر لخوها لي دارو ليها و دربها على السياقة بعدما نجحات في الباك ..
قالت لياسمين :"" قربنا نوصلو ؟ ""
قالت ياسمين :"" باقي ، غير كملي كيف شرحت لك ""
قالت تغريد :"" كنا غانكونو وصلنا كون خليتوني نسوق بكري ""
قالت ياسمين :"" مانتيقش اختي في الطريق بكري و حنا غير بنات ""
قالت تغريد :"" شكون غايوصلنا و حنا عافطين و وسط السيارة ""
قالت ياسمين :"" بقاي ديري راسك ماعايشاش في هاد العالم حتى تجيبي الربحة ""
ضحكات تغريد و قالت :"" بهاظ الهضرة فكرتيني في اسلام ، غايقتلني ""
شافت فيها ياسمين باستفهام و قالت :"" علاش غايقتلك اش درتي ليه ؟""
خرجو عينين تغريد في الطريق ، بلعات ريقها و قالت :"" والو ، شي حاجة بيناتتا و صافي ""
ضيقات ياسمين عينيها فيها بتشكيك و غرقات تغريد في بلاصتها ..
ماخاصهاش تعرفها سارقة السيارة لخوها و الا غايديرو ليها مشهد درامي هنا و يجبروها ترجع ..
لحد الان كايسحاب ليهم باللي خوها مخليها تستعملها واخا مسافرة بلا خبارهم و لكن على الاقل في خبارو عند اختو ..
رجعت استرخت منين ضارت ياسمين قدامها و شعلات الموسيقى الا ان صوت هناء قال :"" امتى مخططين تتزوجو انت و داك ولد عمك ؟""
هزات تغريد عينيها في المراية قدامها و طلات عليها ، كاتأكد واش هناء ناعسة و كاتحلم ، و لكن نيت كانت فايقة و واعية ..
ضحكات بسخرية و قالت :"" واش كاتسمعي راسك اش كاتقولي ؟ ""
هاد المرة ضارت ياسمين عندها و قالت :"" حتى انا كانتوقع ان اسلام هو لي غايكون معمر المستقبل ""
قالت تغريد :"" اولا مستقبلي انا ماغايعمروش راجل شكون ما و كيفما كان ، تانيا ، اسلام ، هذاك ... هذاك ولد عمي و ولد خالتي .. مستحيل نتزوج بيه ""
قالت هناء :""ياك ماشي خوك اولا مراضع معاك ، حلال عليك ""
قالت ياسمين :"" كما ان علاقتكم قوية ، انت وياه بحال التوام ماكاتفارقوش ،و كاتعاودي ليه اكتر ماكاتعاودي لينا حنا صحاباتك البنات ، علاقتكم ماغاتدي لحتى طريق غير الزواج ""
تكمشو ملامح تغريد بتعبيسة تدل على تشوش افكارها و قالت :"" so كاتقولي ليا باللي صداقتك بهناء غاتسالي بزواج ؟ ""
قالت ياسمين :"" بلا ماتحاولي اتغريد ، انا و هناء بزوجنا بنات هادشي مستحيل يوقع ، انت و اسلام من جنس مختلف ، انت بنت و هو راجل ، و ماكاينة حتى حاجة سميتها الصداقة بين المرأة و الرجل ""
قالت تغريد :"" بطبيعة الحال كاينة ، كاتكلمي انت بحال الى العيالات كلهم عندهم شخصية وحدة و الرجال عندهم شخصية وحدة ، النساء راه مختلفين ، و الرجال مختلفين، راه ممكن تكون امرأة عندها شخصية عقلانية مايلة اكتر لذكورية صداقاتها ماكاينجحوش مع النساء عكس مع الرجال . اذا كانو عندها شي 4 الاصدقاء ذكور من اوساط مختلفة هادشي كايعني انها كاتبغيهم و كايبغيوها كاملين ؟""
قالت هناء :"" على الاقل ماشي من جيهتها هي ، يقدرو ب4 بيهم كايشوفوها بطريقة مختلفة على كيف كاتشوفهم هي .. ""
قالت تغريد :"" زعما طامعين فيها ؟ بربكم البنات خرجو ليا من هاد الدور النسوي لي كايجيب الردان ، المرأة اذا احتارمت راسها و لزمات حدودها و رسمات الحدود لبنادم حتى واحد ماغايتخطاهم معاها بزز من والديهم يحتارموها ، كما ان الرجال ماشي مهووسين لديك الدرجة ""
شافو فيها بزوج شوفة " متأكدة ؟!"
و هي تنهد و قالت :"" واخا ، شي وحدين منهم ، ماكايعنيش كلهم ، كاتبقى غير نسبة منهم و صافي .. انت خاصك تكوني ذكية و تقشعي ديك النسبة الملوثة و تبقاي بعيدة عليها ""
قالت ياسمين :"" القضية صعيبة شوية ، حيت ماكايعلم ما في الريوس غير لي خلقها ""
قالت تغريد :"" بطبيعة الحال و لكن باعتبارنا بشر بعقل كايفكر فراه كانميزو و نلتاقطو الاشارات من المزيان و الخايب ""
قالت هناء :"" اختي حنا ماشي بحالك ، حنا غير خبيز في طبق ربي و لا معرفت كيف كايقولو ليها ""
قالت ياسمين :"" هضري على راسك اختي "" و دارت عند تغريد "" انا ماقنعتينيش بهادشي لي قلتي دابا ، المرأة ممكن تعجب بالصداقة مع الرجال ، حيت في شكل اه ، ولكن من جهة الرجال ، الرجال ماعندهم سوق في الصداقة اصلا و خاصة لا كانت مع النساء ""
قالت تغريد :"" لا زدتي فيه انت ماكاتعرفيش كاع رجال العالم ، ماتقدريش تحكمي هكا ""
قالت ياسمين :"" ممكن نكون مشيت بعيد و لكن الرجال ماباغين من النساء غير داكشي لي في بالك ، و فاش كانقول ليك "داكشي لي في بالك" كانقصد بكل الطرق كانت ، سوى بالمعقول او الحرام ""
سكتات تغريد كاتفكر في حين هناء قالت :"" انا مع ياسمين ، انا متأكدة ان اسلام باغي اكتر من غير هاد الصداقة لي كاتكلمي عليها ""
قالت تغريد :"" مستحيل ، غير بمجرد انكم كاتربطو بيني و بين اسلام بهاد الطريقة كاتخليوني غير مرتاحة بالمرة . اسلام .. اسلام .. هذاك راه-- ""
قالت ياسمين :"" اشنو هو اسلام .. سميه بشي حاجة نسمع ""
سكتات تغريد كاتفكر و قالت :"" كاينين شي علاقات هكاك .. ماكايتسماوش ، العلاقات الpure و الطاهرة لي ماتقدريش تتجرئي حتى تنقصي من قدرها بشي اسم ، كان ممكن نقول صاحبي ، عشيري ... نصف روحي كاع ..و لكن انا كانشوف فيه اكتر من هكا .. ""
قالت ياسمين :"" واخا عرفنا رأيك انت في هادشي ، بغينا رأيو هو .. الرجل ، في هادشي ""
بلعات تغريد ريقها و هي كاتفكر في كلام ياسمين ..
عمرها في حياتها .. عمرها وصلات لهاد النقطة الخطيرة من التفكير في علاقتها باسلام ، ماعمر شي احد اشار ليهم باصبع او فسر علاقتهم بشي حاجة غير ولاد عائلة او حتى صحاب من الصغر ، لان الكل كبر على رؤياهم مع بعض و هكا ولفوهم مع بعض و صافي .. بهاد البساطة .. حتى والديهم عمرهم نبهوهم او وجهو ليهم بكلمة ..
هي متأكدة من جيهتها باللي اسلام كايعني ليها بزاف ، ماباغياهش يخرج من حياتها ، ماباغاهش يبعد بحتى طريقة من الطرق ، حتى انها بعض المرات كاتلقى راسها بكل انانية كاتمنى عمر حالو يتصلح ، لاهي لاهو ، يبقاو غير هكا و صافي بدون تسمية ، غير هكا و صافي ..
و لكن علاش ؟ سولات راسها هاد السؤال ، علاش بغاتو يبقى في حياتها بهاد الانانية كلها ، واش هي مريضة بيه ؟
نفضات هاد الفكرة من رأسها و فاقت من سهوتها على ضحك البنات ..
عبست و قالت :"" علاش كاتهجرو فيه ؟""
قالت هناء :"" باينة فيك فقتي من القلبة ابنتي ""
ضحكات ياسمين و قالت :"" وا هي عايشة في دار غفلون مشاعرها مامحدداهمش بغيتيها تحدد مشاعر ولد عمها ؟ ""
و ديك "ولد عمها " نطقاتها بطريقة كاتمعني بيها خلاتها باغية تخشي ليها وجها تحت رجليها و تخمجو ليها بالشتيف ..
و لكن رجعت تركيزها للطريق و قالت :"" واخا غاندير راسي هبيلة و تقنعت بهاد التخربيق ديالكم ، علاش في نظركم غايسكت مادام هو .. يعني هو كايحس بشي حاجة من جيهتي .. انا ديما كانشوفو و نصف الليل كاندوزوه غير هضرة ؟ ""
قالت هناء ساخرة :"" اممم، ديما كاتشوفيه و نصف الليل كايدوز غيير هضرة ""
رماتها تغريد بأسهم نارية من عينيها في المراية و تجبدت بجسدها و قالت بعصبية و تهديد :"" انت غاتسديه اولا غانخشي هاد السبرديلة في فمك ""
ضحكات هناء كاتغيظها في حين قالت ياسمين :"" اوى هاد الجواب غاتعرفيه انت ، ياك انت صديقتو الوحيدة و لي كاتعرفو مزيان ""
قالت تغريد :""OMG ، خربقتو ليا المنطق ديال حياتي في هاد 5 الدقايق، I'm not even joking ""
ضحكت هناء و قالت :"" ماعرفتش كيفاش و لكن حاسة بيك مربوطة فيه ، غير مافهمتيش ""
قالت تغريد :"" هاد الهضرة مستحيلة ، مستحيلة اكتر من تخلاط الزيت بالماء ، مستحيلة اكتر من الحوت يعيش بلا ماء .. ""
قالت ياسمين:"" و علاش مستحيل ، عطيني سبب واحد صافي ""
قالت تغريد :"" مستحيل .. هكاك .. اسلام .. مستحيل يكون كايبغيني بديك الطريقة ، غير كانقولها I cringe ، الله ياربي مامتيقاش باللي عطيتكم فرصة تشوشوني بهاد الطريقة ، انا عادة انسانة ديما عارفة اشنو باغية .. هادشي لي كاتقوليه ماشي عقلاني نهائيا ، نقصو المسلسلات ""
قالت هناء :"" انت غالطة اتغريد ، انت اكتر انسانة فوضوية و غير مهتمة شفتها في حياتي .. انا نتيق بلا تردد فكرة انك ماراداش البال حتال لمشاعرك الخاصة ، يقدر اسلام ماباغيش يعتارف حيت عندو اسبابو ""
قالت تغريد :"" اسلام ماشي جبان و الحاجة اذا بغاها ، كايدير ليها محاولة على الاقل مرة ""
قالت ياسمين :"" ماشي في بحال هاد المواضيع ، كولشي كايخاف من الرفض ""
قالت تغريد :"" و علاش غايخافني نرفضو ؟ ""
و قبل ماتعرف تغريد اشنو قالت ضحكو البنات و غوتو بحال اذا سمعو اكتر الامور حماسية و هي تقلب عينيها من هاد العاطفيات البايخات ..
قالت ياسمين :"" اذا ماعندكش نية ترفضيه ""
قالت هناء :"" و اللهتا قصة هادو احسن من المسلسلات ديال التلفازة ""
قالت تغريد و هي كاتمالك اعصابها :"" يالله تهدنو املائكة الحب قبل مانقلب بوالديكم هاد الطوموبيل ""
ضحكات هناء و قالت :"" علاش تعصبتي ، راه انت لي خاصك تتهدني ""
قالت ياسمين :"" راه واضح كولشي ، هي متوترة دابا حيت عريناها قدام راسها "" وجهت كلامها لتغريد "" تغريد ، جديا ، خاصك تفكري في كلامنا و تستخدمي الذكاء و العقل البشري ديالك لي كاتظلي تهضري عليه و تقشعي اسلام واش مربوط فيك حتى هو ""
قالت تغريد :"" ماغانتصنتش لهادشي ، و اللهتا غير كاتخربقو ""
ضحكت هناء و قالت :"" على راحتك بقاي تكذبي على راسك حتى تجي شي وحدة تديه ليك ، و بصراحة بحال والو تكون ، حيت هاداك السيد عندك ، a whole snack ، كايزعزع الارض لي تحتك ""
صاحت تغريد قائلة بعصبية:"" كون غير سديتي انت فمك غير كانسمع صوتك كانبغي نرجع الجلد من قلقولتك و نغطي بيه وجهك يالله يتسد داك الفم ""
ضحكو البنات على توترها و قالت ياسمين كاتغيظها:"" تهدني البنت ، هناء مادارت والو ،غير هضرت ماقالتش غاتديه ليك نيت ، هاديك يمكن غير الغيرة ""
رجفات شفة تغريد العليا و غمضت عينيها و تمتمت :"" يا ربي الصبر غير حتى نوصلو لهاد القرينة ""
قالت ياسمين :"" بما انك ماكاتفهميش فهادشي.. ""
قالت هناء :"" حيت عمرك عجبوك المسلسلات و الافلام الرومانسية .. ""
قالت ياسمين :"" و فاش كانو البنات كايتزعطو في البعالك في ايام التانوية ..""
قالت هناء :"" كنتي ملاهية انت و اسلام كاتجاراو وراء بعضكم و كاتضاربو .. ""
قالو بزوج :""احنا دابا ، غانسهلو عليك كولشي ..""
و قلبات تغريد عينيها و اصدرت زمجرة انزعاج ...
قالت ياسمين:"" عادة الرجال كايتفضحو قدام المرأة لي عندهم مشاعر تجاهها و العيالات كايحسو بهادشي ..""
قالت تغريد :"" عمرني حسيت بشي حاجة منو ""
قالت هناء :"" انت ماكنتيش رادا البال ، يعني حتى حاجة ماكانت عندها معنى بالنسبة ليك ""
ضحكات تغريد ضحكة ساخرة و مرتبكة و قالت :"" اشنو وليتو فجأة ، فلاسفة او محللات في هاد التخربيق ؟ ""
قالت ياسمين متجاهلة كلامها :"" واش عمرو لمح ليك بالهضرة ؟ عمرو غار عليك ؟عمرو دار شي تصرف فشكل خلاك تستغربي ؟ واش كايهتم لك ؟ واش كايراضيك ، كايدير بخاطرك ؟ واش كايبقى يشوف في عينيك فاش كايهضر معاك ؟ واش كايبقى يمد يديه عليك ، زعما يقيس يديك .. شعرك.. وجهك ، واش كايبقى يفرنس غير هكاك ؟ مزاجو فاش كايكون مقلق كايكون ساهل عليك تنشطيه ؟
فاش كاتكونو بزوج كاتهضرو ، واش عمرو شاف فيك شي شوفة ، زعما دوك الشوفات ، راك عارفة ، كايخليو قلبك يضرب ، و خدودك يسخنو ، كاتحسي براسك باغية تحذري عينيك .. راك عارفة ، عمرك التاقطتي شي حاجة من هادشي ؟ كايبقى كل شخص و كيفاش كايعبر و لكن ضروري ماتكوني التاقطتي شي حاجة من هادشي .. امم ؟ ""
و جاوبت تغريد مباشرة :"" لا ، عمرن--""
و قبل ماتكمل تغريد سكتات ..
لحظات كتيرة لا تعد و لاتحصى كانت مشابهة لهادشي لي قالتو ياسمين .. صنعات عاصفة وسط دماغها ..
قلبها ضرب و فجأة احست بيديها عرقو ..
مايمكنش ، اسلام ... اسلام كايكن ليها مشاعر مميزة ؟ لا مايمكنش ، ماقادراش حتى تحدد واش عجبها هادشي اولا لا ..
و فجأة صوت صرخ في وذنيها ..
اسلام كايبغيك ..
مااحست حتى دارت بالمقود لجهة اليسار و صوت السيارة كاتوقف و غوات البنات في وذنيها ..
كب اسلام كأس الماء من القرعة فوق المكتب حداه و هو خدام في البيسي ، و اول جغمة من الكأس وحلات ليه و ماجا فين يتمالك نفسو ، سمع الهاتف الخاص بيه كايصوني و قال لنفسو :"" ماجايني حتى احساس زوين من هاد الاتصال في هاد الوقت ""